اسلام آباد: وزیراعظم محمد شہباز شریف کی زیر صدارت خطے کی کشیدہ صورتحال کے پیش نظر ملک کو مالیاتی اور معاشی اثرات سے محفوظ رکھنے کے لیے ایک اہم جائزہ اجلاس منعقد ہوا، جس میں درمیانی اور طویل مدتی جامع حکمت عملی مرتب کرنے پر غور کیا گیا۔
اجلاس سے خطاب کرتے ہوئے وزیراعظم نے کہا کہ عالمی سطح پر کئی ممالک کو اشیائے ضروریہ کی طلب و رسد برقرار رکھنے میں مشکلات کا سامنا ہے، تاہم پاکستان نے اس صورتحال کو مؤثر انداز میں سنبھالا ہے۔ انہوں نے متعلقہ اداروں کی جانب سے بروقت اقدامات کو سراہتے ہوئے کہا کہ اشیائے خوردونوش کی مقامی ضروریات پوری کرنے کے بعد اضافی پیداوار کی برآمد کے لیے بھی کامیاب حکمت عملی پر کام جاری ہے۔
وزیراعظم نے ہدایت کی کہ عالمی منڈی میں قیمتوں میں اضافے کے تناظر میں معیشت پر پڑنے والے اثرات سے نمٹنے کے لیے جامع اور قابل عمل حکمت عملی تیار کی جائے، جس میں تمام شعبوں کے استحکام اور ترقی کو مدنظر رکھا جائے۔ انہوں نے زور دیا کہ بڑھتی پیداواری لاگت کے اثرات کو کم کرنے، برآمدات کے تحفظ اور مجموعی قومی پیداوار کو مستحکم رکھنے کے لیے مؤثر اقدامات تجویز کیے جائیں۔انہوں نے مزید ہدایت کی کہ زراعت اور صنعت پر منفی اثرات سے بچاؤ کے لیے دستیاب وسائل کو بھرپور استعمال میں لایا جائے اور حکمت عملی کی تیاری میں اندرونی و بیرونی معاشی عوامل کا بھی تفصیلی جائزہ لیا جائے۔
بریفنگ میں بتایا گیا کہ تمام متعلقہ وزارتیں روزانہ کی بنیاد پر صورتحال کا جائزہ لے رہی ہیں۔ اجلاس میں وفاقی وزراء، گورنر اسٹیٹ بینک اور اعلیٰ حکام نے شرکت کی اور موجودہ معاشی صورتحال سے نمٹنے کے لیے جاری اقدامات پر بریفنگ دی گئی۔ وزیراعظم نے اداروں کے باہمی تعاون کو مزید مؤثر بنانے کی ہدایت دیتے ہوئے کہا کہ حکمت عملی ایسی ہو جو طلب و رسد کے توازن کو متاثر کیے بغیر معیشت کو مستحکم کرے۔
