تہران: ایران کے دارالحکومت تہران میں یومِ القدس کی بڑی ریلی کے قریب دھماکوں کی اطلاعات سامنے آئی ہیں۔
ایرانی ریاستی خبر رساں ایجنسی تسنیم کے مطابق دھماکے وسطی تہران میں اس مقام کے قریب سنے گئے جہاں فلسطینیوں سے اظہارِ یکجہتی کے لیے ہزاروں افراد جمع تھے۔یومِ القدس مارچ میں بڑی تعداد میں شہری شریک ہیں، اس دوران ایک دھماکے کے بعد قریب ہی دھوئیں کے بادل اٹھتے دکھائی دیے جبکہ مظاہرین نعرے بازی جاری رکھے ہوئے تھے۔ واقعے کے فوراً بعد علاقے میں سیکیورٹی کی صورتحال سخت کر دی گئی۔
دوسری جانب اسرائیل نے تہران کے بعض علاقوں کے لیے ہنگامی انتباہ جاری کرتے ہوئے شہریوں کو وہاں سے فوری طور پر نکلنے کی ہدایت کی ہے۔ اسرائیلی فوج (آئی ڈی ایف) نے فارسی زبان میں اپنے سوشل میڈیا اکاؤنٹ کے ذریعے جاری بیان میں کہا کہ شہری اپنی حفاظت کے پیش نظر نقشے میں دکھائے گئے علاقوں کو فوری طور پر خالی کر دیں۔اسرائیلی فوج کے مطابق آئندہ چند گھنٹوں میں تہران کے مخصوص مقامات پر فوجی کارروائی کی جا سکتی ہے۔
واضح رہے کہ یومِ القدس ہر سال رمضان المبارک کے آخری جمعے کو منایا جاتا ہے جس میں دنیا بھر میں فلسطینی عوام سے اظہارِ یکجہتی کے لیے ریلیاں اور مظاہرے کیے جاتے ہیں۔ ایران میں اس دن بڑے پیمانے پر عوامی اجتماعات منعقد ہوتے ہیں جن میں حکومتی و مذہبی قیادت بھی شریک ہوتی ہے۔