اسلام آباد: بلوچستان کے ضلع مستونگ میں سیکیورٹی فورسز نے خفیہ اطلاعات کی بنیاد پر کامیاب انٹیلی جنس بیسڈ آپریشن کرتے ہوئے 6 دہشت گردوں کو ہلاک جبکہ متعدد مشتبہ افراد کو گرفتار کر لیا۔
سیکیورٹی ذرائع کے مطابق کارروائی مستونگ کے علاقے کھڈ کوچہ میں کی گئی، جہاں دہشت گردوں کی موجودگی کی اطلاع پر فورسز نے بروقت آپریشن کیا۔ شدید مقابلے کے بعد 6 دہشت گرد مارے گئے جبکہ کئی افراد کو حراست میں لے لیا گیا۔
ذرائع کا کہنا ہے کہ گرفتار افراد میں ایک مبینہ سہولت کار کے علاوہ مرد اور خواتین خودکش بمبار بھی شامل ہیں، جن سے مزید تفتیش جاری ہے۔
آپریشن کے دوران دہشت گردوں کی متعدد کمین گاہیں مکمل طور پر تباہ کر دی گئیں، جبکہ وہاں سے بھاری مقدار میں اسلحہ، گولہ بارود اور دیگر جنگی سامان بھی برآمد کیا گیا۔
سیکیورٹی حکام کے مطابق حالیہ دنوں میں مستونگ کے علاقے کھڈ کوچہ میں دہشت گردوں کی سرگرمیوں کے بعد انٹیلی جنس بیسڈ کارروائیوں میں مزید تیزی لائی گئی ہے تاکہ علاقے میں امن و امان کو یقینی بنایا جا سکے۔
فورسز کی جانب سے متاثرہ علاقے میں سرچ اور کلیئرنس آپریشن جاری ہے، جبکہ تمام داخلی اور خارجی راستوں کی کڑی نگرانی بھی کی جا رہی ہے تاکہ فرار ہونے والے عناصر کو گرفتار کیا جا سکے۔
سیکیورٹی ذرائع نے اس عزم کا اعادہ کیا کہ دہشت گردی کے خاتمے اور ملک میں پائیدار امن کے قیام کے لیے کارروائیاں بلا تعطل جاری رہیں گی، اور دہشت گردوں کے سہولت کاروں کے خلاف بھی قانون کے مطابق سخت کارروائی کی جائے گی۔
مستونگ میں سیکیورٹی فورسز کا بڑا آپریشن، 6 دہشت گرد ہلاک، متعدد گرفتار
