پاکستان امت میں اتحاد اور امن کی علامت بن کر ابھر رہا ہے ،خالد مسعود سندھو

مرکزی مسلم لیگ کے صدر خالد مسعود سندھو نے کہا ہے کہ پاکستان امت میں اتحاد اور امن کی علامت بن کر ابھر رہا ہے ، پاکستان کا قیام ماہ رمضان میں 27 ویں کی شب ہوا تھا اب ماہ رمضان میں پاکستان کا کردار عالمی دنیا میں اہم ہو چکا ہے۔ حکمران کلمہ کے پاکستان کی لاج رکھیں اور غریب عوام کو ریلیف دیں

ان خیالات کا اظہار انہوں نے فیصل آباد میں صحافیوں کے اعزاز میں افطار ڈنر کی تقریب سے خطاب کرتے ہوئے کیا۔
اس موقع پر مرکزی ترجمان مرکزی مسلم لیگ تابش قیوم ،صدر وسطی پنجاب چوہدری حمید الحسن ،سیکرٹری جنرل فیصل آباد محمد احسن تارڑ ،ترجمان پنجاب احمد اجمل نے بھی خطاب کیا۔ خالد مسعود سندھو کا کہنا تھا کہ پاکستان رب کا انعام ہے۔ مئی کی جنگ کے بعد اب مشرق وسطی جنگ میں پاکستان کا کردار مزید نکھر کر سامنے آیا ہے ۔ سعودی عرب اور دیگر ممالک کے مابین مفاہمت کی پاکستان کی کوششیں قابل تحسین ہیں۔ پاکستان کا دفاع مضبوط ہاتھوں میں ہے پاکستان مضبوط ہو گا تو امت مضبوط ہو گی۔ضرورت اس امر کی ہے کہ حکمران ذاتی مفادات کو پس پشت ڈال کر پاکستان کا سوچیں۔ فاتح پاکستان دہشت گردی کے خلاف جنگ میں بھی کامیابیاں حاصل کر رہا ہے ۔ افغانستان رحیم کی جانب سے ڈرون حملے قابل مذمت ، پاکستان کی مسلح افواج نے بروقت جواب دے کر ثابت کیا کہ پاکستان کا دفاع مضبوط و مستحکم ہے۔ مرکزی مسلم لیگ پاکستان کے دفاع و استحکام کے لئے قوم کو متحد و بیدار کرنے کا فریضہ سر انجام دیتی رہے گی۔ فتنہ الہندوستان اور فتنہ الخوارج ، انکے سہولت کاروں کی شکست یقینی ہے،مرکزی ترجمان تابش قیوم و دیگر نے صحافی برادری کے کردار کو سراہتے ہوئے کہا کہ معاشرے میں مثبت اور ذمہ دارانہ صحافت کی اہمیت ہمیشہ نمایاں رہی ہے۔ انہوں نے کہا کہ صحافی عوامی مسائل اجاگر کرنے اور معاشرے میں شعور بیدار کرنے میں اہم کردار ادا کرتے ہیں۔