چولپون آتا: صدر مملکت آصف علی زرداری کے اعزاز میں کرغزستان کے شہر چولپون آتا کے معروف "رخ اوردو” ثقافتی کمپلیکس میں باضابطہ استقبالیہ تقریب کا انعقاد کیا گیا، جہاں کرغزستان کے صدر سادیر جیاپاروف نے ان کا پرتپاک استقبال کیا۔
استقبالیہ تقریب میں دونوں ممالک کے قومی ترانے بجائے گئے، جبکہ صدر آصف علی زرداری کو کرغز افواج کے چاق و چوبند دستے نے گارڈ آف آنر پیش کیا۔صدر مملکت نے گارڈ آف آنر کا معائنہ کیا اور تقریب کے دوران دونوں ممالک کے سربراہان نے اپنے اپنے وفود کا ایک دوسرے سے تعارف بھی کرایا۔یہ تقریب پاکستان اور کرغزستان کے درمیان دوستانہ تعلقات، باہمی احترام اور دوطرفہ تعاون کے فروغ کی علامت قرار دی جا رہی ہے، جبکہ توقع کی جا رہی ہے کہ اس دورے کے دوران دونوں ممالک کے درمیان مختلف شعبوں میں تعاون بڑھانے کے حوالے سے اہم امور پر بھی تبادلہ خیال کیا جائے گا۔