پاکستان کی سفارتی کوشش،ممکنہ تباہی ٹل گئی، حافظ مسعود اظہر

پاکستان اسلامی دنیا کا شاہین وشہبازہے اور قائدانہ کردار ادا کرنے کی صلاحیت رکھتا ہے ۔ عالمی سطح پر تیزی سے بدلتے ہوئے حالات و واقعات نے یہ حقیقت واضح کر دی ہے کہ پاکستان نہ صرف اسلامی دنیا کا مضبوط اور ذمہ دار ملک ہے بلکہ امن و استحکام کے قیام میں ایک قائدانہ کردار بھی ادا کر رہا ہے۔عالمی سطح حالیہ کشیدہ صورتحال میں پاکستان نے جس دانشمندی اور بردباری کا مظاہرہ کیا، وہ قابل تحسین ہے۔

ان خیالات کا اظہار پاکستان اسلامک کونسل کے چئیرمین اور جامعہ سعیدیہ سلفیہ کے پرنسپل ڈاکٹر حافظ مسعود اظہر نے کیا ۔ انھوں نے کہا کہ کور کمانڈر کانفرنس میں ایران کی جانب سے سعودی عرب کی سویلین اور توانائی تنصیبات پر حملوں کو غیر ضروری قرار دینا درحقیقت پوری قوم کے جذبات کی ترجمانی ہے ۔ اس لئے کہ سعودی عرب پاکستان کا سچا اور مخلص دوست ہے ۔ وزیراعظم شہباز شریف اورفیلڈ مارشل جنرل سید حافظ عاصم منیر کی قیادت میں پاکستان نے ایران اور امریکہ کے درمیان بڑھتی ہوئی کشیدگی کو کم کرنے کے لیے مؤثر سفارتی کوششیں کیں، جس کے نتیجے میں ممکنہ بڑی تباہی کا خطرہ ٹل گیا ہے ۔ پاکستان کی یہ کاوشیں خطے میں امن کے لیے ایک اہم سنگ میل ثابت ہو سکتی ہیں۔ پاکستان نے تنازع کو کم کرنے میں بھی مثبت کردار ادا کیا ہے اور سعودی عرب کے ساتھ اپنی دیرینہ دوستی کا عملی ثبوت بھی دیا ہے ۔ پاکستان نے واضح پیغام دے دیا ہے کہ سعودی عرب کی خودمختاری اور سا لمیت پر حملہ ناقابل قبول ہے۔ اس طرح کی کارروائیاں نہ صرف خطے کے امن کو خطرے میں ڈالتی ہیں بلکہ عالمی معیشت پر بھی منفی اثرات مرتب کرتی ہیں۔ سعودی عرب نے ایران کی طرف سے بار بار کی جانے والی جارحیت کے جواب میں جس صبر و تحمل اور ذمہ داری کا ثبوت دیا وہ عالمی برادری کے لیے ایک مثبت مثال ہے جسے پوری دنیا نے سراہا ہے۔ پاکستان نے ایک بار پھر ثابت کیا ہے کہ وہ صرف ایک ایٹمی طاقت ہی نہیں بلکہ ایک ذمہ دار اور امن پسند ریاست بھی ہے، جو مشکل ترین حالات میں بھی امت مسلمہ کی رہنمائی اور عالمی امن کے قیام کے لیے اپنا کردار ادا کرنے کی بھرپور صلاحیت رکھتا ہے۔