بھارتی میڈیا پر منظم جھوٹ،بدنیتی پر پروپیگنڈہ کی مذمت،تردید کرتے ہیں،حافظ طلحہ سعید

مرکزی مسلم لیگ کے نائب صدر حافظ طلحہ سعید نے اپنے حوالے سے انڈین میڈیا کی جانب سے پھیلائے جانے والے منظم، سو فیصد جھوٹے، بدنیتی پر مشتمل اور پلانٹڈ پروپیگنڈے کی سخت اور بھرپور مذمت کی ہے اور کہا ہے کہ بنیادی انسانی حقوق کے تحت انہیں یہ مکمل، آئینی اور قانونی حق حاصل ہے کہ وہ بدنیتی پر مشتمل دشمن کے ایسے گھناؤنے پروپیگنڈے کے ایک ایک لفظ کو مسترد کریں اور اس کی مؤثر انداز میں تردید کریں۔

انڈین میڈیا میں گردش کرنے والے متنازع کلپ کے حوالے سے نائب صدر پاکستان مرکزی مسلم لیگ، حافظ طلحہ سعید کا دوٹوک اور واضح موقف ہے کہ ان بے بنیاد الزامات کا نہ ان سے کوئی تعلق ہے اور نہ ہی پاکستان مرکزی مسلم لیگ کا ان سے کوئی واسطہ ہے۔ یہ الزامات سو فیصد جھوٹے، من گھڑت، بے بنیاد اور پلانٹڈ ہیں، جن کا مقصد دانستہ طور پر پاکستان اور اس کی آئینی سیاسی جماعتوں کو بدنام کرنا ہے۔حافظ طلحہ سعید نے واضح کیا کہ پاکستان مرکزی مسلم لیگ ایک آئینی و قانونی سیاسی جماعت ہے جو اپنے سیاسی، سماجی اور تعلیمی پروگرامز کے دائرہ کار کو بخوبی پہچانتی ہے اور اسی دائرے میں رہتے ہوئے اپنی سرگرمیاں انجام دیتی ہے۔ بہاولپور میں منعقد ہونے والی تقریب بخاری کے سالانہ بچوں کے فنکشن سے متعلق تھی، جسے خوامخواہ بدنیتی کے تحت سو فیصد غلط رنگ دے کر اپنے پروپیگنڈے کا حصہ بنایا گیا۔
انہوں نے مزید کہا کہ انڈین میڈیا کا یہ طرزِ عمل نہ صرف سو فیصد جھوٹ پر مبنی ہے بلکہ پاکستان کے اندرونی معاملات میں کھلی اور قابلِ مذمت مداخلت کے مترادف ہے، جس کی شدید مذمت کی جاتی ہے۔

حافظ طلحہ سعید نے حکومتِ پاکستان اور ریاستی اداروں سے مطالبہ کیا ہے کہ بھارت کی جانب سے پھیلائے جانے والے اس منفی، سو فیصد جھوٹے اور گمراہ کن پروپیگنڈے کا سنجیدگی سے نوٹس لیا جائے، اس پر فوری اور مؤثر کارروائی کی جائے اور عالمی سطح پر اس کا بھرپور جواب دیا جائے۔ بصورتِ دیگر، حافظ طلحہ سعید واضح کرتے ہیں کہ وہ بنیادی انسانی حقوق کے تحت اس معاملے میں عدالتی چارہ جوئی کا حق محفوظ رکھتے ہیں اور اس جھوٹے پروپیگنڈے کے خلاف قانونی راستہ اختیار کریں گے۔