Author: Aqsa Younas Rana

‎متحدہ عرب امارات نے فجیرہ بندرگاہ سے تیل کی برآمدات دوگنا کرنے کے لیے بڑے منصوبے پر کام تیز کر دیا ہے، جس کا مقصد آبنائے ہرمز پر انحصار کم کرنا اور عالمی توانائی سپلائی کو مزید محفوظ بنانا ہے۔
‎غیر ملکی میڈیا رپورٹس کے مطابق یو اے ای حکومت نے ابوظبی سے فجیرہ تک نئی آئل پائپ لائن منصوبے کی تعمیر میں تیزی لانے کا اعلان کیا ہے، جبکہ اس منصوبے کو 2027 تک مکمل کرنے کا ہدف مقرر کیا گیا ہے۔
‎رپورٹس کے مطابق ولی عہد شیخ خالد بن محمد بن زاید نے متعلقہ حکام کو ہدایت دی ہے کہ پائپ لائن منصوبے کو جلد از جلد مکمل کیا جائے تاکہ خطے میں بڑھتی کشیدگی کے باوجود تیل کی ترسیل متاثر نہ ہو۔
‎حکام کے مطابق نئی پائپ لائن آبنائے ہرمز کو بائی پاس کرنے میں مدد دے گی، جو اس وقت عالمی سطح پر سب سے حساس بحری گزرگاہوں میں شمار کی جاتی ہے۔
‎ابوظبی حکام کا کہنا ہے کہ موجودہ فجیرہ پائپ لائن یومیہ 18 لاکھ بیرل خام تیل سپلائی کرنے کی صلاحیت رکھتی ہے، تاہم نئی توسیع کے بعد اماراتی تیل کی برآمدی گنجائش میں نمایاں اضافہ ہو جائے گا۔
‎توانائی ماہرین کے مطابق یو اے ای کا یہ منصوبہ ایسے وقت سامنے آیا ہے جب آبنائے ہرمز کے حوالے سے عالمی خدشات بڑھ رہے ہیں اور خلیجی خطے میں ایران، امریکا اور دیگر طاقتوں کے درمیان کشیدگی مسلسل برقرار ہے۔
‎تجزیہ کاروں کا کہنا ہے کہ فجیرہ بندرگاہ اور متبادل پائپ لائن نیٹ ورک امارات کو عالمی تیل منڈی میں زیادہ محفوظ اور مستحکم پوزیشن فراہم کر سکتے ہیں۔

‎امریکی صدر ڈونلڈ ٹرمپ نے ایران، امریکا اور اسرائیل کے درمیان جاری کشیدگی کی کوریج پر امریکی میڈیا کو شدید تنقید کا نشانہ بناتے ہوئے اسے “ملک کا غدار” قرار دے دیا ہے۔
‎صدر ٹرمپ نے اپنے سوشل میڈیا پلیٹ فارم “ٹروتھ سوشل” پر جاری بیان میں کہا کہ بعض امریکی میڈیا ادارے ایسی رپورٹس نشر کر رہے ہیں جن میں تہران کو عسکری لحاظ سے واشنگٹن سے برتر ظاہر کیا جا رہا ہے، جو ان کے بقول صحافت نہیں بلکہ دشمن کی مدد کے مترادف ہے۔
‎ٹرمپ نے کہا کہ ایسی خبریں ایران کو “جھوٹی امید” دے رہی ہیں، حالانکہ ان کے مطابق ایران کو کسی بھی قسم کی امید نہیں ہونی چاہیے۔
‎امریکی صدر نے میڈیا پر سخت الفاظ استعمال کرتے ہوئے کہا کہ “یہ امریکی میڈیا بزدل ہیں جو اپنے ہی ملک کے خلاف کھڑے ہیں۔”
‎انہوں نے مزید کہا کہ صرف “ہارے ہوئے، ناشکرے اور احمق لوگ” امریکا کے خلاف دلائل دے سکتے ہیں۔
‎ٹرمپ کے اس بیان کے بعد امریکی سیاسی اور صحافتی حلقوں میں نئی بحث چھڑ گئی ہے۔ سیاسی تجزیہ کاروں کے مطابق ٹرمپ ماضی میں بھی میڈیا کو “فیک نیوز” اور “عوام کا دشمن” قرار دیتے رہے ہیں، تاہم حالیہ بیان کو غیر معمولی طور پر سخت قرار دیا جا رہا ہے۔
‎ماہرین کا کہنا ہے کہ ایران اور اسرائیل کے درمیان بڑھتی کشیدگی اور امریکا کے ممکنہ کردار پر امریکی میڈیا مسلسل مختلف زاویوں سے رپورٹنگ کر رہا ہے، جس پر وائٹ ہاؤس اور ٹرمپ حامی حلقے ناراضی کا اظہار کرتے رہے ہیں۔
‎دوسری جانب صحافتی تنظیموں اور ناقدین کا کہنا ہے کہ آزاد میڈیا کسی بھی جمہوریت کا بنیادی ستون ہوتا ہے اور جنگی صورتحال میں مختلف آراء اور حقائق سامنے لانا صحافت کی ذمہ داری ہے۔

