Author: Aqsa Younas Rana

‎بھارت کے دارالحکومت نئی دہلی میں نوجوانوں کی قیادت میں چلنے والی "کاکروچ جنتا پارٹی” کی جانب سے ہزاروں افراد نے پارلیمنٹ کی جانب مارچ کیا، جہاں پولیس اور مظاہرین کے درمیان جھڑپیں ہوئیں۔ پولیس نے مظاہرین کو منتشر کرنے کے لیے آنسو گیس کی شیلنگ اور لاٹھی چارج کیا۔
‎رپورٹس کے مطابق احتجاج میں 10 ہزار سے زائد افراد نے شرکت کی، جو اب تک اس تحریک کا سب سے بڑا مظاہرہ قرار دیا جا رہا ہے۔ مظاہرین نے وزیرِ تعلیم دھرمیندر پردھان کے استعفے، امتحانی نظام میں مبینہ بدعنوانی کے خاتمے اور امتحانی پرچوں کے لیک ہونے کے واقعات کی شفاف تحقیقات کا مطالبہ کیا۔
‎یہ احتجاج اس وقت مزید شدت اختیار کر گیا جب ہفتے کے روز 59 سالہ سماجی کارکن سونم وانگچک کو، جو گزشتہ تین ہفتوں سے بھوک ہڑتال پر تھے، حکام نے ان کی مرضی کے بغیر اسپتال منتقل کر دیا۔ وانگچک امتحانی نظام میں مبینہ بے ضابطگیوں کے خلاف نوجوانوں کی تحریک کے ساتھ اظہارِ یکجہتی کے طور پر بھوک ہڑتال کر رہے تھے۔
‎مظاہرین نے مارچ کے دوران وزیرِ اعظم نریندر مودی اور وزیرِ تعلیم کے خلاف نعرے بازی کی اور مطالبہ کیا کہ امتحانی نظام میں شفافیت کو یقینی بنانے کے لیے فوری اصلاحات کی جائیں۔
‎احتجاج میں شریک ایک خاتون مظاہر نے کہا کہ موجودہ نظام نوجوانوں کے مسائل سننے اور ان کے تحفظات دور کرنے میں ناکام ہو چکا ہے، اسی وجہ سے بڑی تعداد میں لوگ اس تحریک کا حصہ بن رہے ہیں۔
‎دوسری جانب بھارتی حکومت نے مذاکرات کی پیشکش کرتے ہوئے دو نمائندہ کارکنوں کو وزیرِ صحت جے پی نڈا سے ملاقات کی دعوت دی ہے۔ تاہم تحریک کے ترجمان سورَو داس نے کہا کہ حکومت کے ساتھ بات چیت اسی صورت میں مؤثر ہوگی جب طلبہ کے بنیادی مطالبات تسلیم کیے جائیں۔
‎واضح رہے کہ "کاکروچ جنتا پارٹی” ایک نوجوانوں کی احتجاجی تحریک ہے، جس نے اپنے نام کا انتخاب حکمران جماعت پر طنز کے طور پر کیا ہے۔ یہ تحریک گزشتہ چند ماہ سے امتحانی نظام میں مبینہ کرپشن، پرچہ لیک ہونے کے واقعات اور تعلیمی اصلاحات کے مطالبات کے لیے سرگرم ہے۔

‎ایران اور امریکا کے درمیان جاری کشیدگی کم کرنے کے لیے ثالث ممالک نے ایک نئی سفارتی تجویز پیش کی ہے، جس کے تحت دونوں ممالک کے درمیان 10 روزہ جنگ بندی کی سفارش کی گئی ہے۔ اس تجویز کا مقصد خطے میں بڑھتی ہوئی کشیدگی کو کم کرنا، فوجی کارروائیوں کا سلسلہ روکنا اور دونوں فریقوں کو دوبارہ مذاکرات کی میز پر لانا ہے۔
