Author: Aqsa Younas Rana

‎امریکی صدر ڈونلڈ ٹرمپ نے نیٹو کے سربراہی اجلاس کے لیے انقرہ پہنچنے کے بعد اتحاد کی کارکردگی پر مایوسی کا اظہار کرتے ہوئے کہا ہے کہ وہ نیٹو سے "بہت زیادہ مایوس” ہیں۔
‎ترک صدر رجب طیب ایردوان کے ساتھ ملاقات کے موقع پر صحافیوں سے گفتگو کرتے ہوئے ٹرمپ نے کہا کہ نیٹو کے رکن ممالک کی جانب سے دفاعی اخراجات میں پیش رفت کے بارے میں ابھی دیکھنا ہوگا کہ کیا نتائج سامنے آتے ہیں۔
‎انہوں نے کہا، "میں نیٹو سے بہت مایوس تھا۔ سچ کہوں تو اگر یہ اجلاس ترکیہ میں نہ ہوتا، جہاں میرے دوست ایک مضبوط رہنما ہیں، تو ممکن ہے کہ میں اس میں شرکت ہی نہ کرتا۔”
‎صدر ٹرمپ نے ترکیہ کی میزبانی کو سراہتے ہوئے کہا کہ نیٹو کا اجلاس ترکیہ میں منعقد ہونا ایک اہم پیش رفت ہے اور اس کی خاص اہمیت ہے۔
‎انہوں نے ایران سے متعلق حالیہ امریکی کارروائی کا حوالہ دیتے ہوئے دعویٰ کیا کہ "ہمیں اس معاملے میں اچھا برتاؤ نہیں ملا کیونکہ ہم نے ایران میں کارروائی کی۔”
‎ٹرمپ نے مزید کہا، "ہمیں کسی کی مدد کی ضرورت نہیں، بلکہ میں نے تو کسی کی مدد چاہی ہی نہیں۔”
‎صدر ٹرمپ کے ان ریمارکس کو نیٹو اتحاد کے اندر دفاعی اخراجات، رکن ممالک کے کردار اور حالیہ علاقائی تنازعات پر جاری اختلافات کے تناظر میں اہم قرار دیا جا رہا ہے۔

‎پاکستان، 07 جولائی، 2026: ٹک ٹاک (TikTok)نے 2026 کی پہلی سہ ماہی کی اپنی کمیونٹی گائیڈ لائنز پر عمل درآمد رپورٹ جاری کر دی ہے، جس میں عالمی صارفین کے لیے محفوظ اور خوش آئند ماحول برقرار رکھنے کے عزم کا اعادہ کیا گیا ہے۔ جنوری سے مارچ 2026 کے عرصے پر مشتمل اس رپورٹ میں اس بات کو اجاگر کیا گیا ہے کہ پلیٹ فارم نے کمیونٹی گائیڈ لائنز کی خلاف ورزی کرنے والے مواد کی پیشگی نشاندہی اور بروقت حذف کرنے کی اپنی کوششیں بدستور جاری رکھیں، تاکہ دنیا بھر کے صارفین کو زیادہ محفوظ تجربہ فراہم کیا جا سکے۔
ٹک ٹاک نے 2026 کی پہلی سہ ماہی کے دوران پاکستان میں اپنی کمیونٹی گائیڈ لائنز کی خلاف ورزی پر مشتمل 22,535,523 ویڈیوز حذف کیں، جو اس عرصے کے دوران پوسٹ کی گئی مجموعی ویڈیوز کا 0.8 فیصد تھیں۔ ان میں سے 99.6 فیصد ویڈیوز کی پیشگی بنیادوں پر نشاندہی کر کے انہیں حذف کر دیا گیا، جبکہ 95.5 فیصد ویڈیوز کو پوسٹ کیے جانے کے 24 گھنٹوں کے اندر پلیٹ فارم سے ہٹا دیا گیا۔ مزید جائزے کے بعد 690,557 ویڈیوز کو بحال بھی کر دیا گیا۔
