ڈیرہ غازیخان (باغی ٹی وی رپورٹ)واٹر اینڈ سینیٹیشن اتھارٹی (واسا) ڈیرہ غازی خان کے منیجنگ ڈائریکٹر انجینئر ڈاکٹر جواد کلیم اللہ ایک انتہائی تجربہ کار، منجھے ہوئے اور پیشہ ورانہ صلاحیتوں سے بھرپور سینیئر افسر ہیں۔ انہوں نے پبلک ہیلتھ انجینئرنگ ڈیپارٹمنٹ اور واسا ملتان میں طویل عرصے تک خدمات سرانجام دیتے ہوئے متعدد اہم منصوبوں میں اپنی فنی مہارت، انتظامی قابلیت اور قائدانہ صلاحیتوں کا بھرپور مظاہرہ کیا۔
ان کی مضبوط تکنیکی بنیاد، غیر معمولی محنت، نظم و ضبط اور ذمہ داری کے احساس نے انہیں ہمیشہ ایک نمایاں مقام دلایا۔ جولائی 2025 میں پنجاب حکومت کی جانب سے ڈیرہ غازی خان میں واسا کے قیام کے ساتھ ہی انہیں اس نو قائم شدہ ادارے کا پہلا منیجنگ ڈائریکٹر مقرر کیا گیا، جو اس بات کا واضح ثبوت ہے کہ صوبائی حکومت کو ان کی دیانت داری، قابلیت اور پیشہ ورانہ صلاحیتوں پر مکمل اعتماد ہے۔
ڈیرہ غازی خان جیسے تاریخی اور آبادی کے لحاظ سے اہم شہر میں صاف پانی کی فراہمی اور سیوریج و سینیٹیشن کے مسائل طویل عرصے سے ایک سنگین چیلنج کی صورت اختیار کیے ہوئے تھے۔ واسا کا قیام شہریوں کے لیے ایک بڑے تحفے سے کم نہیں، تاہم ادارے کے ابتدائی مراحل میں عملے کی کمی، محدود وسائل، بنیادی ڈھانچے کی ضرورت اور عوامی توقعات جیسے کئی چیلنجز درپیش تھے۔
انجینئر ڈاکٹر جواد کلیم اللہ نے چارج سنبھالتے ہی ان تمام مسائل کا نہایت حوصلے، مؤثر منصوبہ بندی اور عملی اقدامات کے ذریعے مقابلہ کیا۔ ان کی قیادت میں سیوریج لائنوں کی صفائی اور بحالی کے کام تیز رفتاری سے شروع کیے گئے، شہر کے مختلف بلاکس، گلیوں اور گھروں میں جمع ہونے والے گندے پانی کے دیرینہ مسائل پر فوری توجہ دی گئی، جبکہ فیلڈ میں ٹیموں کی مسلسل موجودگی کو یقینی بنا کر شہریوں کی شکایات کا بروقت ازالہ کیا جا رہا ہے۔
اسی تسلسل میں منصوبہ بندی کے تحت نئی سیوریج لائنوں کی تنصیب اور واٹر سپلائی نظام کی بہتری کا عمل بھی جاری ہے۔ انجینئر ڈاکٹر جواد کلیم اللہ کی مضبوط انتظامی گرفت، ٹیم کے ساتھ بہترین کوآرڈینیشن اور فیلڈ میں براہِ راست مانیٹرنگ کے باعث شہر اور نواحی علاقوں میں سیوریج اور سینیٹیشن کے مسائل میں نمایاں اور مسلسل بہتری دیکھنے میں آ رہی ہے۔
عوامی شکایات میں واضح کمی اور شہریوں کی جانب سے اطمینان کا اظہار اس بات کا ثبوت ہے کہ واسا ڈیرہ غازی خان درست سمت میں گامزن ہے۔ انجینئر ڈاکٹر جواد کلیم اللہ کی پیشہ ورانہ قابلیت، دیانت داری، متحرک طرزِ قیادت اور عوامی خدمت کا جذبہ اس امر کی ضمانت ہے کہ یہ ادارہ نہ صرف سینیٹیشن کے دیرینہ مسائل پر قابو پائے گا بلکہ شہر کے پانی اور صفائی کے نظام کو ایک نئی، مؤثر اور پائیدار جہت دے گا۔
ڈیرہ غازی خان کے عوام کے لیے یہ یقیناً خوش آئند بات ہے کہ ایک اہم اور حساس ادارے کی قیادت ایک ایسے افسر کے ہاتھ میں ہے جو تکنیکی طور پر ماہر ہونے کے ساتھ ساتھ عوامی مسائل کو سمجھنے اور ان کے حل کے لیے سنجیدہ اور متحرک کردار ادا کر رہا ہے۔ توقع کی جا رہی ہے کہ انجینئر ڈاکٹر جواد کلیم اللہ کی قیادت میں واسا ڈیرہ غازی خان جلد ہی صوبے کے بہترین کارکردگی دکھانے والے اداروں میں شمار ہوگا اور شہر کو صاف، ستھرا اور صحت مند بنانے میں کلیدی کردار ادا کرے گا۔