Author: Aqsa Younas Rana

‎کینیڈا کے شہر ٹورنٹو میں لاطینی ثقافت کے سب سے بڑے اسٹریٹ فیسٹیول "سالسا آن سینٹ کلیئر” کے دوران فائرنگ کے تبادلے میں دو افراد ہلاک جبکہ چار افراد شدید زخمی ہو گئے۔ واقعے کے بعد میلے میں بھگدڑ مچ گئی اور ہزاروں افراد اپنی جان بچانے کے لیے مختلف سمتوں میں بھاگ نکلے۔
‎ٹورنٹو پولیس کے ڈپٹی چیف فرینک باریڈو کے مطابق ہفتہ کی شب تقریباً 13 ہزار افراد میلے میں موجود تھے کہ اسی دوران کم از کم دو مسلح افراد نے ایک دوسرے پر فائرنگ شروع کر دی۔ فائرنگ کی زد میں آ کر مجموعی طور پر چھ افراد گولیوں کا نشانہ بنے۔
‎پولیس کے مطابق جاں بحق ہونے والے دونوں افراد مرد تھے، جبکہ چار زخمیوں کو تشویشناک حالت میں اسپتال منتقل کیا گیا ہے جہاں ان کا علاج جاری ہے۔
‎ابتدائی تحقیقات سے معلوم ہوا ہے کہ فائرنگ کا واقعہ دو افراد کے درمیان تصادم کا نتیجہ تھا، تاہم اندھا دھند گولیاں چلنے کے باعث ہزاروں شہری خطرے میں آ گئے۔ پولیس کا کہنا ہے کہ حملہ آور ایک دوسرے کو نشانہ بنا رہے تھے، لیکن ہجوم میں موجود عام افراد بھی اس کی لپیٹ میں آ گئے۔
‎حکام نے جائے وقوعہ کے تین مختلف مقامات کو کرائم سین قرار دے کر گھیرے میں لے لیا ہے اور وہاں سے دو آتشیں اسلحے بھی برآمد کیے گئے ہیں۔ پولیس کا کہنا ہے کہ واقعے میں ملوث متعدد مشتبہ افراد اب بھی فرار ہیں اور ان کی تلاش جاری ہے۔
‎عینی شاہدین کے مطابق فائرنگ شروع ہوتے ہی میلے میں شدید افراتفری پھیل گئی، لوگ چیختے ہوئے محفوظ مقامات کی جانب دوڑنے لگے جبکہ پولیس، ایمبولینسوں اور دیگر ہنگامی گاڑیوں نے فوری طور پر علاقے کا رخ کیا۔
‎ٹورنٹو پولیس نے کہا ہے کہ اس وقت عوام کے لیے کسی مزید خطرے کی اطلاع نہیں، تاہم واقعے کی مکمل تحقیقات جاری ہیں اور ملزمان کی گرفتاری کے لیے مختلف پہلوؤں سے شواہد اکٹھے کیے جا رہے ہیں۔

بھارت کی ریاست مہاراشٹر کے شہر پونے میں ایک افسوسناک حادثے میں کچرے کا بڑا ڈھیر انتظامی عمارت پر گرنے سے کم از کم آٹھ افراد ہلاک جبکہ متعدد زخمی ہو گئے۔ واقعے کے بعد امدادی ٹیموں نے فوری طور پر ریسکیو آپریشن شروع کر دیا۔
‎بھارتی میڈیا کے مطابق حادثہ پمپری چنچواڑ میونسپل کارپوریشن کے زیر انتظام موشی گاربیج ڈپو میں پیش آیا، جہاں توانائی پیدا کرنے کے منصوبے کے لیے جمع کیا گیا کچرا اچانک کھسک کر قریبی انتظامی عمارت پر آ گرا۔
‎ابتدائی اطلاعات کے مطابق حادثے کے وقت مجموعی طور پر 23 افراد ملبے اور کچرے تلے دب گئے تھے۔ ان میں سے 22 افراد عمارت کے اندر جبکہ ایک شخص باہر موجود تھا۔ خوش قسمتی سے پانچ افراد ابتدائی لمحوں میں ہی خود کو محفوظ مقام تک پہنچانے میں کامیاب ہو گئے، جبکہ دیگر کو نکالنے کے لیے بڑے پیمانے پر امدادی کارروائیاں کی گئیں۔
‎واقعے کی اطلاع ملتے ہی مقامی انتظامیہ، فائر بریگیڈ، ڈیزاسٹر مینجمنٹ ٹیموں اور بھارتی فوج نے مشترکہ طور پر ریسکیو آپریشن شروع کیا۔ بھاری مشینری کی مدد سے کچرے کے بڑے ڈھیر کو ہٹا کر متاثرین تک رسائی حاصل کی گئی۔
‎حکام کے مطابق اب تک آٹھ افراد کی ہلاکت کی تصدیق ہو چکی ہے جبکہ ایک شخص تاحال لاپتا ہے، جس کی تلاش کے لیے سرچ آپریشن جاری ہے۔ حادثے کے باعث انتظامی عمارت کو بھی شدید نقصان پہنچا ہے۔
‎واقعے کے بعد حکام نے حادثے کی وجوہات جاننے کے لیے تحقیقات شروع کر دی ہیں۔ ماہرین کا کہنا ہے کہ شہری کچرے کو محفوظ انداز میں ذخیرہ کرنا اور ویسٹ مینجمنٹ کے منصوبوں کی مسلسل نگرانی ایسے حادثات سے بچنے کے لیے ناگزیر ہے۔