عالمی سطح پر ٹک ٹاک نے سہ ماہی کے دوران 184 ملین (184,012,576) ویڈیوز حذف کیں، جو پلیٹ فارم پر اپ لوڈ کیے گئے مجموعی کنٹنٹ کا تقریباً 0.5 فیصد بنتا ہے۔ ان میں سے 178,014,154 ویڈیوز کی نشاندہی خودکار نظام کے ذریعے کی گئی اور انہیں حذف کر دیا گیا، جبکہ مزید جائزے کے بعد 8,838,710 ویڈیوز کو بحال کر دیا گیا۔ پلیٹ فارم نے 99.3 فیصد کی پیشگی بنیادوں پر کنٹنٹ ہٹانے کی شرح برقرار رکھی، جبکہ خلاف ورزی پر مبنی 94.4 فیصد کنٹنٹ کو اپ لوڈ کیے جانے کے 24 گھنٹوں کے اندر حذف کر دیا گیا
پلیٹ فارم کی شفافیت اور سالمیت کو برقرار رکھنے کی مسلسل کوششوں کے تحت ٹک ٹاک نے رپورٹنگ کے عرصے کے دوران 86,288,705جعلی اکاؤنٹس بھی حذف کیے جبکہ مزید 25,764,372 ایسے اکاؤنٹس کو بھی حذف کیا جن کے بارے میں شبہ تھا کہ وہ 13 سال سے کم عمر صارفین سے تعلق رکھتے ہیں۔
رپورٹ میں مزید بتایا گیا ہے کہ حذف کی گئی ویڈیوز میں سے 18.6 فیصد میں ایسے حساس یا بالغ نوعیت کے موضوعات شامل تھے جوٹک ٹاک کی کنٹنٹ کے بارے پالیسیوں سے مطابقت نہیں رکھتے تھے۔ اسی دوران 12.6 فیصد ویڈیوز پلیٹ فارم کے تحفظ اور شائستگی سے متعلق پالیسیوں کی خلاف ورزی پر حذف کی گئیں، 1.اسی طرح 16.5 فیصد ویڈیوز خطرناک سرگرمیوں اور چیلنجز پر مشتمل تھیں، جبکہ 12.9 فیصد میں جسمانی نمائش اور جنسی نوعیت کے رویے شامل تھے۔ علاوہ ازیں، 2.1 فیصد ویڈیوز کو ترمیم شدہ میڈیا یا مصنوعی ذہانت (اے آئی) سے تیار کردہ کنٹنٹ کے طور پر نشان زد کیا گیا۔
کمیونٹی گائیڈ لائنز پر عمل درآمد کی سہ ماہی رپورٹ کا اجرا ٹک ٹاک کے شفافیت کے عزم کی عکاسی کرتا ہے، جس کے ذریعے پلیٹ فارم پر کنٹنٹ کی نگرانی، جائزے اور پالیسیوں کے نفاذ سے متعلق اقدامات کے حجم اور نوعیت کے بارے میں معلومات فراہم کی جاتی ہیں۔2026 کی پہلی سہ ماہی کی کمیونٹی گائیڈ لائنز پر عمل درآمد رپورٹ،ٹک ٹاک کی کمیونٹی گائیڈ لائنز، حفاظتی ٹولز اور پالیسیوں کے بارے میں مزید معلومات ٹک ٹاک ٹرانسپیرنسی سینٹر پر ملاحظہ کیجیے جو انگریزی اور اردو دونوں زبانوں میں دستیاب ہے۔

برطانیہ کے شہر ایڈنبرا میں علیحدگی اختیار کرنے والی بیوی پر چاقو سے قاتلانہ حملہ کرنے والے شخص نے عدالت میں اپنے جرم کا اعتراف کر لیا۔
‎26 سالہ اوسارینکھو اٹیوٹی نے 11 نومبر 2025 کو ایڈنبرا کے علاقے لیتھ کی ڈیوک اسٹریٹ پر اپنی اہلیہ وکٹری اٹیوٹی پر اس وقت حملہ کیا جب وہ اپنی کمسن بیٹی کو بے بی بگی میں بٹھا کر ڈاکٹر کے پاس جا رہی تھیں۔
‎عدالتی کارروائی کے مطابق ملزم نے خاتون پر سر اور جسم کے مختلف حصوں پر بار بار چاقو سے حملہ کیا، جس کے نتیجے میں انہیں مجموعی طور پر 12 شدید زخم آئے۔ حملے کے باعث ان کے چہرے پر مستقل نشانات پڑ گئے جبکہ ان کا ایک پھیپھڑا بھی متاثر ہوا۔
