اسرائیل کا امریکا سے مدد مانگنا کمزوری، دشمن کو طاقت سے جواب دیں گے،آیت اللہ خامنہ ای

ایرانی سپریم لیڈر آیت اللہ علی خامنہ ای نے سوشل میڈیا پلیٹ فارم ایکس پر جاری بیان میں کہا ہے کہ اسرائیل کا امریکا سے امداد کی درخواست کرنا اس کی بے بسی اور کمزوری کو ظاہر کرتا ہے۔

اپنے پیغام میں انہوں نے قوم کو خبردار کیا کہ اگر دشمن کو یہ احساس ہو گیا کہ ایرانی قوم خوفزدہ ہے تو وہ چین سے نہیں بیٹھے گا۔آیت اللہ خامنہ ای نے امریکی صدر ٹرمپ کی جانب سے دی گئی دھمکی کا جواب دیتے ہوئے کہا کہ صہیونیوں کے ساتھ کسی قسم کا سمجھوتہ نہیں کیا جائے گا۔

انہوں نے واضح کیا کہ ایران اسرائیلی جارحیت کا ہر سطح پر بھرپور اور طاقتور جواب دیتا رہے گا۔ ان کا کہنا تھا کہ دشمن کے ساتھ وہی مؤقف برقرار رکھا جائے جو آج تک رکھا گیا ہے: مضبوط، پرعزم اور بے خوف۔ایرانی عوام کو مخاطب کرتے ہوئے آیت اللہ خامنہ ای نے کہا کہ جو اتحاد اور مزاحمت تم نے اب تک دکھائی ہے، اسے مزید تقویت کے ساتھ جاری رکھو۔

اپنے پیغام کے آخر میں انہوں نے سورہ انفال کی ایک آیت کا ترجمہ بھی شیئر کیا: "فتح صرف اللہ کی طرف سے ہے جو غالب اور حکمت والا ہے۔”