اسرائیل نے رفح پر فوجی حملے کے لیے تاریخ مقرر کرلی

اسرائیل کے وزیر اعظم بنجمن نیتن یاہو نے اعلان کیا ہے کہ رفح کے گنجان آباد شہر پر بھرپور فوجی حملے کے لیے تاریخ مقرر کرلی گئی ہے-

رفح کے گنجان آباد شہر پر بھرپور فوجی حملے کے لیے تاریخ مقرر کرلی گئی ہے، تاکہ جنوبی غزہ میں واقع حماس کے اس آخری گڑھ کو ختم کا جا سکے،نیتن یاہو کا یہ اعلان قاہرہ میں جاری جنگ بندی مذاکرات کے فوری بعد سامنے آیا ہے،نیتن یاہو نے یہ نہیں بتایا کہ حملے کیلئے کونسی تاریخ مقرر کی گئی ہے، بس یہ کہا کہ ایک تاریخ طے کرلی ہے اور حملہ ضرور ہوگا-

اسرائیلی وزیر اعظم نے کہا ہے کہ ہم مسلسل اپنے اہداف کے حصول کے لیے کام کر رہے ہیں،تاکہ اپنے تمام یرغمالیوں کو رہا کرائیں اور حماس پر مکمل فتح حاصل کریں،دوسری جانب نیتن یاہو کے اس بیان کے بعد امریکہ نے کہا ہے کہ وہ اب بھی رفح پر کسی بڑے حملے کا مخالف ہے۔

امریکی دفتر خارجہ کے ترجان میتیھیو ملر نے یہ بھی کہا ہے کہ ایک طرف رفح میں شہری آبادی کے لیے بڑا خطرہ پیدا ہو جائے گا تو دوسری جانب خود اسرائیلی سلامتی کے لیے مسائل پیدا ہوں گے۔

واضح رہے کہ رفح، غزہ کے انتہائی جنوب میں مصری سرحد کے ساتھ جڑا ہوا شہر ہے، جس میں 15 لاکھ سے زیادہ فلسطینی پناہ گزینوں نے جاری جنگ کے بعد پناہ لے رکھی ہے۔