‎ایڈنبرا کی ہائی کورٹ کو بتایا گیا کہ حملہ اس وقت رکا جب تین راہگیروں نے فوری مداخلت کرتے ہوئے خاتون کو بچایا اور ملزم کو قابو کر لیا، جس کے بعد پولیس نے اسے گرفتار کر لیا۔
‎عدالت میں سماعت کے دوران ملزم نے اقدامِ قتل کے الزام کا اعتراف کر لیا۔ استغاثہ کے مطابق حملے کے دوران وہ خاتون کو مسلسل دھمکیاں دیتا رہا، انہیں اپنے ساتھ چلنے کا حکم دیا، زمین پر گرا کر ان کا سر پکڑا اور بار بار چاقو کے وار کیے، جس سے ان کی جان کو شدید خطرہ لاحق ہو گیا۔
‎سماعت کے دوران جج لارڈ کیوبی نے ملزم سے کہا کہ یہ نہایت سنگین جرم ہے، جس کے متاثرہ خاتون کی زندگی پر دیرپا اثرات مرتب ہوئے ہیں۔ انہوں نے کہا کہ خاتون کو شدید جسمانی چوٹیں آئیں، چہرے پر مستقل داغ رہ گئے اور وہ گہرے ذہنی صدمے سے بھی دوچار ہوئیں۔
‎عدالت کی جانب سے ملزم کو بعد کی سماعت میں سزا سنائی جائے گی۔

‎موناکو میں یوکرینی کاروباری شخصیت پر ہونے والے بم حملے کی مرکزی مشتبہ ملزمہ یوکرین میں مردہ پائی گئی، جس کے بعد یوکرینی حکام نے قتل کے الزام میں دو افراد کو گرفتار کر لیا ہے۔
‎انٹرپول نے اس سے قبل 39 سالہ اناستاسیا بیریزووسکا کو بم حملے کی مشتبہ ملزمہ قرار دیا تھا۔ وہ یوکرین میں پیدا ہوئی تھیں اور حالیہ عرصے میں جرمنی میں مقیم تھیں۔
‎یوکرینی پولیس اور پراسیکیوٹر آفس کے مطابق بیریزووسکا کی لاش سر میں گولیوں کے زخموں کے ساتھ برآمد ہوئی، جبکہ جائے وقوعہ سے پستول کے خول بھی ملے ہیں، جس سے واقعے کو قتل قرار دیا جا رہا ہے۔
‎حکام کے مطابق قتل کے الزام میں دو افراد کو گرفتار کیا گیا ہے، جن پر پیشگی منصوبہ بندی کے تحت واردات انجام دینے کا شبہ ہے۔
‎پولیس نے بتایا کہ گرفتار ملزمان میں سے ایک یوکرین کی وزارتِ دفاع کے مرکزی انٹیلی جنس ڈائریکٹوریٹ کا حاضر سروس اہلکار ہے، جس نے دورانِ تفتیش بیریزووسکا کے قتل کا اعتراف کر لیا ہے۔
‎حکام کے مطابق اس ملزم نے یہ بھی دعویٰ کیا کہ دوسرا گرفتار شخص، جو سابق قانون نافذ کرنے والے ادارے کا اہلکار ہے، اس قتل میں اس کا ساتھی تھا۔
‎یوکرینی تفتیشی ادارے واقعے کے مختلف پہلوؤں کا جائزہ لے رہے ہیں تاکہ یہ معلوم کیا جا سکے کہ آیا اس قتل کا تعلق موناکو بم حملے سے ہے یا اس کے پس پردہ کوئی اور محرکات کارفرما تھے۔

‎تہران: ایران نے امریکا کو واضح پیغام دیتے ہوئے کہا ہے کہ دھمکیوں کے ماحول میں کسی حتمی معاہدے پر مذاکرات کا آغاز ممکن نہیں۔ یہ بیان امریکی صدر ڈونلڈ ٹرمپ کی حالیہ دھمکی آمیز گفتگو کے بعد سامنے آیا، جس میں انہوں نے کہا تھا کہ اگر ایران کے ساتھ معاہدہ نہ ہوا تو امریکا "اپنا کام مکمل کرے گا”۔
