بلوچستان کے ضلع مستونگ میں کوئٹہ سے کراچی جانے والی ایک مسافر بس پر مسلح حملے کے نتیجے میں 3 مسافر شہید جبکہ 3 دیگر زخمی ہو گئے۔ پولیس کے مطابق واقعہ مستونگ کے علاقے کھڈ کوچہ میں پیش آیا، جہاں مسلح حملہ آوروں نے بس پر اندھا دھند فائرنگ کی۔
پولیس کے مطابق جاں بحق ہونے والوں میں انعام الحق، سید طارق نیاز اور لیاقت خان شامل ہیں، جبکہ زخمیوں کی شناخت نجم ثاقب، عبدالحنان اور عبدالولی کے ناموں سے ہوئی ہے۔ زخمیوں کو فوری طور پر قریبی اسپتال منتقل کر دیا گیا، جہاں انہیں طبی امداد فراہم کی جا رہی ہے۔
حکام کے مطابق واقعے کے بعد قانون نافذ کرنے والے اداروں نے جائے وقوعہ کو گھیرے میں لے کر شواہد اکٹھے کرنا شروع کر دیے ہیں، جبکہ حملہ آوروں کی گرفتاری کے لیے سرچ آپریشن جاری ہے۔ پولیس کا کہنا ہے کہ واقعے کی مختلف پہلوؤں سے تحقیقات کی جا رہی ہیں۔
یہ حملہ ایسے وقت میں ہوا ہے جب چند روز قبل بھی بلوچستان کے اضلاع قلات اور سوراب میں کوئٹہ، کراچی قومی شاہراہ پر مسافر کوچز کو نشانہ بنایا گیا تھا۔ ان دو الگ الگ حملوں میں 4 افراد جاں بحق جبکہ ایک خاتون سمیت 4 افراد زخمی ہوئے تھے۔
پولیس حکام کے مطابق قلات کی تحصیل منگوچر کے علاقے گرو میں گھات لگائے مسلح افراد نے کوئٹہ سے کراچی جانے والی ایک مسافر کوچ پر فائرنگ کی اور واردات کے بعد فرار ہونے میں کامیاب ہو گئے۔ جاں بحق افراد کی لاشیں شناخت اور قانونی کارروائی کے لیے شیخ زید اسپتال کوئٹہ منتقل کی گئیں۔
اسی دوران سوراب کے مقام پر کوئٹہ سے تربت جانے والی ایک اور مسافر کوچ پر بھی فائرنگ کی گئی، جس کے نتیجے میں ایک خاتون شدید زخمی ہوئیں، جنہیں فوری طور پر اسپتال منتقل کیا گیا۔
سیکیورٹی ذرائع کے مطابق حالیہ حملوں کے بعد قومی شاہراہ پر سیکیورٹی مزید سخت کر دی گئی ہے۔ پولیس اور دیگر قانون نافذ کرنے والے ادارے مختلف علاقوں میں سرچ آپریشن کر رہے ہیں تاکہ حملہ آوروں کو گرفتار کر کے قانون کے کٹہرے میں لایا جا سکے۔
مستونگ میں مسافر بس پر حملہ، 3 مسافر شہید، 3 زخمی