‎برطانوی نشریاتی ادارے اور بین الاقوامی خبر رساں ادارے رائٹرز کی رپورٹس کے مطابق ثالثی کی کوششوں میں شامل ممالک نے ایران اور امریکا سے مطالبہ کیا ہے کہ وہ کم از کم 10 دن کے لیے تمام حملے روک دیں تاکہ اعتماد سازی کا ماحول پیدا ہو سکے۔ سفارتی ذرائع کا کہنا ہے کہ اس وقفے کے دوران دونوں ممالک کے درمیان پہلے سے موجود عبوری مفاہمتی معاہدے کو دوبارہ فعال بنانے کی کوشش کی جائے گی۔
‎رپورٹس کے مطابق حالیہ دنوں میں دونوں ممالک کے درمیان بڑھتی ہوئی عسکری کشیدگی نے پورے خطے کو غیر یقینی صورتحال سے دوچار کر دیا ہے۔ متعدد حملوں، جوابی کارروائیوں اور سخت بیانات کے باعث نہ صرف مشرق وسطیٰ بلکہ عالمی سطح پر بھی تشویش میں اضافہ ہوا ہے۔ ایسے میں ثالث ممالک کا خیال ہے کہ وقتی جنگ بندی مستقبل میں کسی بڑے تصادم کو روکنے میں اہم کردار ادا کر سکتی ہے۔
‎ذرائع کے مطابق مجوزہ 10 روزہ جنگ بندی کے دوران سفارتی رابطوں کو مزید تیز کیا جائے گا اور ایسے نکات پر بات چیت ہوگی جن کی بنیاد پر مستقل جنگ بندی اور وسیع تر معاہدے کی راہ ہموار کی جا سکے۔ اس دوران اعتماد سازی کے اقدامات، علاقائی سلامتی اور دیگر متنازع امور بھی زیر غور آنے کا امکان ہے۔
‎اب تک ایران اور امریکا کی جانب سے اس تجویز پر باضابطہ ردعمل سامنے نہیں آیا، تاہم سفارتی حلقوں کا کہنا ہے کہ ثالث ممالک دونوں فریقوں سے مسلسل رابطے میں ہیں اور انہیں مذاکرات کی طرف واپس لانے کی کوششیں جاری ہیں۔
‎تجزیہ کاروں کے مطابق اگر یہ تجویز قبول کر لی جاتی ہے تو نہ صرف خطے میں جاری کشیدگی میں کمی آسکتی ہے بلکہ عالمی منڈیوں، توانائی کی فراہمی اور علاقائی استحکام پر بھی اس کے مثبت اثرات مرتب ہونے کا امکان ہے۔

‎مشرقِ وسطیٰ میں جاری کشیدگی کے تناظر میں بحرین کی وزارتِ داخلہ نے ملک بھر میں ہنگامی الرٹ جاری کرتے ہوئے شہریوں کو پرسکون رہنے اور فوری طور پر قریبی محفوظ مقامات یا پناہ گاہوں میں منتقل ہونے کی ہدایت کی ہے۔
‎وزارتِ داخلہ کے مطابق پیر کے روز مختلف علاقوں میں خطرے کے سائرن اور ہنگامی الارم بجائے گئے، جس کے بعد شہریوں سے اپیل کی گئی کہ وہ حفاظتی ہدایات پر مکمل عمل کریں اور غیر ضروری طور پر گھروں یا محفوظ مقامات سے باہر نہ نکلیں۔
‎بحرینی حکام کا کہنا ہے کہ یہ ہنگامی الرٹ اسی روز جاری کیے گئے پہلے انتباہ کے چند گھنٹوں بعد سامنے آیا، جس سے خطے میں سیکیورٹی صورتحال کی سنگینی ظاہر ہوتی ہے۔ وزارت نے عوام پر زور دیا ہے کہ وہ افواہوں سے گریز کریں اور صرف سرکاری ذرائع سے جاری ہونے والی معلومات پر اعتماد کریں۔
