Author: Aqsa Younas Rana

‎ایران اور امریکا کے درمیان حالیہ کشیدگی کے تناظر میں ایک امریکی ایف 15 فائٹر طیارے کے پائلٹ نے دعویٰ کیا ہے کہ ایرانی فضائی حدود میں نشانہ بننے سے قبل اس نے ایرانی ڈرونز کی ایک غیر معمولی اور جدید فارمیشن دیکھی، جسے اس نے "جیلی فش” سے تشبیہ دی۔
‎غیر ملکی میڈیا رپورٹس کے مطابق امریکی پائلٹ نے بتایا کہ فضاء میں ایک بڑا ڈرون موجود تھا جبکہ اس کے گرد متعدد چھوٹے ڈرون اس انداز میں پرواز کر رہے تھے کہ وہ جیلی فش کی ٹانگوں جیسے دکھائی دے رہے تھے۔ ان کے بقول ایسا محسوس ہو رہا تھا جیسے فضا میں ڈرونز پر مشتمل ایک بارودی سرنگ بچھا دی گئی ہو۔
‎رپورٹس کے مطابق امریکی ایف 15 طیارہ اپریل میں ایرانی فضائی حدود میں گر کر تباہ ہو گیا تھا۔ حادثے کے وقت طیارے میں موجود دونوں پائلٹ ایجیکٹ کرنے میں کامیاب رہے تھے، جنہیں بعد ازاں امریکی اسپیشل فورسز نے خصوصی آپریشن کے ذریعے بحفاظت نکال لیا تھا۔
‎پائلٹ کے اس بیان کے بعد امریکی دفاعی حلقوں میں تشویش پائی جا رہی ہے۔ دفاعی ماہرین کا کہنا ہے کہ اگر یہ دعویٰ درست ثابت ہوتا ہے تو یہ ایران کی ڈرون ٹیکنالوجی اور فضائی جنگی حکمت عملی میں نمایاں پیش رفت کی نشاندہی کرتا ہے۔
‎کچھ ماہرین کا خیال ہے کہ ایران نے اپنی ڈرون صلاحیتوں کو بہتر بنانے کے لیے جدید ٹیکنالوجی اور بیرونی تعاون سے فائدہ اٹھایا ہے، تاہم اس حوالے سے کسی سرکاری ادارے نے باضابطہ تصدیق نہیں کی۔
‎اب تک امریکی یا ایرانی حکام کی جانب سے پائلٹ کے ان دعوؤں پر کوئی باضابطہ ردعمل سامنے نہیں آیا، جبکہ دفاعی ماہرین اس معاملے کو مزید تحقیق اور تصدیق کا متقاضی قرار دے رہے ہیں۔

‎چین کے ایک چڑیا گھر نے ایک منفرد ملازمت کا اشتہار جاری کیا ہے، جس میں امیدوار کو سیاہ ریچھ کا لباس پہن کر سیاحوں کے سامنے ریچھ کا کردار ادا کرنا ہوگا۔ اس دلچسپ ملازمت کے بدلے سالانہ ایک لاکھ یوآن، یعنی پاکستانی کرنسی میں 41 لاکھ روپے سے زائدتنخواہ کی پیشکش کی گئی ہے۔
‎یہ ملازمت چین کے صوبہ ہینان کے شہر لووہے میں واقع لووہے وائلڈ لائف زو کی جانب سے پیش کی گئی ہے۔ اشتہار سوشل میڈیا پر وائرل ہونے کے بعد لوگوں کی بڑی تعداد نے اس میں دلچسپی ظاہر کی ہے۔
‎چڑیا گھر کی جانب سے جاری اشتہار کے مطابق امیدوار کی عمر کم از کم 18 سال ہونی چاہیے اور وہ جسمانی طور پر مکمل فٹ ہو۔ ملازمت کرنے والے افراد کو روزانہ 6 گھنٹے کام کرنا ہوگا جبکہ ہر ماہ چار دن کی چھٹی بھی دی جائے گی۔
‎اشتہار میں بتایا گیا ہے کہ ریچھ کا کردار ادا کرنے والے افراد کو سیاحوں سے بات کرنے کی اجازت نہیں ہوگی، تاہم وہ مختلف آوازیں نکال سکتے ہیں تاکہ حقیقی ریچھ کا تاثر برقرار رکھا جا سکے۔ انہیں چڑیا گھر آنے والے افراد سے کھانے پینے کی اشیا لینے کی بھی اجازت ہوگی۔
‎چڑیا گھر نے اشتہار میں دلچسپ انداز میں لکھا ہے کہ اگر ملازم تھک جائے تو وہ آرام سے لیٹ سکتا ہے، اور اگر توانائی محسوس کرے تو اچھل کود، رقص، درختوں پر چڑھنے یا مچھلیاں پکڑنے جیسی سرگرمیاں بھی انجام دے سکتا ہے تاکہ سیاحوں کو زیادہ دلچسپ تجربہ فراہم کیا جا سکے۔
‎اگرچہ یہ واضح نہیں کیا گیا کہ کتنے افراد کو ملازمت دی جائے گی، تاہم چڑیا گھر کے مطابق اب تک 100 سے زائد افراد اس منفرد نوکری کے لیے رابطہ کر چکے ہیں۔
‎چڑیا گھر کے ترجمان کا کہنا ہے کہ اگر اس کردار کو ادا کرنے والا شخص سوشل میڈیا پر مقبول ہو جائے تو وہ ایک لاکھ یوآن سالانہ سے بھی زیادہ آمدنی حاصل کر سکتا ہے، جبکہ اس سے چڑیا گھر میں آنے والے سیاحوں کی تعداد اور آمدنی میں بھی اضافہ متوقع ہے۔

