Author: Aqsa Younas Rana

‎کاراکاس: وینزویلا میں آنے والے دو طاقتور زلزلوں کے نتیجے میں ہلاکتوں کی تعداد بڑھ کر 589 ہو گئی ہے، جبکہ 2,980 سے زائد افراد زخمی ہیں۔ حکام کے مطابق امدادی ٹیمیں ملبے تلے دبے افراد کو نکالنے کے لیے مسلسل ریسکیو آپریشن جاری رکھے ہوئے ہیں۔
‎قائم مقام صدر ڈیلسی روڈریگز نے کہا کہ متاثرہ علاقوں میں پھنسے افراد کو بچانے کے لیے ہر ممکن کوشش کی جا رہی ہے۔ انہوں نے کہا کہ امدادی ادارے دن رات کام کر رہے ہیں اور ریسکیو آپریشن میں مزید تیزی لائی جا رہی ہے۔
‎دوسری جانب زلزلے کے بعد عالمی برادری بھی وینزویلا کی مدد کے لیے متحرک ہو گئی ہے۔ اسپین کی وزارت دفاع کے مطابق درجنوں فوجی اہلکار اور آٹھ تربیت یافتہ ریسکیو کتے امدادی سرگرمیوں میں حصہ لینے کے لیے ویلنشیا شہر پہنچ چکے ہیں۔
‎اس کے علاوہ سوئٹزرلینڈ اور جرمنی نے بھی سرچ اینڈ ریسکیو ٹیمیں روانہ کر دی ہیں، جبکہ برطانیہ نے متاثرین کی امداد کے لیے 20 لاکھ پاؤنڈ کی انسانی ہمدردی کی امداد کا اعلان کیا ہے۔
‎حکام کے مطابق متعدد علاقوں میں عمارتیں مکمل طور پر منہدم ہو چکی ہیں، جس کے باعث ہلاکتوں میں مزید اضافے کا خدشہ ظاہر کیا جا رہا ہے۔ ریسکیو ٹیمیں جدید آلات کی مدد سے ملبہ ہٹانے اور زندہ بچ جانے والوں کی تلاش میں مصروف ہیں۔

‎سیول: جنوبی کوریا کی سابق خاتون اول کو رشوت لینے کے مقدمے میں عدالت نے سات سال قید کی سزا سنا دی۔ عدالت نے انہیں سیاسی اثر و رسوخ استعمال کرنے کے بدلے قیمتی زیورات، مہنگے تحائف اور نقد رقوم وصول کرنے کا مجرم قرار دیا۔
‎عدالتی فیصلے کے مطابق سابق خاتون اول پر الزام تھا کہ انہوں نے ذاتی اور سیاسی فوائد حاصل کرنے کے لیے مختلف افراد سے قیمتی تحائف اور مالی مراعات قبول کیں۔ تحقیقات کے دوران سامنے آنے والے شواہد کی بنیاد پر عدالت نے انہیں قصوروار قرار دیتے ہوئے سات سال قید کی سزا سنائی۔
‎یہ پہلا موقع نہیں کہ سابق خاتون اول قانونی کارروائی کا سامنا کر رہی ہیں۔ اس سے قبل انہیں اسٹاک مارکیٹ میں ہیرا پھیری کے ایک مقدمے میں بھی چار سال قید کی سزا سنائی جا چکی ہے۔ ان مقدمات نے جنوبی کوریا میں سیاسی شخصیات کے احتساب اور بدعنوانی کے خلاف جاری کارروائیوں کو مزید نمایاں کر دیا ہے۔
‎دوسری جانب جنوبی کوریا کے سابق صدر یون سک یول بھی قانونی مشکلات سے دوچار ہیں اور وہ غداری کے مقدمے میں 30 برس قید کی سزا کاٹ رہے ہیں۔ یوں ملک کی سابق حکمران جوڑی دونوں مختلف مقدمات میں سزائیں بھگت رہی ہے، جو جنوبی کوریا کی حالیہ سیاسی تاریخ کا ایک غیر معمولی واقعہ قرار دیا جا رہا ہے۔
