لاہور میں بسنت کی تقریبات سے متعلق ایک منفرد مگر متنازع درخواست پر سیشن کورٹ نے واضح مؤقف اختیار کرتے ہوئے اسے مسترد کر دیا۔
ایک مقامی وکیل کی جانب سے عدالت میں درخواست دائر کی گئی تھی جس میں بسنت منانے کے لیے سیشن کورٹ کی عمارت کی چھت فراہم کرنے کی استدعا کی گئی۔درخواست کی سماعت کے دوران عدالت نے وکیل کے مؤقف کو غور سے سنا تاہم سیشن کورٹ نے سیکیورٹی خدشات کو بنیاد بناتے ہوئے درخواست کو خارج کر دیا۔ عدالت نے اپنے ریمارکس میں کہا کہ سیشن کورٹ کا احاطہ ایک انتہائی حساس اور سیکیورٹی زون ہے، جہاں عدالتی کارروائیاں اور سرکاری امور انجام دیے جاتے ہیں، ایسے میں کسی بھی قسم کی تفریحی یا عوامی تقریب کی اجازت دینا سنگین سیکیورٹی خطرات کو جنم دے سکتا ہے۔
عدالت کا کہنا تھا کہ ماضی میں بسنت کے موقع پر پتنگ بازی کے باعث قیمتی انسانی جانوں کے ضیاع اور امن و امان کی صورتحال خراب ہونے کے واقعات سامنے آ چکے ہیں، جس کے پیش نظر عدالتی عمارت جیسے حساس مقامات پر اس نوعیت کی سرگرمیوں کی اجازت نہیں دی جا سکتی۔سیشن کورٹ نے مزید واضح کیا کہ قانون اور سیکیورٹی ضوابط کے تحت عدالتی عمارتوں کا استعمال صرف اور صرف سرکاری و عدالتی مقاصد کے لیے مخصوص ہے، جبکہ عوامی یا تفریحی تقریبات کے لیے دیگر مناسب مقامات موجود ہیں۔