ایران کی قومی سلامتی کمیٹی کے سربراہ ابراہیم عزیزی نے کہا ہے کہ اب وقت آ گیا ہے کہ آبنائے ہرمز کے لیے ایک نئے بحری نظام کا نفاذ کیا جائے، جس کے تحت خلیجی گزرگاہ سے جہازوں کی آمد و رفت پر مزید سخت نگرانی رکھی جائے گی۔
عرب میڈیا رپورٹس کے مطابق ابراہیم عزیزی نے اپنے بیان میں کہا کہ نئے نظام کے تحت صرف وہی تجارتی جہاز مخصوص بحری راستوں سے گزر سکیں گے جنہیں ایرانی پاسدارانِ انقلاب کی بحریہ سے باقاعدہ اجازت حاصل ہوگی۔انہوں نے مزید کہا کہ ان جہازوں کو اجازت نامہ حاصل کرنے کے لیے مقررہ فیس بھی ادا کرنا ہوگی، جبکہ بغیر اجازت گزرنے والے بحری جہازوں کے خلاف کارروائی کی جا سکتی ہے۔ایرانی عہدیدار نے خبردار کیا کہ اگر امریکا ایرانی جہازوں کے لیے کسی قسم کی رکاوٹ پیدا کرنے کی کوشش کرتا ہے تو حالات فوری طور پر تبدیل ہو سکتے ہیں، اور ایران مزید سخت اقدامات اٹھا سکتا ہے۔
دوسری جانب پاسدارانِ انقلاب کا کہنا ہے کہ جب تک امریکا ایران سے آنے جانے والے جہازوں کی نقل و حرکت بحال نہیں کرتا، آبنائے ہرمز سخت کنٹرول میں رہے گی۔