شدید گرمی سے بجلی کا ترسیلی نظام متاثر ، غیر اعلانیہ لوڈشیڈنگ اور ٹرپنگ کا سلسلہ جاری

لاہور: پنجاب بھر میں جاری شدید گرمی کی لہر نے بجلی کے ترسیلی نظام کو بھی متاثر کر دیا ہے، جس کے باعث لیسکو ریجن کے مختلف علاقوں میں غیر اعلانیہ بجلی بندش، ٹرپنگ اور تکنیکی خرابیوں کی شکایات میں مسلسل اضافہ ہو رہا ہے۔

ذرائع کے مطابق بجلی کے نظام پر غیر معمولی لوڈ بڑھنے کے باعث متعدد ٹرانسفارمر جل گئے ہیں، جبکہ مختلف فیڈرز پر بار بار ٹرپنگ کے واقعات بھی رپورٹ ہو رہے ہیں۔ سسٹم اوور لوڈ ہونے کے باعث تکنیکی خرابیوں میں اضافہ دیکھنے میں آ رہا ہے، جس سے شہریوں کو شدید مشکلات کا سامنا ہے۔ذرائع کا کہنا ہے کہ ٹرانسفارمر خراب ہونے اور دیگر تکنیکی مسائل کے باعث کئی علاقوں میں بجلی کی آنکھ مچولی جاری ہے، جبکہ دیہی علاقوں میں تکنیکی خرابیوں کے سبب گھنٹوں بجلی کی فراہمی معطل رہنا معمول بن گیا ہے۔لاہور کے شالیمار، سلامت پورہ، گڑھی شاہو، بھٹہ چوک، کاہنہ، گجومتہ، داروغہ والا، عامر روڈ، باٹا پور، بھسین، شاہدرہ، امامیہ کالونی، ریلوے کالونی مغلپورہ اور غازی آباد سمیت متعدد علاقوں میں بجلی کی بار بار بندش سے شہری شدید پریشانی کا شکار ہیں۔ذرائع کے مطابق بعض علاقوں میں ٹرانسفارمر خراب ہونے کے باعث گزشتہ رات سے بجلی کی فراہمی مکمل طور پر معطل ہے، جبکہ متعلقہ عملہ خرابیوں کو دور کرنے میں مصروف ہے۔ شہریوں نے مطالبہ کیا ہے کہ شدید گرمی کے پیش نظر بجلی کی بلا تعطل فراہمی یقینی بنانے اور خراب ٹرانسفارمرز کی فوری تبدیلی کے لیے ہنگامی اقدامات کیے جائیں۔