پاکستان پیپلز پارٹی پارلیمنٹرینز کی مرکزی ترجمان شازیہ مری نے دریائے سندھ کے تحفظ کے لیے ملک بھر میں جاری عوامی احتجاج کو قومی شعور کی عکاسی قرار دیتے ہوئے کہا ہے کہ پاکستانی عوام نے واضح پیغام دیا ہے کہ دریائے سندھ پر کسی قسم کا سمجھوتہ قبول نہیں کیا جائے گا۔
اپنے بیان میں شازیہ مری نے کہا کہ ملک کے مختلف شہروں میں عوام کی بھرپور شرکت اس بات کا ثبوت ہے کہ پاکستان کے آبی حقوق کے تحفظ کے لیے پوری قوم ایک آواز بن چکی ہے۔ ان کا کہنا تھا کہ دریائے سندھ صرف ایک دریا نہیں بلکہ پاکستان کی بقا، معیشت، زراعت اور آنے والی نسلوں کے مستقبل کی ضمانت ہے، اس لیے اس کے تحفظ پر کوئی سمجھوتہ ممکن نہیں۔
انہوں نے کہا کہ آج کے احتجاج نے یہ ثابت کر دیا ہے کہ پانی کے معاملے پر ہر پاکستانی متحد ہے۔ شازیہ مری نے کہا کہ "مرسوں مرسوں سندھو نہ ڈیسوں” صرف ایک نعرہ نہیں بلکہ قومی عزم اور عوامی احساسات کی ترجمانی ہے، جبکہ آبی حقوق کا تحفظ ہر سیاسی اختلاف سے بالاتر ایک قومی مقصد ہے۔
شازیہ مری نے بھارت پر زور دیا کہ وہ پانی کو سیاسی دباؤ یا ہتھیار کے طور پر استعمال کرنے کے بجائے بین الاقوامی معاہدوں، خصوصاً سندھ طاس معاہدے، کی مکمل پاسداری کرے۔ انہوں نے کہا کہ مودی حکومت یکطرفہ اقدامات سے گریز کرے اور مذاکرات، بین الاقوامی قانون اور طے شدہ معاہدوں کے مطابق آگے بڑھے کیونکہ دریاؤں سے متعلق معاہدوں کا احترام ہی خطے میں امن اور استحکام کی بنیاد ہے۔
انہوں نے عالمی برادری سے مطالبہ کیا کہ وہ سندھ طاس معاہدے کے مکمل اور مؤثر نفاذ کو یقینی بنانے کے لیے اپنا کردار ادا کرے تاکہ خطے میں آبی تنازعات کو مزید سنگین ہونے سے روکا جا سکے۔
شازیہ مری کا کہنا تھا کہ آبی سلامتی پاکستان کی قومی سلامتی کا لازمی حصہ ہے اور پاکستان قانون، سفارت کاری اور قومی اتحاد کے ذریعے اپنے آبی حقوق کا ہر قیمت پر دفاع کرے گا۔
انہوں نے مزید کہا کہ دریائے سندھ کے تحفظ کے لیے عوامی آواز پہلے سے کہیں زیادہ مضبوط ہو چکی ہے اور پاکستان پیپلز پارٹی چیئرمین بلاول بھٹو زرداری کی قیادت میں دریائے سندھ اور قومی آبی حقوق کے تحفظ کی جدوجہد جاری رکھے گی۔
دریائے سندھ پر کوئی سمجھوتہ قبول نہیں، پوری قوم آبی حقوق کے تحفظ کے لیے متحد ہے: شازیہ مری