‎روس اور یوکرین کے درمیان تین روزہ جنگ بندی ختم ہوتے ہی دونوں ممالک نے ایک دوسرے پر شدید حملے شروع کر دیے، جس کے نتیجے میں اب تک مجموعی طور پر 27 افراد ہلاک ہو چکے ہیں۔
‎یوکرینی فضائیہ کے مطابق روس نے یوکرین پر 675 ڈرونز اور 56 میزائل داغے، جن میں زیادہ تر حملوں کا مرکز دارالحکومت کیف تھا۔ حکام کے مطابق کیف پر ہونے والے بڑے میزائل اور ڈرون حملے میں 24 افراد جان کی بازی ہار گئے جبکہ 47 زخمی ہوئے۔
‎رپورٹس کے مطابق حملوں کے بعد کیف کے مختلف علاقوں میں آگ بھڑک اٹھی، عمارتوں کو نقصان پہنچا اور شہریوں میں خوف و ہراس پھیل گیا۔ امدادی ٹیمیں ملبہ ہٹانے اور زخمیوں کو اسپتال منتقل کرنے میں مصروف رہیں۔
‎دوسری جانب روسی وزارت دفاع نے دعویٰ کیا ہے کہ اس نے گزشتہ رات یوکرین کے 355 ڈرونز مار گرائے۔ روس کے مطابق یوکرینی حملوں میں روسی شہر ریازان کو بھی نشانہ بنایا گیا جہاں 3 افراد ہلاک جبکہ 12 زخمی ہوئے۔
‎روسی حکام کا کہنا ہے کہ فضائی دفاعی نظام نے متعدد حملوں کو ناکام بنایا، تاہم بعض ڈرونز شہری علاقوں تک پہنچنے میں کامیاب رہے۔
‎واضح رہے کہ تین روزہ جنگ بندی کے خاتمے کے بعد دونوں ممالک کے درمیان کشیدگی دوبارہ شدت اختیار کر چکی ہے اور فضائی حملوں کا سلسلہ مسلسل جاری ہے۔
‎عالمی مبصرین کے مطابق حالیہ حملوں نے ایک بار پھر یہ خدشات بڑھا دیے ہیں کہ جنگ مزید خطرناک مرحلے میں داخل ہو سکتی ہے۔ ماہرین کا کہنا ہے کہ روس اور یوکرین کے درمیان بڑھتی عسکری کارروائیاں نہ صرف خطے بلکہ عالمی سلامتی کے لیے بھی تشویش کا باعث ہیں۔

‎امریکی سینیٹ میں ایران جنگ کے معاملے پر صدر ڈونلڈ ٹرمپ کے اختیارات محدود کرنے کی قرارداد صرف ایک ووٹ کے فرق سے ناکام ہو گئی، جس نے امریکی سیاست میں بڑھتی ہوئی تقسیم اور جنگ سے متعلق بے چینی کو نمایاں کر دیا ہے۔
‎رپورٹس کے مطابق قرارداد کے حق میں 49 جبکہ مخالفت میں 50 ووٹ ڈالے گئے، یوں یہ اہم قرارداد معمولی فرق سے منظور نہ ہو سکی۔
‎یہ قرارداد سینیٹر جیف مرکلے کی جانب سے پیش کی گئی تھی، جس کا مقصد ایران کے خلاف ممکنہ فوجی کارروائیوں کے حوالے سے صدر ٹرمپ کے اختیارات کو محدود کرنا تھا۔ دلچسپ بات یہ ہے کہ صدر ٹرمپ کی اپنی جماعت ری پبلکن پارٹی کے تین اراکین نے بھی قرارداد کے حق میں ووٹ دیتے ہوئے جنگی پالیسی پر تحفظات کا اظہار کیا۔
‎سیاسی مبصرین کے مطابق قرارداد کی صرف ایک ووٹ سے ناکامی اس بات کی نشاندہی کرتی ہے کہ امریکا کے اندر ایران جنگ کے معاملے پر شدید اختلافات موجود ہیں اور کانگریس کے کئی ارکان مزید فوجی کشیدگی کے حق میں نہیں۔
‎ڈیموکریٹس کی جانب سے اس قرارداد کی حمایت کرنے والے سینیٹر ٹم کین نے کہا کہ ایک وقت آئے گا، اور شاید وہ وقت جلد آ جائے، جب سینیٹ صدر سے واضح طور پر کہے گی کہ “اس جنگ کو روک دو”۔
‎انہوں نے کہا کہ مسلسل ووٹنگ اور سیاسی دباؤ کے ذریعے کانگریس جنگ کے اختیارات پر اپنا آئینی کردار ادا کرتی رہے گی۔
‎ماہرین کے مطابق اگرچہ قرارداد منظور نہیں ہو سکی، لیکن اس ووٹنگ نے امریکی ایوانِ بالا میں جنگی پالیسی پر موجود تقسیم کو کھل کر سامنے لا دیا ہے۔ تجزیہ کاروں کا کہنا ہے کہ ایران کے ساتھ بڑھتی کشیدگی اور جنگی اخراجات میں اضافے نے امریکی سیاست میں نئی بحث چھیڑ دی ہے۔
‎دوسری جانب وائٹ ہاؤس نے تاحال اس ووٹنگ پر کوئی تفصیلی ردعمل جاری نہیں کیا، تاہم سیاسی حلقوں میں اس نتیجے کو صدر ٹرمپ کے لیے وقتی کامیابی قرار دیا جا رہا ہے۔

