عدالت سمجھتی ہے کہ عمران ضمانت کے حق دار ہیں تو ہم اس کی حمایت کریں گے،بلاول

وزیر اعظم پاکستان کی جانب سے بھارتی جارحیت کے بعد پاکستان کی جوابی کارروائی کو دنیا بھر میں اجاگر کرنے کے لیے بنائے گئے سفارتی وفد کے سربراہ بلاول بھٹو زرداری کا کہنا ہے پاکستان ایک ذمہ دار ملک ہے اور بھارت کے ساتھ تمام مسائل کا حل کشمیر سے ہوکر نکلتا ہے۔

بلاول بھٹو زرداری نے کہا کہ پاکستان ایک ذمہ داری ایٹمی ریاست ہے، پاکستان نے ہمیشہ مذاکرات اور سفارت کاری کے ذریعے مسائل کے حل کی بات کی اور ہمیشہ امن کا پیغام دیا، پاکستان نے واضح کیا ہے کہ پانی روکنا اعلان جنگ تصور ہو گا، بھارت یکطرفہ طور پر سندھ طاس معاہدے کو معطل یا ختم نہیں کر سکتا، پانی ہماری ناگزیرضرورت ہےاس پرکوئی سمجھوتا نہیں ہوگا۔

انہوں نے کہا کہ بھارت کے ساتھ کشمیر سمیت تمام مسائل پر مذاکرات چاہتے ہیں، تمام مسائل کا حل کشمیرسے ہوکرنکلتا ہے، بھارت مس انفارمیشن اور ڈس انفارمیشن پھیلا رہا ہے،بلاول بھٹو زرداری نے ایک بار پھر پاک بھارت جنگ بندی میں امریکی صدر کے کردار کی تعریف کرتے ہوئے کہا کہ ڈونلڈ ٹرمپ کا جنگ بندی کے حوالے سے کردار لائق تحسین ہے، ہم نے پہلگام واقعے پر غیرجانبدار تحقیقات کی پیش کش کی تھی لیکن انڈیا نے ہماری پیشکش قبول نہیں کی، دونوں جوہری ممالک کے درمیان تنازعات کے حل کے لیےکوئی مکینزم موجود نہیں ہے۔

غیر ملکی ٹی وی کو بلاول زرداری نے انٹرویو بھی دیا، اینکر نے سوال کیا کہ عمران خان کو 14 سال قید کی سزا ہوئی، کہا جا رہا ہے 11 جون کو اُن کی ضمانت ہو جائے گی،جس کے جواب میں بلاول کا کہنا تھا کہ مجھے علم نہیں، پاکستان میں عدالتوں کا ایک پراسس ہے اور اگر عدالت سمجھتی ہے کہ عمران خان ضمانت کے حق دار ہیں تو ہم اس کی حمایت کریں گے، ضمانت اُن کا حق ہے، عمران خان کو 11 جون کو ضمانت ملتی ہے تو میں اور میری پارٹی اِس فیصلے کو چیلنج نہیں کرینگے،