Author: Aqsa Younas Rana

‎امریکی ایوانِ نمائندگان نے ایران کے خلاف فوجی کارروائیاں روکنے کے حق میں قرارداد منظور کر لی ہے، جسے مشرقِ وسطیٰ میں جاری کشیدگی کے تناظر میں ایک اہم پیش رفت قرار دیا جا رہا ہے۔
‎خبر رساں ادارے کے مطابق ایوانِ نمائندگان میں ایران کے خلاف فوجی آپریشن روکنے کی قرارداد پر ووٹنگ ہوئی، جس میں 214 ارکان نے حمایت جبکہ 208 نے مخالفت میں ووٹ دیا۔ ووٹنگ کے دوران چار ریپبلکن ارکان نے اپنی جماعت کی پالیسی سے ہٹ کر ڈیموکریٹس کا ساتھ دیا اور قرارداد کے حق میں ووٹ ڈالا۔
‎رپورٹ کے مطابق یہ قرارداد ڈیموکریٹ رکن کانگریس پرامیلا جیاپال کی جانب سے پیش کی گئی تھی۔ قرارداد کا مقصد ایران کے خلاف جاری یا مستقبل میں ممکنہ فوجی کارروائیوں پر سیاسی دباؤ بڑھانا اور جنگ کے بجائے سفارتی راستہ اختیار کرنے کی حمایت کرنا ہے۔
‎تاہم امریکی آئینی اور قانونی طریقہ کار کے مطابق یہ قرارداد حتمی طور پر نافذ العمل نہیں ہوگی۔ اسے سینیٹ سے بھی منظوری درکار ہوگی، اور اس کے بعد بھی یہ ٹرمپ انتظامیہ کو کسی مخصوص اقدام سے روکنے یا کسی پالیسی پر عمل درآمد کا قانونی طور پر پابند نہیں بنا سکتی۔
‎سیاسی مبصرین کے مطابق قرارداد کی منظوری اس بات کی عکاسی کرتی ہے کہ کانگریس کے اندر ایران سے متعلق امریکی پالیسی پر اختلافِ رائے موجود ہے۔ متعدد ارکان کا مؤقف ہے کہ خطے میں بڑھتی ہوئی کشیدگی مزید بڑے تنازع کو جنم دے سکتی ہے، اس لیے فوجی کارروائی کے بجائے مذاکرات اور سفارت کاری کو ترجیح دی جانی چاہیے۔
‎خبر ایجنسی کے مطابق حالیہ مہینوں میں امریکی قانون ساز ایران سے متعلق اس نوعیت کی کئی قراردادیں منظور کر چکے ہیں، جن کا مقصد انتظامیہ کی خارجہ اور دفاعی پالیسی پر پارلیمانی نگرانی کو مؤثر بنانا اور کسی بھی ممکنہ جنگی اقدام پر کانگریس کے کردار کو نمایاں کرنا ہے۔
‎تجزیہ کاروں کا کہنا ہے کہ اگرچہ اس قرارداد کی قانونی حیثیت محدود ہے، لیکن اس سے امریکی سیاسی حلقوں میں ایران کے خلاف جنگی حکمتِ عملی پر جاری بحث کو مزید تقویت ملے گی۔ اس پیش رفت کو خطے کی بدلتی ہوئی صورتحال اور عالمی سفارتی کوششوں کے تناظر میں بھی اہم قرار دیا جا رہا ہے۔


