‎لاہور میں 766 غیر رجسٹرڈ نجی تعلیمی ادارے بند کرنے کا فیصلہ

‎لاہور: کاہنہ میں اسکول کی چھت گرنے کے افسوسناک واقعے کے بعد محکمہ تعلیم نے بچوں کی جانوں کے تحفظ کے لیے سخت اقدامات کا آغاز کرتے ہوئے لاہور بھر کے 766 غیر رجسٹرڈ نجی تعلیمی اداروں کو بند کرنے کا فیصلہ کر لیا ہے۔ ان اداروں میں بڑی تعداد ٹیوشن سینٹرز اور پرائمری اسکولوں کی ہے، جو بغیر رجسٹریشن اور مطلوبہ حفاظتی انتظامات کے کام کر رہے ہیں۔
‎محکمہ تعلیم کے ذرائع کے مطابق ضلع لاہور میں سیکڑوں نجی تعلیمی ادارے قانونی تقاضے پورے کیے بغیر سرگرم ہیں، جس کے باعث طلبہ کی حفاظت سے متعلق سنگین خدشات پیدا ہو رہے ہیں۔ حالیہ حادثے کے بعد ان اداروں کے خلاف کارروائی کا فیصلہ کیا گیا تاکہ مستقبل میں ایسے واقعات سے بچا جا سکے۔
‎اس مقصد کے لیے محکمہ تعلیم نے نجی تعلیمی اداروں کی عمارتوں، حفاظتی انتظامات اور بنیادی سہولیات کا جائزہ لینے کے لیے ایک اعلیٰ سطحی کمیٹی تشکیل دے دی ہے، جس کا باقاعدہ نوٹیفکیشن بھی جاری کر دیا گیا ہے۔
‎نوٹیفکیشن کے مطابق کمیٹی میں ڈپٹی ڈسٹرکٹ ایجوکیشن آفیسر، مختلف زونل افسران، پنجاب ایجوکیشن فاؤنڈیشن یا متعلقہ رجسٹریشن اتھارٹی (پیرا) کے نمائندے اور پلاننگ ڈیپارٹمنٹ کے انسپکٹرز شامل ہوں گے۔ یہ ٹیم لاہور کے تمام نجی تعلیمی اداروں کا دورہ کر کے عمارتوں کی مضبوطی، حفاظتی اقدامات، ایمرجنسی انتظامات اور دیگر بنیادی سہولیات کا تفصیلی جائزہ لے گی۔
‎محکمہ تعلیم نے کمیٹی کو ہدایت کی ہے کہ وہ پانچ روز کے اندر اپنی جامع رپورٹ پیش کرے، تاکہ اس کی روشنی میں فوری فیصلے کیے جا سکیں۔
‎حکام کے مطابق وہ تعلیمی ادارے جو قانونی تقاضے، حفاظتی معیارات یا عمارت کی فٹنس سے متعلق سرٹیفکیٹ فراہم نہیں کر سکیں گے، انہیں فوری طور پر سیل کر دیا جائے گا۔ ایسے اداروں کے مالکان کے خلاف قانونی کارروائی بھی عمل میں لائی جائے گی۔