اسلام آباد: پاکستان اور ایران نے دوطرفہ تعلقات، اقتصادی تعاون اور علاقائی امن و استحکام کو مزید مضبوط بنانے کے عزم کا اعادہ کیا ہے۔
ایرانی صدر ڈاکٹر مسعود پزشکیان نے ایوانِ صدر میں صدر مملکت آصف علی زرداری سے ملاقات کی، جس میں دونوں رہنماؤں نے باہمی دلچسپی کے امور، دوطرفہ تعلقات اور خطے کی مجموعی صورتحال پر تفصیلی تبادلہ خیال کیا۔
ایوانِ صدر سے جاری اعلامیے کے مطابق ملاقات میں پاکستان اور ایران کے درمیان تاریخی تعلقات کو مزید فروغ دینے، اقتصادی تعاون بڑھانے اور علاقائی روابط کو مستحکم بنانے پر اتفاق کیا گیا۔ دونوں رہنماؤں نے خطے میں امن، استحکام اور مشترکہ ترقی کے لیے قریبی تعاون جاری رکھنے کے عزم کا بھی اظہار کیا۔
اعلامیے کے مطابق صدر آصف علی زرداری اور صدر مسعود پزشکیان نے اس بات پر زور دیا کہ دونوں برادر ممالک کے درمیان مختلف شعبوں میں تعاون کے وسیع مواقع موجود ہیں، جنہیں بروئے کار لا کر عوام کی خوشحالی اور باہمی ترقی کو فروغ دیا جا سکتا ہے۔
اس سے قبل ایرانی صدر وزیراعظم ہاؤس پہنچے، جہاں وزیراعظم شہباز شریف نے ان کا پرتپاک استقبال کیا۔ معزز مہمان کے اعزاز میں باضابطہ استقبالیہ تقریب منعقد ہوئی، جبکہ مسلح افواج کے چاق و چوبند دستے نے ایرانی صدر کو گارڈ آف آنر پیش کیا۔
دورے کے دوران دونوں ممالک کے درمیان تجارت، سرمایہ کاری، توانائی، علاقائی روابط اور دیگر اہم شعبوں میں تعاون کو مزید وسعت دینے کے امکانات پر بھی تبادلہ خیال کیا گیا۔
ایرانی صدر کا یہ دورہ پاکستان اور ایران کے درمیان دیرینہ برادرانہ تعلقات کو مزید مستحکم بنانے اور علاقائی امن و استحکام کے لیے مشترکہ کوششوں کا عکاس قرار دیا جا رہا ہے۔
صدر آصف زرداری سے مسعود پزشکیان کی ملاقات