‎ایف آئی ایچ پرو لیگ میں پاکستان اور بھارت کے درمیان ہاکی میچ کے آغاز سے قبل ایک بڑی انتظامی غفلت سامنے آئی، جب قومی ترانوں کی تقریب کے دوران پاکستان کا غلط پرچم پیش کر دیا گیا، جس پر پاکستانی شائقین نے شدید ردعمل کا اظہار کیا۔
‎تقریب کے دوران بچوں کے ہاتھوں میں موجود پاکستانی پرچم میں سفید رنگ موجود نہیں تھا، حالانکہ پاکستان کے قومی پرچم میں سفید حصہ مذہبی اقلیتوں کی نمائندگی کرتا ہے جبکہ سبز رنگ مسلم اکثریت کی علامت ہے۔
‎واقعے کی تصاویر اور ویڈیوز سوشل میڈیا پر وائرل ہونے کے بعد شائقین نے انٹرنیشنل ہاکی فیڈریشن (ایف آئی ایچ) اور ایونٹ کے منتظمین کو شدید تنقید کا نشانہ بنایا۔ صارفین نے اسے پاکستان کے قومی پرچم کی غلط نمائندگی قرار دیتے ہوئے فوری وضاحت اور باضابطہ معذرت کا مطالبہ کیا۔
‎شائقین کا کہنا تھا کہ بین الاقوامی مقابلوں میں شریک ممالک کے قومی پرچم، قومی ترانے اور قومی شناخت کا احترام بنیادی ذمہ داری ہے، اس لیے ایسی غلطی کسی صورت قابل قبول نہیں۔
‎سوشل میڈیا پر متعدد صارفین نے سوال اٹھایا کہ میچ سے قبل تمام انتظامات اور پروٹوکول کی جانچ کے باوجود اتنی اہم غلطی کیسے نظر انداز ہو گئی۔ کئی افراد نے مطالبہ کیا کہ مستقبل میں ایسے واقعات سے بچنے کے لیے ایف آئی ایچ اپنی انتظامی نگرانی مزید مؤثر بنائے۔
‎یہ واقعہ پاک بھارت میچ کے آغاز سے قبل پیش آیا، جس نے کھیل سے زیادہ انتظامی غفلت کو موضوعِ بحث بنا دیا اور قومی پرچم کی درست نمائندگی کی اہمیت کو ایک بار پھر اجاگر کر دیا۔

‎اسلام آباد: امریکا کی جانب سے اقتصادی رکاوٹوں میں نرمی اور حالیہ سفارتی پیش رفت کے بعد طویل عرصے سے تعطل کا شکار ایران پاکستان (آئی پی) گیس پائپ لائن منصوبہ دوبارہ فعال ہونے جا رہا ہے۔ اس پیش رفت سے منصوبے پر عملی کام شروع کرنے کی راہ ہموار ہو گئی ہے۔
‎حکومتی ذرائع کے مطابق پاکستان کی وفاقی کابینہ کی توانائی کمیٹی نے منصوبے کے پہلے مرحلے کی منظوری دے دی ہے، جس کے تحت گوادر سے ایران کی سرحد تک 80 کلومیٹر طویل پائپ لائن تعمیر کی جائے گی۔
‎اس ابتدائی مرحلے پر 158 ملین ڈالر لاگت آئے گی، جسے گیس انفراسٹرکچر ڈیولپمنٹ سیس (GIDC) کے ذریعے مالی معاونت فراہم کی جائے گی۔
‎منصوبے کے تحت ابتدائی طور پر پاکستان روزانہ 100 ملین مکعب فٹ (MMCFD) گیس درآمد کرے گا۔ بعد ازاں جب 781 کلومیٹر طویل پائپ لائن نواب شاہ تک مکمل ہو جائے گی تو گیس کی فراہمی بڑھ کر 750 ملین مکعب فٹ یومیہ تک پہنچ جائے گی، جس سے ملک کی توانائی ضروریات پوری کرنے میں نمایاں مدد ملے گی۔
‎رپورٹس کے مطابق پاکستان کو اگر منصوبے پر پیش رفت نہ کرتا تو ایران کی جانب سے بین الاقوامی ثالثی کے ذریعے 18 ارب ڈالر تک کے ممکنہ جرمانے کا سامنا کرنا پڑ سکتا تھا، جس کے پیش نظر منصوبے پر عملدرآمد کو تیز کیا گیا۔
‎تجزیہ کاروں کے مطابق امریکا اور ایران کے درمیان حالیہ سفارتی پیش رفت، مذاکرات میں مثبت ماحول اور پاکستان کی ثالثی کے نتیجے میں امریکی محکمہ خزانہ کی جانب سے ممکنہ رعایتوں نے اس منصوبے کی راہ میں حائل بڑی رکاوٹیں دور کر دی ہیں۔
‎توانائی ماہرین کا کہنا ہے کہ ایران پاکستان گیس پائپ لائن منصوبہ مکمل ہونے سے پاکستان کو قدرتی گیس کی طویل مدتی اور نسبتاً سستی فراہمی ممکن ہو سکے گی، جس سے توانائی بحران میں کمی، صنعتی سرگرمیوں میں اضافہ اور ملکی معیشت کو استحکام ملنے کی توقع ہے۔