کندھ کوٹ (نامہ نگار) میونسپل کمیٹی کندھ کوٹ کے ریٹائرڈ ملازمین نے اپنی واجب الادا تنخواہوں، ڈیفرنس اور نئی مقررہ تنخواہوں کی عدم ادائیگی کے خلاف پریس کلب کندھ کوٹ کے سامنے شدید احتجاج کیا۔ مظاہرین نے ہاتھوں میں پلے کارڈز اٹھا رکھے تھے اور میونسپل انتظامیہ کے خلاف نعرے بازی کی۔
احتجاج کے دوران یعقوب شیخ، سرداران شیخ، مائی منیران شیخ، مائی شانی، نبی بخش شیخ، ماروی شیخ اور غلام شیخ نے میڈیا سے گفتگو کرتے ہوئے کہا کہ انہیں ریٹائر ہوئے کافی عرصہ گزر چکا ہے، مگر تاحال نہ تو ان کی بقایاجات تنخواہیں ادا کی گئی ہیں اور نہ ہی ڈیفرنس اور نئی تنخواہیں جاری کی گئی ہیں۔
انہوں نے بتایا کہ وہ مسلسل میونسپل کمیٹی کے دفاتر کے چکر لگا رہے ہیں مگر عملہ ملنے کو تیار نہیں اور کلرک ٹال مٹول سے کام لے رہے ہیں۔ تنخواہوں کی عدم ادائیگی کے باعث ان کے گھروں میں فاقوں کی نوبت آ چکی ہے اور بچے بھوک برداشت کرنے پر مجبور ہیں جبکہ قرض خواہ روزانہ تنگ کر رہے ہیں۔
مظاہرین نے میونسپل کمیٹی کے چیئرمین میر غلام راشد خان سندرانی، سی ایم او مقصود جتوئی اور دیگر متعلقہ افسران سے فوری طور پر بقایاجات تنخواہیں، ڈیفرنس اور نئی تنخواہیں ادا کرنے کا مطالبہ کیا تاکہ ان کے گھروں کے چولہے جل سکیں۔ بصورت دیگر احتجاج کا دائرہ وسیع کرنے کی دھمکی بھی دی گئی ہے۔