‎ابتدائی اطلاعات کے مطابق سائرن بجنے کے بعد فوری طور پر کسی جانی یا مالی نقصان کی اطلاع سامنے نہیں آئی۔ تاہم متعلقہ ادارے صورتحال پر مسلسل نظر رکھے ہوئے ہیں اور کسی بھی ہنگامی صورتِ حال سے نمٹنے کے لیے تیار ہیں۔
‎یہ پیش رفت ایسے وقت میں سامنے آئی ہے جب امریکا، اسرائیل اور ایران کے درمیان جاری کشیدگی میں اضافہ دیکھا جا رہا ہے۔ حالیہ دنوں میں خطے میں مختلف فوجی سرگرمیوں اور حملوں کے بعد کئی خلیجی ممالک نے حفاظتی اقدامات سخت کر دیے ہیں۔
‎بحرین کی حکومت نے شہریوں سے اپیل کی ہے کہ وہ سول ڈیفنس اور دیگر متعلقہ اداروں کی جانب سے جاری تمام ہدایات پر عمل کریں، ایمرجنسی کی صورت میں طے شدہ حفاظتی طریقہ کار اختیار کریں اور سوشل میڈیا پر غیر مصدقہ معلومات پھیلانے سے اجتناب کریں۔
‎علاقائی صورتحال بدستور غیر یقینی ہے، جبکہ مختلف ممالک سفارتی سطح پر کشیدگی کم کرنے اور مزید تصادم سے بچنے کی کوششیں جاری رکھے ہوئے ہیں۔

‎حماس نے خلیل الحیہ کو تنظیم کا نیا سربراہ مقرر کرنے کا باضابطہ اعلان کر دیا ہے۔ تنظیم کے مطابق خلیل الحیہ سابق سربراہ یحییٰ سنوار کی جگہ ذمہ داریاں سنبھالیں گے۔
‎حماس کی جانب سے جاری اعلان میں کہا گیا ہے کہ خلیل الحیہ تنظیم کی سیاسی اور تنظیمی قیادت کی ذمہ داریاں ادا کریں گے۔ یحییٰ سنوار اکتوبر 2024ء میں اسرائیلی فوج کی کارروائی میں شہید ہو گئے تھے، جس کے بعد تنظیم کی قیادت کے حوالے سے مختلف قیاس آرائیاں کی جا رہی تھیں۔
‎خلیل الحیہ 1960ء میں غزہ میں پیدا ہوئے اور فلسطینی تحریک حماس کے بانی اراکین میں شمار کیے جاتے ہیں۔ وہ 1987ء میں حماس کے قیام کے وقت سے ہی تنظیم کے ساتھ وابستہ ہیں اور مختلف سیاسی، تنظیمی اور مذاکراتی ذمہ داریاں نبھاتے رہے ہیں۔
‎گزشتہ کئی برسوں کے دوران خلیل الحیہ نے حماس کی قیادت میں اہم کردار ادا کیا اور متعدد علاقائی و بین الاقوامی سطح کے مذاکرات میں تنظیم کی نمائندگی بھی کی۔ انہیں حماس کے سینئر رہنماؤں میں شمار کیا جاتا ہے اور فلسطینی سیاسی معاملات میں ان کا مؤقف نمایاں رہا ہے۔
‎تجزیہ کاروں کے مطابق ان کی تقرری ایسے وقت میں سامنے آئی ہے جب غزہ کی صورتحال، اسرائیل کے ساتھ جاری کشیدگی اور خطے کی بدلتی ہوئی سیاسی صورت حال کے باعث حماس کو اہم فیصلوں کا سامنا ہے۔ نئی قیادت کو تنظیمی معاملات کے ساتھ ساتھ سفارتی اور سیاسی چیلنجز سے بھی نمٹنا ہوگا۔
‎حماس کی جانب سے خلیل الحیہ کی تقرری کو تنظیمی تسلسل کا حصہ قرار دیا گیا ہے، جبکہ اس پیش رفت پر خطے کے مختلف ممالک اور عالمی برادری کی جانب سے ردعمل سامنے آنے کا امکان ہے۔