‎تجزیہ کاروں کے مطابق ان فیصلوں سے یہ تاثر مضبوط ہوا ہے کہ جنوبی کوریا میں اعلیٰ حکومتی عہدیداروں اور طاقتور سیاسی شخصیات کے خلاف بھی قانون کا یکساں اطلاق کیا جا رہا ہے۔ عدالتی فیصلے کے بعد ملک میں سیاسی حلقوں میں نئی بحث شروع ہو گئی ہے، جبکہ حکومتی احتسابی نظام پر بھی توجہ مرکوز ہو گئی ہے۔
‎عدالت کی جانب سے سزا سنائے جانے کے بعد قانونی ماہرین کا کہنا ہے کہ سابق خاتون اول کے پاس فیصلے کے خلاف اپیل کا حق موجود ہے، تاہم موجودہ فیصلے کو جنوبی کوریا میں بدعنوانی کے خلاف اہم پیش رفت قرار دیا جا رہا ہے۔

‎واشنگٹن: امریکی جریدے وال اسٹریٹ جرنل کی ایک رپورٹ میں دعویٰ کیا گیا ہے کہ ایرانی حملوں کے بعد خلیجی ممالک میں قائم امریکی فوجی اڈوں کو بھاری نقصان پہنچا ہے، جس کے باعث امریکا اپنے اہم فوجی اڈوں کو ایرانی میزائلوں کی رینج سے دور منتقل کرنے کے آپشن پر غور کر رہا ہے۔
‎رپورٹ کے مطابق بحرین میں قائم امریکی پانچویں بحری بیڑے کو شدید نقصان پہنچا، جہاں ففتھ فلیٹ کے ہیڈکوارٹرز، مواصلاتی نظام، گوداموں اور دیگر تنصیبات کو متاثر ہونے کی اطلاعات ہیں۔ رپورٹ میں یہ بھی دعویٰ کیا گیا ہے کہ امریکی محکمہ دفاع (پینٹاگون) نے تاحال عوامی سطح پر ان نقصانات کی تصدیق یا تفصیلات جاری نہیں کیں۔
‎رپورٹ کے مطابق صرف بحرین میں امریکی بحری اڈے کی بحالی اور تعمیرِ نو پر تقریباً 40 کروڑ ڈالر لاگت آنے کا تخمینہ لگایا گیا ہے، جبکہ خطے میں موجود دیگر امریکی فوجی اڈوں کو پہنچنے والے مجموعی نقصان کی مالیت 2 ارب ڈالر سے زیادہ ہو سکتی ہے۔
‎وال اسٹریٹ جرنل کے مطابق انہی خدشات کے پیش نظر امریکی دفاعی حکام مستقبل میں خلیجی خطے میں اپنی فوجی تنصیبات کی پوزیشننگ اور دفاعی حکمت عملی کا ازسرنو جائزہ لے رہے ہیں تاکہ انہیں ممکنہ میزائل حملوں سے زیادہ محفوظ بنایا جا سکے۔
‎امریکی حکام کی جانب سے اس رپورٹ میں کیے گئے تمام دعوؤں کی باضابطہ تصدیق تاحال سامنے نہیں آئی ہے۔

‎ٹوکیو: جاپان کے شمالی ساحل کے قریب جمعرات کی صبح رش کے اوقات میں 7.2 شدت کا طاقتور زلزلہ آیا، جس سے شمال مشرقی جاپان کے درجنوں شہروں میں جھٹکے محسوس کیے گئے، تاہم جاپانی محکمہ موسمیات نے سونامی کے کسی خطرے کی تردید کرتے ہوئے کہا ہے کہ کسی بڑے جانی نقصان کی اطلاع نہیں ملی۔
