پنجاب میں مون سون کے شدید اسپیل نے تباہی مچا دی، جہاں بارشوں سے متعلق مختلف حادثات میں 21 افراد جاں بحق جبکہ 154 افراد زخمی ہو گئے۔ صوبائی ڈیزاسٹر مینجمنٹ اتھارٹی (پی ڈی ایم اے) کے مطابق مسلسل موسلا دھار بارشوں کے باعث مختلف اضلاع میں ہنگامی صورتحال پیدا ہوگئی ہے اور امدادی ادارے الرٹ ہیں۔
لاہور میں ایک ہی بارش کے اسپیل کے دوران 263 ملی میٹر بارش ریکارڈ کی گئی، جس کے بعد شہر کے متعدد علاقے زیر آب آ گئے۔ سڑکوں پر کئی کئی فٹ پانی جمع ہونے سے ٹریفک کا نظام بری طرح متاثر ہوا، اہم شاہراہوں پر گاڑیوں کی لمبی قطاریں لگ گئیں جبکہ متعدد موٹرسائیکلیں اور گاڑیاں پانی میں بند ہو گئیں۔
شہر کے پوش علاقے ڈیفنس میں صورتحال اس قدر سنگین ہو گئی کہ گلیوں اور سڑکوں پر کشتیاں چلتی دکھائی دیں۔ شہریوں کو گھروں سے نکلنے، دفاتر پہنچنے اور روزمرہ سرگرمیاں جاری رکھنے میں شدید مشکلات کا سامنا کرنا پڑا، جبکہ کئی نشیبی علاقوں میں پانی گھروں اور دکانوں میں بھی داخل ہوگیا۔
ترجمان واسا کے مطابق لاہور ائیرپورٹ کے علاقے میں سب سے زیادہ 263 ملی میٹر بارش ریکارڈ کی گئی۔ اس کے علاوہ تاجپورہ میں 157.4 ملی میٹر، کاہنہ میں 143 ملی میٹر، شادی پورہ میں 136 ملی میٹر، مغل پورہ میں 133 ملی میٹر، مال روڈ پر 116 ملی میٹر، مناواں میں 112.2 ملی میٹر، جوہر ٹاؤن میں 81 ملی میٹر اور چوک ناخدا میں 64.6 ملی میٹر بارش ہوئی۔
شدید بارش کے باعث کئی علاقوں میں بجلی کی فراہمی بھی متاثر ہوئی، جبکہ نشیبی علاقوں سے پانی نکالنے کے لیے واسا کی ٹیمیں ہیوی مشینری کے ساتھ متحرک رہیں۔ ضلعی انتظامیہ اور ریسکیو اداروں نے شہریوں سے غیر ضروری سفر سے گریز کرنے، نشیبی علاقوں اور کھلے مین ہولز سے دور رہنے کی اپیل کی ہے۔
پی ڈی ایم اے نے خبردار کیا ہے کہ آئندہ دنوں میں بھی مزید بارشوں کا امکان موجود ہے، جس کے پیش نظر تمام متعلقہ اداروں کو ہائی الرٹ رہنے کی ہدایت جاری کر دی گئی ہے۔ شہریوں کو بھی موسم کی صورتحال پر نظر رکھنے اور احتیاطی تدابیر اختیار کرنے کا مشورہ دیا گیا ہے تاکہ کسی بھی ممکنہ حادثے سے بچا جا سکے۔
پنجاب میں مون سون کی تباہ کاریاں، حادثات میں 21 افراد جاں بحق
