ڈیرہ غازی خان (سٹی رپورٹر)وزیر اعلیٰ پنجاب مریم نواز شریف کے ویژن ستھرا پنجاب پروگرام کے تحت صفائی کے شعبے میں کام کرنے والے محنت کش ورکرز کی فلاح و بہبود کے لیے عملی اقدامات کا سلسلہ جاری ہے۔ اسی سلسلے میں وزیراعلیٰ پنجاب کے احکامات پر ڈیرہ غازی خان میں صفائی ورکرز میں راشن کارڈز تقسیم کیے گئے۔
راشن کارڈز کی تقسیم کی تقریب میں ڈائیوو ویسٹ مینجمنٹ کے ریجنل منیجر شاہزیب خان، کوآرڈینیٹر عبداللہ عباسی، ایچ آر منیجر محمد یعقوب اور تحصیل منیجر رانا عثمان نے شرکت کی اور ورکرز میں راشن کارڈز تقسیم کیے۔
اس موقع پر مقررین نے کہا کہ صفائی ورکرز کسی بھی شہر کی خوبصورتی اور صحت مند ماحول کو برقرار رکھنے میں ریڑھ کی ہڈی کی حیثیت رکھتے ہیں۔ حکومتِ پنجاب صفائی کے شعبے میں کام کرنے والے محنت کشوں کی فلاح و بہبود کے لیے سنجیدہ اور عملی اقدامات کر رہی ہے، تاکہ انہیں بہتر سہولیات فراہم کی جا سکیں۔
راشن کارڈز حاصل کرنے والے ورکرز نے خوشی اور اطمینان کا اظہار کرتے ہوئے وزیر اعلیٰ پنجاب مریم نواز شریف، حکومتِ پنجاب اور انتظامیہ کا شکریہ ادا کیا اور اس اقدام کو قابلِ تحسین قرار دیا۔