اسلام آباد: پاکستان کے دورے پر آئی ہوئی ایران کی وزیر ٹرانسپورٹ فرزانہ صادق نے وفاقی وزیر مواصلات عبدالعلیم خان سے ملاقات کی، جس میں دونوں ممالک کے درمیان ٹرانسپورٹ، تجارت اور سرحدی روابط کے فروغ سے متعلق اہم امور پر تبادلہ خیال کیا گیا۔
ملاقات میں پاکستان کی جانب سے وفاقی وزیر ریلوے حنیف عباسی، وفاقی وزیر تجارت جام کمال اور وفاقی وزیر بحری امور جنید انوار بھی شریک تھے، جبکہ دونوں ممالک کے اعلیٰ حکام نے بھی اجلاس میں شرکت کی۔اس موقع پر وفاقی وزیر مواصلات عبدالعلیم خان نے خطے میں امن کے قیام پر خوشی کا اظہار کرتے ہوئے کہا کہ پاکستان ایرانی عوام کے پختہ عزم، حوصلے اور استقامت کو قدر کی نگاہ سے دیکھتا ہے۔ انہوں نے اس امید کا اظہار کیا کہ مستقبل میں پاکستان اور ایران کے درمیان سڑک اور ریل کے ذریعے روابط مزید مضبوط ہوں گے، جس سے دونوں ممالک کے درمیان تجارتی سرگرمیوں اور معاشی تعاون میں نمایاں اضافہ ہوگا۔عبدالعلیم خان نے کہا کہ زمینی رابطوں کے فروغ سے نہ صرف دوطرفہ تجارت کو وسعت ملے گی بلکہ خطے میں اقتصادی انضمام اور ترقی کے نئے مواقع بھی پیدا ہوں گے۔ انہوں نے اس عزم کا اظہار کیا کہ ایران اور پاکستان کے درمیان ٹرانسپورٹ کے شعبے میں درپیش مسائل کو ترجیحی بنیادوں پر حل کیا جائے گا۔
اجلاس میں مختلف تجاویز پر غور کیا گیا اور دونوں وفود نے پاک ایران مشترکہ ٹرانسپورٹ کمیٹی کو فعال بنانے پر اتفاق کیا۔ اس کے علاوہ سرحدی علاقوں میں ٹرانسپورٹ اور تجارتی سرگرمیوں کو درپیش مسائل کے حل کے لیے مشترکہ اقدامات کرنے کا فیصلہ بھی کیا گیا۔
ایرانی وزیر ٹرانسپورٹ فرزانہ صادق نے جنگ بندی اور امن معاہدے کے حوالے سے پاکستان کے مثبت اور تعمیری کردار کو سراہتے ہوئے حکومتِ پاکستان اور پاکستانی عوام کا شکریہ ادا کیا۔ انہوں نے کہا کہ ایرانی عوام پاکستان کی بھرپور حمایت اور تعاون کو قدر کی نگاہ سے دیکھتے ہیں۔ملاقات کے دوران فرزانہ صادق نے دونوں ممالک کے درمیان ٹرکوں اور کنٹینرز کی کلیئرنس میں حائل مشکلات کا معاملہ بھی اٹھایا، جس پر فریقین نے باہمی تعاون کے ذریعے ان مسائل کے جلد حل کے عزم کا اظہار کیا۔اجلاس کے اختتام پر دونوں ممالک نے پاک ایران بارڈر پر موجود حل طلب امور کو مشترکہ کوششوں سے نمٹانے اور ٹرانسپورٹ، تجارت اور مواصلات کے شعبوں میں تعاون کو مزید وسعت دینے پر اتفاق کیا۔