‎زلزلے کے جھٹکے دارالحکومت ٹوکیو میں بھی ہلکی شدت سے محسوس کیے گئے، جس کے باعث شہریوں میں کچھ دیر کے لیے خوف و ہراس پھیل گیا۔ محکمہ موسمیات کے مطابق زلزلے کا مرکز ایواتے پریفیکچر کے مشرقی ساحل کے قریب سمندر میں تھا اور اس کی گہرائی تقریباً 50 کلومیٹر ریکارڈ کی گئی۔
‎جاپانی محکمہ موسمیات نے ابتدائی طور پر زلزلے کی شدت 6.9 بتائی تھی، تاہم بعد ازاں اسے بڑھا کر 7.2 کر دیا گیا، جبکہ امریکی جیولوجیکل سروے نے اس کی شدت 6.9 ریکارڈ کی۔
‎مقامی حکام کے مطابق زلزلے کے نتیجے میں کسی بڑے نقصان یا شدید زخمی ہونے کی اطلاع موصول نہیں ہوئی۔ ہاشی کامی قصبے کی ایک اسکول پرنسپل نے بتایا کہ وہ ڈیوٹی پر جا رہی تھیں جب ان کی گاڑی اچانک زور سے ہلنے لگی۔ اسکول میں موجود تمام بچے محفوظ رہے، تاہم کئی بچے خوف کے باعث رونے لگے۔
‎یاد رہے کہ یہ وہی علاقہ ہے جہاں گزشتہ چند ماہ کے دوران کئی طاقتور زلزلے آ چکے ہیں۔ دسمبر میں بھی اسی خطے میں آنے والے شدید زلزلے کے بعد ایک ہفتے کے لیے ممکنہ بڑے زلزلے کا انتباہ جاری کیا گیا تھا۔

‎واشنگٹن: دنیا بھر میں 50 سال سے کم عمر افراد میں آنتوں کے کینسر سمیت مختلف اقسام کے کینسر کے کیسز میں تیزی سے اضافہ ہو رہا ہے، جبکہ ایک نئی تحقیق میں اس رجحان کی ایک اہم ممکنہ وجہ سامنے آئی ہے۔
‎امریکا کی واشنگٹن یونیورسٹی اسکول آف میڈیسن کی تحقیق کے مطابق 1980 اور 1990 کی دہائی میں پیدا ہونے والے افراد کی حیاتیاتی عمر (Biological Age) پہلے کی نسلوں کے مقابلے میں زیادہ تیزی سے بڑھ رہی ہے، جس کے نتیجے میں کم عمری میں کینسر سمیت مختلف بیماریوں کا خطرہ بھی بڑھ جاتا ہے۔
‎محققین نے 1965 سے 1969 اور 1990 سے 1999 کے درمیان پیدا ہونے والے افراد کا موازنہ کیا تو معلوم ہوا کہ نئی نسل میں حیاتیاتی عمر حقیقی عمر کے مقابلے میں زیادہ تیزی سے بڑھ رہی ہے، جبکہ یہ فرق مردوں میں خواتین کے مقابلے میں زیادہ نمایاں پایا گیا۔
‎تحقیق کے مطابق حیاتیاتی عمر اور اصل عمر کے درمیان جتنا زیادہ فرق ہوگا، اتنا ہی پھیپھڑوں، نظامِ ہاضمہ اور بالخصوص آنتوں کے کینسر کا خطرہ بڑھ جاتا ہے۔ اعداد و شمار سے ظاہر ہوا کہ 1990 سے 2019 کے دوران 50 سال سے کم عمر افراد میں کینسر کے کیسز میں 24 فیصد اضافہ ریکارڈ کیا گیا، جبکہ آنتوں کا کینسر نوجوانوں میں تیزی سے بڑھنے والی بیماریوں میں شامل ہے۔