جمہوریہ کانگو کے صوبہ اتوری میں الائیڈ ڈیموکریٹک فورسز (اے ڈی ایف) کے باغیوں نے ایک گاؤں پر حملہ کر کے کان کنوں سمیت کم از کم 16 افراد کو قتل کر دیا، جبکہ متعدد افراد کے لاپتا ہونے کے باعث ہلاکتوں میں اضافے کا خدشہ ظاہر کیا جا رہا ہے۔
غیر ملکی میڈیا کے مطابق حملہ صوبائی دارالحکومت بونیا سے تقریباً 165 کلومیٹر جنوب مغرب میں واقع ممباسا کے علاقے کے مانڈیائٹ گاؤں میں سہ پہر کے وقت کیا گیا۔ حملہ آوروں نے گاؤں میں داخل ہو کر اندھا دھند کارروائی کی، جس کے نتیجے میں متعدد افراد جان سے ہاتھ دھو بیٹھے۔
‎مقامی اہلکار جانویر کنیونگی نے میڈیا کو بتایا کہ جاں بحق ہونے والوں میں بڑی تعداد سونے کی کانوں میں کام کرنے والے مزدوروں کی ہے۔ انہوں نے کہا کہ ہلاکتوں کی تعداد حتمی نہیں، کیونکہ قریبی علاقوں سے بھی حملوں کی اطلاعات موصول ہو رہی ہیں اور سرچ آپریشن جاری ہے۔
‎حکام کے مطابق حملے سے قبل باغیوں نے اسی علاقے سے کئی افراد کو اغوا بھی کیا تھا، جن کی تلاش کے لیے سیکیورٹی فورسز کارروائیاں کر رہی ہیں۔
‎الائیڈ ڈیموکریٹک فورسز کو جمہوریہ کانگو میں سرگرم خطرناک مسلح گروہوں میں شمار کیا جاتا ہے، جو گزشتہ کئی برسوں سے شہری آبادی، دیہات اور کان کنی کے علاقوں کو نشانہ بنا رہے ہیں۔
‎سیکیورٹی حکام کی گزشتہ ہفتے جاری کردہ رپورٹ کے مطابق باغیوں نے صرف جون کے مہینے میں 62 شہریوں کو قتل اور 57 افراد کو اغوا کیا، جس سے خطے میں امن و امان کی صورتحال مزید تشویشناک ہو گئی ہے۔

‎امریکی اخبار وال اسٹریٹ جرنل نے دعویٰ کیا ہے کہ امریکی صدر ڈونلڈ ٹرمپ ایران کے خلاف فوجی کارروائیوں کو مزید وسعت دینے پر غور کر رہے ہیں۔ رپورٹ کے مطابق مشرقِ وسطیٰ میں بڑھتی ہوئی کشیدگی کے پیش نظر امریکا خطے میں اپنی فوجی موجودگی اور دفاعی تیاریوں میں اضافہ کر رہا ہے۔
‎رپورٹ کے مطابق امریکا مشرقِ وسطیٰ میں مزید فوجی دستے، طبی عملہ اور اسلحہ منتقل کر رہا ہے تاکہ کسی بھی ممکنہ فوجی کارروائی کے لیے مکمل تیاری یقینی بنائی جا سکے۔ ذرائع کا کہنا ہے کہ اس مقصد کے لیے امریکی اسپیشل فورسز اور جدید لڑاکا طیاروں کو بھی خطے میں تعینات کیا جا رہا ہے۔
‎رپورٹ میں مزید کہا گیا ہے کہ امریکا اور برطانیہ میں موجود امریکی بمبار طیاروں کو بھی ہائی الرٹ کر دیا گیا ہے، جس سے یہ تاثر مل رہا ہے کہ واشنگٹن ایران کے خلاف اپنے عسکری آپشنز کو مزید فعال بنانے پر غور کر رہا ہے۔
‎دوسری جانب امریکی نیوز ویب سائٹ ایکسیوس نے رپورٹ کیا ہے کہ حالیہ جھڑپوں کے دوبارہ آغاز کے بعد امریکی فوج نے پہلی مرتبہ ایران کے خلاف کارروائی میں بی ون بمبار طیارے کا استعمال کیا۔ رپورٹ کے مطابق اس بمبار طیارے نے ایران کی پاسدارانِ انقلاب سے منسلک اہداف کو نشانہ بنایا۔
‎بی ون بمبار امریکی فضائیہ کے جدید ترین اسٹریٹجک طیاروں میں شمار ہوتا ہے، جو 24 بم، ہر ایک تقریباً 2000 پاؤنڈ وزنی، یا درجنوں میزائل لے جانے کی صلاحیت رکھتا ہے۔ یہ طیارہ کم بلندی پر انتہائی تیز رفتاری سے پرواز کرنے اور مختلف نوعیت کے اہداف کو نشانہ بنانے کی صلاحیت بھی رکھتا ہے۔
‎امریکی میڈیا رپورٹس کے مطابق خطے میں بڑھتی ہوئی عسکری سرگرمیوں نے ایران اور امریکا کے درمیان کشیدگی میں مزید اضافے کے خدشات پیدا کر دیے ہیں، تاہم امریکی حکومت کی جانب سے ان رپورٹس پر باضابطہ طور پر کوئی تفصیلی مؤقف سامنے نہیں آیا۔

