لندن: برطانیہ کے شہر نیلسن سے تعلق رکھنے والی 20 سالہ فلک راجہ کو دولتِ مشترکہ (کامن ویلتھ) کے لیے برطانیہ کی نوجوان سفیر منتخب کر لیا گیا ہے۔ وہ یوتھ کونسل یوکے کے نو تشکیل شدہ ایگزیکٹو بورڈ میں شامل چار نوجوان سفیروں میں سے ایک ہوں گی اور عالمی سطح پر نوجوانوں کے حقوق، مسائل اور مواقع کی نمائندگی کریں گی۔
فلک راجہ ان 19 نوجوان رہنماؤں میں شامل ہیں جن کی عمریں 16 سے 25 سال کے درمیان ہیں اور جو آئندہ دو برس کے لیے یوتھ کونسل یوکے کے نئے ایگزیکٹو بورڈ کی قیادت کریں گے۔ یہ بورڈ برطانیہ، کراؤن ڈیپنڈنسیز اور اوورسیز ٹیریٹریز میں موجود 200 سے زائد نوجوان تنظیموں کے نیٹ ورک کی نمائندگی کرتا ہے، جو تقریباً 78 لاکھ نوجوانوں تک رسائی رکھتا ہے۔
اپنے انتخاب پر اظہارِ خیال کرتے ہوئے فلک راجہ نے کہا کہ وہ اس اعزاز پر بے حد خوش، فخر محسوس کر رہی ہیں اور اسے ایک بڑی ذمہ داری سمجھتی ہیں۔ ان کا کہنا تھا کہ ان کی ہمیشہ سے کوشش رہی ہے کہ سماجی انصاف، مساوی مواقع اور تعلیم کے ذریعے نوجوانوں کی زندگیوں میں مثبت تبدیلی لائی جائے۔
انہوں نے کہا کہ وہ برطانیہ اور دنیا بھر کے نوجوانوں کی بھرپور نمائندگی کریں گی اور اس بات کو یقینی بنانے کے لیے مسلسل کام کریں گی کہ نوجوانوں کی آواز نہ صرف سنی جائے بلکہ انہیں پالیسی سازی اور فیصلہ سازی کے عمل میں بھی مؤثر کردار دیا جائے۔
یوتھ کونسل یوکے کے بانی اراکین کی جانب سے منتخب ہونے والا یہ ایگزیکٹو بورڈ دو سال تک اپنی ذمہ داریاں انجام دے گا۔ بورڈ جلد ہی نوجوان تنظیموں سے مشاورت کے بعد اپنی ترجیحات اور آئندہ کے لائحہ عمل کا اعلان کرے گا۔
تنظیم نے نوجوان رہنماؤں کی معاونت کے لیے ماہرین پر مشتمل ایک غیر ووٹنگ سپورٹ بورڈ بھی قائم کرنے کا فیصلہ کیا ہے، جو منتخب اراکین کو رہنمائی اور مشاورتی خدمات فراہم کرے گا۔
فلک راجہ کا انتخاب نوجوانوں کی قیادت، سماجی خدمت اور تعلیم کے شعبے میں ان کی نمایاں خدمات کا اعتراف قرار دیا جا رہا ہے۔ ان کی کامیابی کو برطانیہ میں مقیم پاکستانی اور کشمیری کمیونٹی کے لیے بھی باعثِ فخر قرار دیا جا رہا ہے۔
فلک راجہ کامن ویلتھ کے لیے برطانیہ کی نوجوان سفیر منتخب