‎ماہرین کا کہنا ہے کہ قبل از وقت بلوغت، موٹاپا، ذیابیطس، فالج کے بڑھتے کیسز اور غیر صحت مند طرزِ زندگی حیاتیاتی عمر میں اضافے کی ممکنہ وجوہات ہیں، جو کینسر کے خطرے میں بھی اضافہ کر سکتے ہیں۔
‎تحقیق میں یہ بھی سامنے آیا کہ اگر مدافعتی نظام یا جسم میں چربی کے ٹشوز کی حیاتیاتی عمر زیادہ ہو جائے تو آنتوں کے کینسر کا خطرہ مزید بڑھ سکتا ہے۔
‎محققین نے واضح کیا کہ نوجوانوں میں کینسر کے بڑھتے ہوئے کیسز کی حتمی وجہ ابھی سامنے نہیں آئی، تاہم ایسی تحقیقات اس مسئلے کو بہتر انداز میں سمجھنے میں مدد دے رہی ہیں۔ انہوں نے کہا کہ مستقبل میں ماحول، طرزِ زندگی اور دیگر عوامل کے اثرات پر مزید تحقیق کی جائے گی تاکہ اس بیماری کی روک تھام کے مؤثر طریقے تلاش کیے جا سکیں۔

‎یورپ اس وقت شدید گرمی کی غیر معمولی لہر کی زد میں ہے، جہاں کئی ممالک میں ریکارڈ توڑ درجہ حرارت نے معمولاتِ زندگی متاثر کر دیے ہیں۔ اسپین میں صرف چار روز کے دوران گرمی سے متعلق مختلف واقعات میں 200 سے زائد افراد جان کی بازی ہار چکے ہیں، جبکہ کئی علاقوں میں درجہ حرارت 42 ڈگری سینٹی گریڈ تک پہنچ گیا ہے۔
‎برطانیہ میں محکمہ موسمیات نے ملک کے بیشتر حصوں کے لیے شدید گرمی کی ریڈ وارننگ میں کل رات تک توسیع کر دی ہے۔ ماہرین کے مطابق درجہ حرارت 40 ڈگری سینٹی گریڈ تک پہنچنے کا امکان ہے، جو ملک کے لیے غیر معمولی صورتحال سمجھی جا رہی ہے۔
‎برطانوی علاقے سرے میں جون کے مہینے کی گرمی کا 50 سالہ ریکارڈ ٹوٹ گیا، جہاں درجہ حرارت 35.7 ڈگری سینٹی گریڈ ریکارڈ کیا گیا، جبکہ 1976 میں جون کے دوران 35.6 ڈگری سینٹی گریڈ کا ریکارڈ قائم ہوا تھا۔
‎ادھر فرانس بھی شدید ہیٹ ویو سے متاثر ہے، جہاں گرمی کے باعث ہلاکتوں کی تعداد 50 ہو گئی ہے۔ کئی علاقوں میں درجہ حرارت 44 ڈگری سینٹی گریڈ سے تجاوز کر گیا، جبکہ دارالحکومت پیرس میں بھی پارہ 40 ڈگری تک پہنچ گیا، جو گزشتہ کئی دہائیوں کی بلند ترین سطحوں میں شمار کیا جا رہا ہے۔
‎اٹلی میں بھی صورتحال تشویشناک ہے، جہاں حکومت نے 16 بڑے شہروں میں شدید گرمی کا ریڈ الرٹ جاری کرتے ہوئے شہریوں کو غیر ضروری طور پر گھروں سے باہر نہ نکلنے اور احتیاطی تدابیر اختیار کرنے کی ہدایت کی ہے۔
‎ماہرین صحت نے خبردار کیا ہے کہ بزرگ افراد، بچے اور دائمی بیماریوں میں مبتلا شہری شدید گرمی سے زیادہ متاثر ہو سکتے ہیں، اس لیے پانی کا زیادہ استعمال، دھوپ سے بچاؤ اور احتیاطی تدابیر اختیار کرنا انتہائی ضروری ہے۔

