ٹھٹھہ (بلاول سموں)عوامی پریس کلب ٹھٹھہ کے صدر بلاول سموں کی شکایت پر محمد ہارون، ریجنل ڈائریکٹر محتسبِ سندھ ٹھٹھہ نے اپنی ٹیم کے ہمراہ گورنمنٹ پرائمری اسکول کھڈائی محلہ کا دورہ کیا اور اسکول کی مجموعی صورتحال کا تفصیلی جائزہ لیا۔ اس موقع پر ڈائریکٹر محتسبِ سندھ کو شکایت سے متعلق اصل حقائق سے آگاہ کیا گیا۔
دورے کے دوران بتایا گیا کہ سندھ ایجوکیشن ریفارمز پروگرام کے تحت مذکورہ اسکول سمیت ضلع ٹھٹھہ کے مزید پانچ اسکولوں کے ٹینڈر جاری کیے گئے تھے، تاہم متعلقہ ٹھیکیداروں نے پرانی عمارتیں منہدم کر کے لوہا اور پتھر فروخت کر دیا اور نئی تعمیر مکمل کیے بغیر اسکولوں کو خستہ اور ادھوری حالت میں چھوڑ دیا، جس کے باعث تعلیمی سرگرمیاں بری طرح متاثر ہو رہی ہیں۔
گورنمنٹ پرائمری اسکول کھڈائی محلہ کے ہیڈ ماسٹر آفتاب محمود کھڈائی نے ڈائریکٹر محتسب سندھ کو بتایا کہ اس وقت اسکول صرف ایک کمرے میں قائم ہے، جو خود بھی انتہائی مخدوش حالت میں ہے۔ انہوں نے کہا کہ اسکول کی خراب عمارت کے باعث طلبہ کے داخلوں میں نمایاں کمی واقع ہوئی ہے، والدین بچوں کی جان کے خوف سے اسکول میں داخلہ کرانے سے گریز کرتے ہیں۔ جہاں ماضی میں طلبہ کی تعداد سینکڑوں میں تھی، اب وہ کم ہو کر چند درجن رہ گئی ہے۔
اس موقع پر ڈائریکٹر محتسب سندھ ٹھٹھہ محمد ہارون نے یقین دہانی کرائی کہ متعلقہ محکموں اور ذمہ دار افسران سے فوری رابطہ کر کے اسکول کی عمارت کی تعمیر کو یقینی بنایا جائے گا۔ انہوں نے مزید کہا کہ اس سنگین غفلت اور بدانتظامی میں ملوث ذمہ داران کے خلاف قانون کے مطابق کارروائی کی جائے گی اور علاقے کے معصوم بچوں کے مستقبل کا ہر صورت تحفظ کیا جائے گا۔
دورے کے موقع پر ڈائریکٹر محتسب سندھ ٹھٹھہ کے ہمراہ محمد حنیف پنہور اسسٹنٹ رجسٹرار محتسب آفس ٹھٹھہ، ڈپٹی ڈسٹرکٹ آفیسر ایجوکیشن میڈم زینب، ایگزیکٹو انجینئر ایجوکیشن ورکس ٹھٹھہ فیض علی رند، آخوند برادیہ ہائی اسکول کے ہیڈ ماسٹر عاشق میمن سمیت تعلیم اور تعمیرات سے وابستہ دیگر افسران بھی موجود تھے۔