‎واٹس ایپ نے اپنے صارفین کے لیے ایک نیا اور منفرد فیچر متعارف کرانے کا اعلان کیا ہے، جس کے ذریعے اب میٹا اے آئی کے ساتھ مکمل پرائیویٹ چیٹنگ ممکن ہو سکے گی۔
‎کمپنی کی جانب سے متعارف کرائے گئے اس نئے فیچر کا نام “Incognito Chats with Meta AI” رکھا گیا ہے۔ یہ فیچر گوگل کروم کے انکوگینٹو موڈ کی طرز پر کام کرے گا، جہاں چیٹس زیادہ محفوظ اور نجی انداز میں کی جا سکیں گی۔
‎واٹس ایپ کے مطابق اس فیچر کے ذریعے صارفین میٹا اے آئی چیٹ بوٹ سے ایسی گفتگو کر سکیں گے جس تک کسی اور کی رسائی نہیں ہوگی، حتیٰ کہ میٹا کمپنی خود بھی ان چیٹس کو نہیں پڑھ سکے گی۔
‎کمپنی نے واضح کیا ہے کہ یہ خصوصی انکوگینٹو موڈ صرف میٹا اے آئی کے لیے دستیاب ہوگا۔ واٹس ایپ میں موجود دیگر اے آئی چیٹ بوٹس کے لیے یہ سہولت فراہم نہیں کی جائے گی، اور ان کے پیغامات متعلقہ کمپنیاں دیکھ سکیں گی۔
‎میٹا کے مطابق انکوگینٹو چیٹس کو ایک محفوظ “پرائیویٹ پراسیسنگ” ماحول میں پراسیس کیا جائے گا تاکہ صارفین کی معلومات مکمل طور پر محفوظ رہیں۔
‎اس فیچر کی ایک اہم خاصیت یہ بھی ہوگی کہ تمام پیغامات بائی ڈیفالٹ خودکار طور پر غائب ہو جائیں گے، جس سے صارفین کی پرائیویسی مزید مضبوط ہو جائے گی۔
‎کمپنی نے بتایا کہ اس فیچر کی مرحلہ وار فراہمی شروع کر دی گئی ہے اور آنے والے دنوں میں دنیا بھر کے صارفین کو دستیاب ہوگی۔
‎اس کے علاوہ واٹس ایپ نے اعلان کیا ہے کہ اگلے مرحلے میں “Side Chat Protected by Private Processing” نامی ایک اور فیچر بھی متعارف کرایا جائے گا۔ اس فیچر کے ذریعے صارفین ہر چیٹ کو الگ سے انکوگینٹو موڈ میں استعمال کر سکیں گے جبکہ مرکزی چیٹ محفوظ اور متاثر ہوئے بغیر کام کرتی رہے گی۔
‎ٹیکنالوجی ماہرین کے مطابق واٹس ایپ کا یہ اقدام صارفین کی پرائیویسی کے حوالے سے ایک بڑی پیش رفت سمجھا جا رہا ہے، خاص طور پر ایسے وقت میں جب اے آئی چیٹس اور ڈیجیٹل سکیورٹی عالمی سطح پر اہم موضوع بن چکے ہیں۔