‎عالمی منڈی میں سونے کی قیمتوں میں مسلسل دوسرے روز بھی کمی ریکارڈ کی گئی، جس کے بعد قیمتیں گزشتہ سات ماہ سے زائد عرصے کی کم ترین سطح کے قریب پہنچ گئی ہیں۔ ماہرین کے مطابق مضبوط امریکی ڈالر اور شرح سود میں اضافے کے خدشات کے باعث سرمایہ کاروں کی سونے میں دلچسپی کم ہو رہی ہے۔
‎بین الاقوامی مارکیٹ میں اسپاٹ گولڈ کی قیمت 0.4 فیصد کمی کے بعد 3,985.89 ڈالر فی اونس تک آگئی، جبکہ اگست ڈلیوری کے لیے امریکی گولڈ فیوچرز بھی 0.2 فیصد کمی کے ساتھ 4,001.60 ڈالر فی اونس پر ٹریڈ ہوئے۔ بدھ کے روز سونا پہلی بار نومبر 2025 کے بعد 4 ہزار ڈالر فی اونس کی اہم نفسیاتی سطح سے نیچے آ گیا تھا۔
‎دیگر قیمتی دھاتوں میں بھی ملا جلا رجحان دیکھا گیا۔ چاندی کی قیمت 0.2 فیصد کمی کے ساتھ 57.33 ڈالر فی اونس، پلاٹینم 1,575.85 ڈالر فی اونس جبکہ پیلیڈیم 0.3 فیصد اضافے کے بعد 1,170.25 ڈالر فی اونس تک پہنچ گیا۔
‎عالمی منڈی میں قیمتوں میں کمی کے اثرات پاکستان میں بھی نمایاں ہونے لگے ہیں۔ آل پاکستان صرافہ ایسوسی ایشن کے مطابق حالیہ کاروباری روز کے دوران 24 قیراط فی تولہ سونا 10 ہزار 400 روپے سستا ہو کر 4 لاکھ 32 ہزار 236 روپے پر آ گیا، جبکہ 10 گرام سونے کی قیمت 9 ہزار 360 روپے کمی کے بعد 3 لاکھ 68 ہزار 985 روپے ہو گئی۔
‎مارکیٹ ماہرین کا کہنا ہے کہ اگر عالمی سطح پر سونے کی قیمتوں میں یہی رجحان برقرار رہا تو آئندہ دنوں میں پاکستان میں بھی سونے کی قیمتوں میں مزید کمی دیکھنے کو مل سکتی ہے۔

‎تہران: ایرانی صدر مسعود پزشکیان نے یومِ عاشور کے موقع پر اپنے خصوصی پیغام میں حضرت امام حسینؓ اور شہدائے کربلا کو خراجِ عقیدت پیش کرتے ہوئے کہا ہے کہ امام حسینؓ نے پوری انسانیت کو ظلم، اقتدار کی ہوس اور مفاد پرستی کے سامنے سر نہ جھکانے کا لازوال درس دیا۔
‎سماجی رابطے کی ویب سائٹ ایکس پر جاری اپنے پیغام میں ایرانی صدر نے کہا کہ حضرت امام حسینؓ کی عظیم قربانی یہ پیغام دیتی ہے کہ جان تو قربان کی جا سکتی ہے، لیکن آزادی، غیرتِ نفس اور حق کا سودا نہیں کیا جا سکتا۔
‎انہوں نے کہا کہ انسان تنہا رہ سکتا ہے، مگر سچ کا دامن نہیں چھوڑ سکتا۔ ان کا کہنا تھا کہ کربلا کا پیغام صرف ایک تاریخی واقعہ نہیں بلکہ ہر دور کے انسان کے لیے حق، انصاف اور استقامت کی علامت ہے۔
‎مسعود پزشکیان نے اپنے پیغام میں اس عزم کا اظہار بھی کیا کہ نہ ہم ظلم کریں گے، نہ ظلم برداشت کریں گے اور نہ ہی ظلم کے سامنے خاموشی اختیار کریں گے۔