راولپنڈی: چیف آف آرمی اسٹاف اور چیف آف ڈیفنس فورسز فیلڈ مارشل سید عاصم منیر نے کہا ہے کہ بلوچستان میں پائیدار امن کے قیام کے لیے سیکیورٹی فورسز اور قانون نافذ کرنے والے اداروں کی کارروائیاں عوام کے تعاون سے کامیابی سے جاری رہیں گی، جبکہ دہشت گردی کے مکمل خاتمے تک آپریشنز پوری قوت سے جاری رکھے جائیں گے۔
پاک فوج کے شعبہ تعلقات عامہ (آئی ایس پی آر) کے مطابق جنرل ہیڈکوارٹرز راولپنڈی میں 20ویں نیشنل ورکشاپ بلوچستان کے شرکاء سے گفتگو کرتے ہوئے فیلڈ مارشل عاصم منیر نے کہا کہ فتنہ الخوارج اور فتنہ الہندوستان کے خلاف ہدفی کارروائیاں اس وقت تک جاری رہیں گی جب تک دہشت گردی اور اس کے سہولت کاروں کا مکمل خاتمہ نہیں ہو جاتا۔
انہوں نے اس عزم کا اعادہ کیا کہ پاکستان جہاں کہیں بھی دہشت گردوں کا انفراسٹرکچر ملک اور عوام کے لیے خطرہ بنے گا، اسے ختم کرنے کے لیے بھرپور اقدامات جاری رکھے گا۔
فیلڈ مارشل نے کہا کہ بیرونی سرپرستی میں سرگرم عناصر مسلسل بلوچستان میں بدامنی، عدم استحکام اور تشدد کو فروغ دینے کی کوشش کرتے رہے ہیں، تاہم مسلح افواج عوام کے اتحاد، حوصلے اور بھرپور تعاون کے ساتھ ان مذموم عزائم کو ناکام بنائیں گی۔
انہوں نے بلوچستان کو پاکستان کا فخر قرار دیتے ہوئے کہا کہ یہ صوبہ بے پناہ قدرتی وسائل سے مالا مال ہے، جبکہ یہاں کے محب وطن، باصلاحیت اور باہمت عوام اس کی سب سے بڑی طاقت ہیں۔
انہوں نے کہا کہ وفاقی اور صوبائی حکومتوں کی جانب سے بلوچستان کی سماجی و معاشی ترقی کے لیے مختلف منصوبوں پر کام جاری ہے، جن کا مقصد عوام دوست اور جامع ترقی کے ذریعے صوبے کو خوشحال بنانا ہے۔
فیلڈ مارشل عاصم منیر نے قومی یکجہتی کے فروغ میں سول سوسائٹی، تعلیمی اداروں، میڈیا اور نوجوانوں کے مثبت کردار کو سراہتے ہوئے کہا کہ ملک کو درپیش چیلنجز سے نمٹنے کے لیے قومی اتحاد، استقامت اور مشترکہ کوششیں ناگزیر ہیں۔
بلوچستان میں دہشت گردی کے خاتمے تک کارروائیاں جاری رہیں گی، فیلڈ مارشل عاصم منیر