‎ایران کے صوبہ خوزستان میں ایران عراق سرحد کے قریب امریکی حملے میں 2 افراد جاں بحق جبکہ 11 دیگر زخمی ہو گئے۔ ایرانی حکام کے مطابق حملہ گزشتہ شب شلمچہ بارڈر کراسنگ کے قریب واقع مسافر ٹرمینل کے اطراف ایک چیک پوسٹ کو نشانہ بنا کر کیا گیا۔
‎صوبہ خوزستان کے نائب گورنر ولی اللہ حیاتی نے بتایا کہ حملے کے نتیجے میں دو افراد جان کی بازی ہار گئے جبکہ 11 افراد زخمی ہوئے، جنہیں فوری طور پر قریبی اسپتالوں میں منتقل کر دیا گیا جہاں انہیں طبی امداد فراہم کی جا رہی ہے۔
‎حکام کا کہنا ہے کہ حملہ شلمچہ بارڈر کراسنگ کے قریب کیا گیا، تاہم اس واقعے کے باوجود سرحدی گزرگاہ پر زائرین کی آمد و رفت معمول کے مطابق جاری ہے اور سفری سرگرمیوں میں کوئی رکاوٹ پیدا نہیں ہوئی۔
‎ایرانی حکام نے واقعے کی تحقیقات شروع کر دی ہیں اور حملے سے ہونے والے نقصانات کا جائزہ لیا جا رہا ہے۔ سرحدی علاقے میں سیکیورٹی بھی مزید سخت کر دی گئی ہے تاکہ کسی بھی ممکنہ صورتحال سے نمٹا جا سکے۔
‎یہ حملہ ایسے وقت میں سامنے آیا ہے جب خطے میں کشیدگی پہلے ہی عروج پر ہے اور ایران و امریکا کے درمیان بڑھتے ہوئے تناؤ پر عالمی برادری گہری نظر رکھے ہوئے ہے۔ تجزیہ کاروں کے مطابق سرحدی علاقوں میں ایسے واقعات خطے کے امن و استحکام کے لیے مزید خطرات پیدا کر سکتے ہیں۔
‎تاحال امریکی حکام کی جانب سے اس حملے پر کوئی باضابطہ ردعمل سامنے نہیں آیا، جبکہ ایرانی حکام نے واقعے کی مکمل تحقیقات کے بعد مزید تفصیلات جاری کرنے کا عندیہ دیا ہے۔

‎سلطنت عمان نے بحیرہ احمر میں بڑھتی ہوئی کشیدگی پر گہری تشویش کا اظہار کرتے ہوئے تمام فریقوں پر زور دیا ہے کہ ایسے اقدامات سے گریز کیا جائے جو خطے میں تناؤ میں اضافے، جہاز رانی کی آزادی میں رکاوٹ اور علاقائی امن و استحکام کے لیے خطرات کا باعث بن سکتے ہیں۔
‎عمانی وزارت خارجہ کی جانب سے جاری بیان میں کہا گیا ہے کہ عمان خطے میں امن کے قیام اور کشیدگی کے خاتمے کے لیے اپنی سفارتی کوششیں جاری رکھے ہوئے ہے۔ وزارت کے مطابق سعودی عرب، یمن کے متعلقہ فریقین اور اقوام متحدہ کے خصوصی ایلچی کے ساتھ مسلسل رابطے میں رہا جا رہا ہے تاکہ سیاسی عمل کو دوبارہ فعال بنایا جا سکے اور امن روڈ میپ پر پیش رفت ممکن ہو۔
‎بیان میں کہا گیا کہ عمان کا مقصد یمن بحران کے پرامن حل کو فروغ دینا، خطے میں استحکام بحال کرنا اور بحیرہ احمر میں بین الاقوامی جہاز رانی کے تحفظ کو یقینی بنانا ہے۔ عمان نے اس بات پر بھی زور دیا کہ تمام مسائل کا حل مذاکرات، سفارتکاری اور باہمی تعاون کے ذریعے ہی ممکن ہے۔
‎عمانی وزارت خارجہ کے مطابق منیلا میں عمان کے وزیر خارجہ نے پاکستان کے نائب وزیراعظم اور وزیر خارجہ اسحاق ڈار سے ملاقات کی۔ ملاقات کے دوران دونوں رہنماؤں نے پاک عمان تعلقات کو مزید مضبوط بنانے، دوطرفہ تعاون بڑھانے اور خطے کی مجموعی صورتحال پر تفصیلی تبادلہ خیال کیا۔
‎دونوں وزرائے خارجہ نے آبنائے ہرمز، یمن اور مشرق وسطیٰ کی بدلتی ہوئی صورتحال سمیت مختلف علاقائی امور پر بھی گفتگو کی اور اس عزم کا اظہار کیا کہ خطے میں امن، استحکام اور سفارتی روابط کے فروغ کے لیے مشترکہ کوششیں جاری رکھی جائیں گی۔