‎لبنان میں اسرائیلی حملوں کا سلسلہ جاری ہے، جہاں جنوبی لبنان پر تازہ فضائی حملوں میں 4 خواتین سمیت کم از کم 9 افراد زخمی ہو گئے ہیں۔
‎لبنانی سرکاری خبر ایجنسی کے مطابق اسرائیلی فوج نے جنوبی لبنان کے مختلف علاقوں کو نشانہ بنایا، جس کے بعد متعدد افراد زخمی ہوئے جبکہ متاثرہ علاقوں میں خوف و ہراس پھیل گیا۔ زخمیوں کو فوری طور پر قریبی اسپتالوں میں منتقل کر دیا گیا جہاں بعض کی حالت تشویشناک بتائی جا رہی ہے۔
‎رپورٹس کے مطابق اسرائیلی حملوں کے باعث جنوبی لبنان میں سکیورٹی صورتحال مزید خراب ہو گئی ہے جبکہ شہری آبادی شدید دباؤ اور خوف کا شکار ہے۔
‎خبر ایجنسی نے بتایا کہ گزشتہ روز بھی بیروت سمیت جنوبی لبنان کے مختلف علاقوں پر حملے کیے گئے تھے جن میں 8 بچوں سمیت مجموعی طور پر 22 افراد جاں بحق ہوئے تھے۔ ان حملوں کے بعد خطے میں کشیدگی میں مزید اضافہ دیکھنے میں آ رہا ہے۔
‎لبنانی حکام کا کہنا ہے کہ مسلسل فضائی حملوں سے رہائشی علاقوں، بنیادی ڈھانچے اور انسانی جانوں کو شدید نقصان پہنچ رہا ہے۔ امدادی اداروں نے خبردار کیا ہے کہ اگر صورتحال یہی رہی تو انسانی بحران مزید سنگین ہو سکتا ہے۔
‎دوسری جانب اسرائیلی فوج کی جانب سے حالیہ حملوں پر فوری طور پر کوئی تفصیلی مؤقف سامنے نہیں آیا، تاہم خطے میں جاری کشیدگی عالمی سطح پر تشویش کا باعث بنی ہوئی ہے۔
‎سیاسی تجزیہ کاروں کے مطابق مشرق وسطیٰ میں بڑھتے حملے پورے خطے کے امن اور استحکام کے لیے خطرہ بنتے جا رہے ہیں، جبکہ عالمی برادری مسلسل جنگ بندی اور مذاکرات پر زور دے رہی ہے۔

‎امریکی صدر ڈونلڈ ٹرمپ نے کہا ہے کہ چین آبنائے ہرمز کو کھلا رکھنے میں گہری دلچسپی رکھتا ہے اور چینی قیادت نے اس حوالے سے مدد کی پیشکش بھی کی ہے۔
‎فاکس نیوز کو دیے گئے انٹرویو میں صدر ٹرمپ نے کہا کہ چینی صدر شی جن پنگ چاہتے ہیں کہ آبنائے ہرمز میں تجارتی سرگرمیاں بغیر رکاوٹ جاری رہیں کیونکہ یہ عالمی تجارت اور توانائی سپلائی کے لیے نہایت اہم راستہ ہے۔
‎صدر ٹرمپ نے کہا کہ صدر شی جن پنگ نے آبنائے ہرمز کے معاملے پر تعاون کی پیشکش کی ہے اور دونوں ممالک مستقبل میں اس حوالے سے مل کر کام کر سکتے ہیں۔
‎بیجنگ پہنچنے پر شاندار استقبال پر ٹرمپ نے چینی قیادت کا شکریہ ادا کیا اور صدر شی جن پنگ کو “دنیا کے عظیم رہنماؤں” میں شمار کیا۔ انہوں نے کہا کہ امریکا چین کے ساتھ تجارت بڑھانا چاہتا ہے اور مستقبل میں دونوں ممالک کے تعلقات مزید مضبوط ہوں گے۔
‎ٹرمپ نے کہا کہ ان کے اور شی جن پنگ کے تعلقات ہمیشہ شاندار رہے ہیں اور اس ملاقات کا سب سے اہم محور باہمی تجارت ہوگا۔ ان کے مطابق امریکا اور چین کے درمیان بہتر تعلقات عالمی معیشت کے لیے بھی فائدہ مند ثابت ہوں گے۔
‎امریکی صدر نے تقریب کے دوران چینی بچوں اور فوج کے حوالے سے دلچسپ تبصرہ کرتے ہوئے کہا کہ وہ خاص طور پر چینی بچوں سے بہت متاثر ہوئے۔ ان کا کہنا تھا کہ “وہ خوش اور خوبصورت تھے، فوج تو بس ٹھیک تھی، مگر بچے حیرت انگیز تھے۔”
‎ٹرمپ نے کہا کہ چین کے لیے ان کے دل میں بہت احترام ہے اور وہ سمجھتے ہیں کہ صدر شی جن پنگ نے اپنے ملک کے لیے اچھا کام کیا ہے۔ انہوں نے کہا کہ “ہم دونوں کا ایک ساتھ شاندار مستقبل ہے اور اب ہمیں اپنی توجہ تجارت پر مرکوز کرنا ہوگی۔”