‎ایرانی وزیر خارجہ عباس عراقچی نے سماجی رابطے کی ویب سائٹ ایکس پر جاری اپنے بیان میں امریکی صدر کے ریمارکس پر ردعمل دیتے ہوئے کہا کہ اگر دھمکیوں کا سلسلہ جاری رہا تو حتمی معاہدے سے متعلق مذاکرات شروع نہیں کیے جائیں گے۔
‎عباس عراقچی نے اپنے پیغام میں امریکا پر زور دیا کہ وہ اپنے کیے گئے وعدوں کا احترام کرے۔ انہوں نے لکھا، "اگر دھمکیاں جاری رہیں تو حتمی معاہدے پر مذاکرات شروع نہیں ہوں گے، اپنے دستخط کی پاسداری کریں۔”
ایرانی وزیر خارجہ کا کہنا تھا کہ ایران کا مؤقف گزشتہ ماہ طے پانے والی ایران امریکا مفاہمتی یادداشت کے آرٹیکل 13 کے مطابق ہے، جس میں فریقین کے درمیان باہمی احترام اور طے شدہ اصولوں کی پاسداری پر زور دیا گیا تھا۔

‎امریکی صدر ڈونلڈ ٹرمپ کی جانب سے اٹلی کی وزیراعظم جارجیا میلونی سے متعلق ایک متنازع سوشل میڈیا پوسٹ نے عالمی سطح پر نئی بحث چھیڑ دی ہے۔ یہ پوسٹ ایسے وقت میں سامنے آئی ہے جب دونوں رہنما ترکی میں ہونے والے نیٹو سربراہی اجلاس میں شرکت کے لیے موجود ہیں، جس کے باعث سفارتی حلقوں میں بھی اس معاملے پر خاصی توجہ دی جا رہی ہے۔
‎میڈیا رپورٹس کے مطابق ڈونلڈ ٹرمپ نے اپنے سوشل میڈیا پلیٹ فارم پر ایک ترمیم شدہ تصویر شیئر کی، جس میں یہ تاثر دینے کی کوشش کی گئی کہ اطالوی وزیراعظم جارجیا میلونی ان میں غیر معمولی دلچسپی رکھتی ہیں۔ اس تصویر کے ساتھ ٹرمپ نے طنزیہ انداز میں لکھا، "مجھے دور رہنے کا حکم درکار ہے”۔
‎اس پوسٹ کے سامنے آنے کے بعد سوشل میڈیا پر صارفین کی جانب سے مختلف ردعمل دیکھنے میں آیا۔ بعض افراد نے اسے سیاسی مزاح قرار دیا، جبکہ متعدد صارفین، مبصرین اور سفارتی ماہرین نے اسے ایک اہم اتحادی ملک کی منتخب رہنما کے بارے میں غیر مناسب اور سفارتی آداب کے منافی قرار دیا۔
‎بین الاقوامی امور کے ماہرین کا کہنا ہے کہ ایسے حساس وقت میں اس نوعیت کی پوسٹ دونوں ممالک کے تعلقات پر غیر ضروری دباؤ ڈال سکتی ہے، خصوصاً جب نیٹو اتحاد کو یوکرین جنگ، یورپی سلامتی اور عالمی چیلنجز جیسے اہم معاملات پر مشترکہ حکمت عملی کی ضرورت ہے۔
‎سفارتی حلقوں کے مطابق ترکی میں ہونے والے نیٹو اجلاس کے دوران ڈونلڈ ٹرمپ اور جارجیا میلونی کی ملاقات پر بھی سب کی نظریں مرکوز ہیں۔ تجزیہ کاروں کا خیال ہے کہ اس متنازع پوسٹ کے بعد دونوں رہنماؤں کے درمیان ماحول پہلے کے مقابلے میں زیادہ محتاط اور سرد رہ سکتا ہے۔
‎اب تک اطالوی حکومت یا وزیراعظم جارجیا میلونی کی جانب سے اس پوسٹ پر کوئی باضابطہ ردعمل سامنے نہیں آیا، تاہم مبصرین کا کہنا ہے کہ اگر معاملہ مزید بڑھتا ہے تو اٹلی کی جانب سے سفارتی سطح پر وضاحت یا احتجاج بھی سامنے آ سکتا ہے۔