سیالکوٹ(باغی ٹی وی ،بیورورپورٹ)باغی ٹی وی کی 14ویں سالگرہ کے موقع پر سیالکوٹ میں ایک شاندار، پروقار اور یادگار تقریب منعقد ہوئی، جس کی میزبانی باغی ٹی وی کے سیالکوٹ بیورو چیف مدثر رتو نے ایک مقامی ہوٹل میں کی۔ تقریب میں باغی ٹی وی کے ایڈیٹر ممتاز حیدر اعوان، انچارج نمائندگان ڈاکٹر غلام مصطفیٰ بڈانی اور طارق نوید سندھو (بیورو چیف باغی ٹی وی قصور) نے خصوصی شرکت کی۔
تقریب کے آغاز میں میزبان مدثر رتو نے معزز مہمانوں کو خوش آمدید کہا اور انہیں گلدستے پیش کیے، جس کے بعد باغی ٹی وی کی 14ویں سالگرہ کا کیک کاٹا گیا۔ اس موقع پر شہر سیالکوٹ سے تعلق رکھنے والے صحافیوں کی بڑی تعداد نے شرکت کی، جس سے تقریب کی اہمیت اور وقار میں مزید اضافہ ہوا۔
تقریب میں شریک صحافیوں اور مہمانوں نے اس عزم کا اظہار کیا کہ باغی ٹی وی آئندہ بھی ذمہ دار، مثبت اور تعمیری صحافت کے فروغ کے لیے اپنا کردار پوری دیانت داری سے ادا کرتا رہے گا اور عوامی مسائل کو مؤثر انداز میں اجاگر کرتا رہے گا۔
اس موقع پر باغی ٹی وی کی جانب سے اہم تنظیمی فیصلوں کا اعلان بھی کیا گیا، جن کے تحت مدثر رتو کو باضابطہ طور پر سیالکوٹ کا بیورو چیف مقرر کیا گیا، جبکہ محمد جمال کو سٹی رپورٹر اور وقاص اسلم کو تحصیل پسرور کا نمائندہ مقرر کیا گیا۔ بعد ازاں محمد جمال اور وقاص اسلم کو نمائندگی کے کارڈ بھی دیے گئے۔ اس موقع پر مدثر رتو کو بیورو چیف مقرر ہونے پر باغی ٹی وی کی جانب سے اعزازی شیلڈ سے بھی نوازا گیا۔
تقریب کے اختتام پر مہمانوں کے اعزاز میں پُرتکلف ظہرانے کا اہتمام کیا گیا۔ تقریب سے خطاب کرتے ہوئے مدثر رتو نے باغی ٹی وی کی مرکزی ٹیم کا شکریہ ادا کیا اور نیک تمناؤں کا اظہار کرتے ہوئے کہا کہ وہ اپنی ٹیم کے ہمراہ صحافتی اقدار کی پاسداری، عوامی مسائل کے بروقت اور مؤثر اجاگر کرنے اور حق و سچ کی آواز بننے کے لیے بھرپور کردار ادا کرتے رہیں گے۔
باغی ٹی وی کی 14ویں سالگرہ، سیالکوٹ میں پروقار تقریب
