پاکستان پیپلز پارٹی کے رہنما اور سندھ کے سینئر وزیر شرجیل انعام میمن نے آزاد جموں و کشمیر کے آئندہ انتخابات میں وفاقی حکومت پر مداخلت کا الزام عائد کرتے ہوئے مطالبہ کیا ہے کہ انتخابات آزاد، منصفانہ اور شفاف انداز میں کرائے جائیں تاکہ عوام کی حقیقی رائے سامنے آ سکے۔
میڈیا سے گفتگو کرتے ہوئے شرجیل انعام میمن نے کہا کہ وفاقی حکومت آزاد کشمیر کے انتخابی عمل پر اثر انداز ہونے کی کوشش کر رہی ہے۔ انہوں نے سوال اٹھایا کہ جس حکومت کو انہوں نے "فارم 47 کی پیداوار” قرار دیا، وہ کشمیری عوام کے حقوق کا تحفظ کیسے کر سکتی ہے۔
انہوں نے کہا کہ آزاد کشمیر کے عوام کو اپنی قیادت منتخب کرنے کا مکمل جمہوری حق حاصل ہے اور انتخابی عمل کو ہر قسم کے دباؤ، مداخلت اور سیاسی اثر و رسوخ سے پاک رکھا جانا چاہیے۔ ان کے مطابق اگر انتخابات شفاف نہ ہوئے تو اس سے عوام کے جمہوری اعتماد کو نقصان پہنچ سکتا ہے۔
شرجیل میمن نے زور دیا کہ تمام سیاسی جماعتوں کو یکساں مواقع فراہم کیے جائیں اور الیکشن کمیشن اپنی آئینی ذمہ داریاں غیر جانبداری سے ادا کرے تاکہ انتخابی نتائج پر کسی قسم کا سوال نہ اٹھے۔
انہوں نے کہا کہ پیپلز پارٹی آزاد کشمیر کے عوام کے جمہوری حقِ رائے دہی پر مکمل یقین رکھتی ہے اور چاہتی ہے کہ انتخابات ایسے ماحول میں منعقد ہوں جہاں ہر ووٹر اپنی مرضی سے ووٹ ڈال سکے۔
واضح رہے کہ آزاد جموں و کشمیر کے انتخابات کے پیش نظر مختلف سیاسی جماعتوں نے اپنی انتخابی سرگرمیاں تیز کر دی ہیں، جبکہ سیاسی قیادت کی جانب سے انتخابی ماحول اور شفافیت سے متعلق بیانات کا سلسلہ بھی جاری ہے۔
شرجیل میمن کا آزاد کشمیر انتخابات میں وفاقی مداخلت کا الزام، شفاف الیکشن کا مطالبہ
