مرکزی مسلم لیگ کے آئی ٹی ہیڈ ،ڈائریکٹر اپنا کماؤ ملک وقاص سعید نے کہا ہے کہ نوجوانوں کو آئی ٹی کی تربیت دے کر ہنرمند بنایا جا سکتا ہے،نوجوان مضبوط ہو گا تو ملک ترقی کرے گا،مرکزی مسلم لیگ عید کے بعد مفت آئی ٹی کے تربیتی کورس لانچ کر رہی ہے
ان خیالات کا اظہار انہوں نے اسلام آباد میں آئی ٹی کمیونٹی کے اعزاز میں افطار ڈنر کی تقریب سے خطا ب کرتے ہوئے کیا،تقریب سے مرکزی مسلم لیگ اسلام آباد کے صدر انعام الرحمان نے بھی خطاب کیا جبکہ سی ای او بلٹ ان سافٹ رضوان مجید، ڈپٹی انفارمیشن سیکرٹری اسلام آباد سردار سلیم الیاس اور ایرڈ ایگریکلچر یونیورسٹی کے ایسوسی ایٹ پروفیسر ڈاکٹر آصف عزیز سمیت آئی ٹی ماہرین، فری لانسرز اور ڈیجیٹل ایجنسی مالکان نے بھرپور شرکت کی۔ ملک وقاص سعید نے ’اپنا کماؤ‘ مشن کے اغراض و مقاصد بیان کرتے ہوئے واضح کیا کہ ہمارا مقصد نوجوانوں کو صرف روایتی تعلیم تک محدود رکھنا نہیں بلکہ انہیں براہِ راست ان جدید مہارتوں سے لیس کرنا ہے جو عالمی منڈیوں میں ان کی شناخت بن سکیں، نوجوانوں کے لیے مستقبل قریب میں ایسے بڑے پیمانے کے تربیتی پروگرامز کا آغاز کیا جا رہا ہے جو انہیں مصنوعی ذہانت اور دیگر ابھرتی ہوئی ٹیکنالوجیز میں عالمی معیار کی مہارتیں فراہم کریں گے۔ ان دور رس اقدامات کے ذریعے یوتھ کو نہ صرف تکنیکی طور پر مضبوط کیا جائے گا بلکہ انہیں بیروزگاری کے خاتمے اور خود مختار روزگار کی فراہمی کے لیے ہر ممکن تعاون بھی میسر ہوگا۔انعام الرحمن کمبوہ کا کہنا تھا کہ نوجوان نسل کی معاشی بحالی اب ایک قومی ضرورت بن چکی ہے جس کے لیے مرکزی مسلم لیگ اپنے تمام تر وسائل بروئے کار لا رہی ہے۔ رضوان مجید نے اس بات پر زور دیا کہ انڈسٹری اور اکیڈمیہ کے درمیان پائیدار اشتراک ہی وہ واحد راستہ ہے جس کے ذریعے ہم پاکستان کے ڈیجیٹل مستقبل کو محفوظ اور مستحکم بنا سکتے ہیں۔