پی آئی اے نے لاہور سے مانچسٹر کے لیے پانچ سال بعد براہِ راست دوطرفہ پروازوں کی بحالی کا اعلان کر دیا ہے، جس کے بعد یکم جولائی سے فضائی آپریشن دوبارہ شروع ہوگا۔
پی آئی اے حکام کے مطابق مانچسٹر سے لاہور کی پہلی پرواز یکم جولائی کو روانہ ہوگی، جبکہ لاہور سے مانچسٹر کی پہلی پرواز 2 جولائی کو آپریٹ کی جائے گی۔ کورونا وبا اور دیگر انتظامی وجوہات کے باعث یہ روٹ گزشتہ پانچ برس سے معطل تھا۔حکام کا کہنا ہے کہ مسافروں کی جانب سے اس روٹ میں غیرمعمولی دلچسپی دیکھنے میں آئی ہے، جس کے باعث 2 جولائی کو لاہور سے مانچسٹر روانہ ہونے والی پہلی پرواز کی تمام 310 نشستیں روانگی سے قبل ہی مکمل طور پر بک ہو چکی ہیں۔پی آئی اے کا کہنا ہے کہ لاہور اور مانچسٹر کے درمیان براہِ راست پروازوں کی بحالی سے برطانیہ میں مقیم پاکستانی کمیونٹی کو سفری سہولت میسر آئے گی، جبکہ دونوں شہروں کے درمیان سفر مزید آسان اور کم وقت میں ممکن ہو سکے گا۔