‎مشرقِ وسطیٰ میں ایران اور امریکا کے درمیان بڑھتی کشیدگی کے باعث خطے کی صورتحال بدستور غیر یقینی کا شکار ہے، جبکہ مختلف ممالک کی جانب سے بیانات، جوابی اقدامات اور سفارتی رابطوں کا سلسلہ جاری ہے۔
‎سعودی عرب، عمان، کویت اور لبنان نے ایران کی جانب سے خطے کے ممالک کو نشانہ بنانے کے واقعات کی مذمت کرتے ہوئے تمام فریقین پر زور دیا ہے کہ وہ تحمل کا مظاہرہ کریں اور ایسے اقدامات سے گریز کریں جو خطے میں مزید عدم استحکام کا سبب بن سکتے ہیں۔
‎پاکستان کے نائب وزیراعظم اور وزیر خارجہ اسحاق ڈار نے کہا ہے کہ مفاہمتی یادداشت کی روح کے مطابق تمام فریق کشیدگی میں کمی لانے، تحمل کا راستہ اختیار کرنے اور مذاکرات کے ذریعے مسائل کے حل کی جانب بڑھیں تاکہ خطے میں امن برقرار رکھا جا سکے۔
‎ادھر ایران کی پاسدارانِ انقلاب نے دعویٰ کیا ہے کہ عمان میں امریکی طیارہ بردار جہازوں کے لاجسٹک سپورٹ مراکز اور قطر میں واقع العدید ایئر بیس کو نشانہ بنایا گیا۔ دوسری جانب امریکی حکام کی جانب سے ان دعوؤں پر باضابطہ مؤقف سامنے آنا باقی ہے۔
‎ایرانی پارلیمنٹ کے اسپیکر محمد باقر قالیباف نے کہا ہے کہ یکطرفہ معاہدوں کا دور ختم ہو چکا ہے۔ ان کا کہنا تھا کہ امریکا کو کسی بھی معاہدے کی تمام شقوں پر مکمل عمل درآمد کرنا ہوگا، بصورت دیگر اعتماد کی فضا قائم نہیں ہو سکے گی۔
‎امریکی سینٹرل کمانڈ نے اعلان کیا کہ ایران کے خلاف فوجی کارروائی کے تیسرے مرحلے میں 140 فوجی اہداف کو نشانہ بنایا گیا۔ دوسری جانب ایران نے دعویٰ کیا ہے کہ اس نے اردن میں پرنس حسن ایئر بیس پر قائم کمانڈ اینڈ کنٹرول سینٹر کو نشانہ بنایا ہے، تاہم اس دعوے کی آزاد ذرائع سے تصدیق نہیں ہو سکی۔
‎متحدہ عرب امارات نے کہا ہے کہ اس کا فضائی دفاعی نظام ایران کی جانب سے آنے والے میزائلوں کو روکنے کے لیے متحرک ہے، جبکہ امریکی حملوں کے کچھ ہی دیر بعد بحرین اور قطر میں دھماکوں کی اطلاعات بھی سامنے آئیں، جن کے بعد خطے میں سکیورٹی الرٹ مزید سخت کر دیا گیا۔
‎اسرائیلی وزیر دفاع نے دعویٰ کیا ہے کہ لبنان سے نقل مکانی کرنے والے تقریباً دو لاکھ افراد کی جلد واپسی ممکن نہیں ہوگی، جبکہ ایران نے خبردار کیا ہے کہ اگر امریکا نے مفاہمتی یادداشت کے تحت کیے گئے وعدوں پر عمل نہ کیا تو وہ بھی اس معاہدے پر عمل درآمد جاری نہیں رکھے گا۔