لاہور ( )قرآن پبلشرز ایسوسی ایشن کے صدر قدرت اللہ ، چئیرمین سید احسن محمود شاہ اور سرپرست اعلیٰ حفیظ البرکات شاہ نے اپنے ایک مشترکہ بیان میں کہا ہے کہ محرم الحرام میں امن وامان یقینی بنانے کیلئے علما ، انتظامیہ اور میڈیا اپنا کردار ادا کرے ۔محرم اسلامی سال کا پہلا مہینہ ہی نہیں بلکہ یہ امام حسین علیہ السلام کی یاد کو تازہ کرنے کا مہینہ بھی ہے اس مہینے کی حرمت کا تقاضا ہے کہ ہم امام حسین اور ااہل بیت علیھم السلام کی محبتوں کو اپنے دلوں میں زندہ کریں اور پاکستان کو صحیح معنوں میں اسلامی فلاحی ریاست بنانے کا عہد کریں ۔ محرم کی حرمت کا ایک تقاضہ یہ بھی ہے کہ ہم اس مہینے کو مسنون طریقے کے مطابق گزاریں ۔ انھوں نے کہا ہے کہ اسلام امن ، محبت اور رواداری کا دین ہے۔ امن محبت اور روداری اسلام کاحسن ہے۔ اسلام امن ، محبت اور روداری کے ذریعے سے ہی دنیا میں پھیلا ہے ۔ دنیا امن کیلئے ترس رہی ہے جبکہ امن وامان صرف اسلام کی تعلیمات کے ذریعے سے ہی ممکن ہے ،لیکن اس کیلئے ضروری ہے کہ ہم خود سب سے پہلے حقیقی معنوں میں مسلمان بن جائیں۔انھوں نے کہا کہ امام حسین رضی اللہ عنہ کا پیغام اور ہمارے نبی ﷺ کی تعلیمات بہت اعلیٰ، خوبصورت اور سراپا امن ہیں جبکہ کچھ شدت پسند اسلام کا چہرہ مسخ کررہے ہیں حالانکہ اسلام نے مسلمان کی عزت کو حرم کعبہ سے بھی زیادہ حرمت والا قرار دیا ہے اسی طرح ہمارے نبی ﷺ نے چار مہینوں کو بھی حرمت والا قراردیا ہے جن میں ایک مہینہ محرم کا ہے ۔ حرمت والے مہینے کا آغاز ہونے والا ہے لہذا ہمیں رسول مقبول ﷺ کے ان فرامین سے رہنمائی لینے کی ضرورت ہے جو انھوں نے محرم کی حرمت اور فضلیت کے بارے میں بیان فرمائے ہیں ۔ محرم کا اصل حق یہ ہے کہ ہم اپنے مسلمان بھائیوں کیلئے اپنے دل صاف کریں، دلوں سے کدورتیں ، نفرتیں ، دشمنیاں اور تعصب دور کریں ، اپنے کلمہ گو بھائیوں کیلئے ریشم کی طرح نرم وملائم بن جائیں اور محرم الحرام کے ان ایام کو محبت وپیار سے گزاریں اسلئے کہ اسلام سراپا خیر وبرکت ہے اور رحمت کا دین ہے ۔
محرم الحرام ، امن وامان یقینی بنانے کیلئے علما ، انتظامیہ ،میڈیا اپنا کردار ادا کرے،قدرت اللہ
