جماعت اسلامی سندھ کا کراچی تا کشمور بجلی کی بدترین لوڈشیڈنگ پر تشویش کا اظہار

جماعت اسلامی سندھ کے جنرل سیکریٹری کاشف سعید شیخ نے کراچی تا کشمور سندھ بھر میں بجلی کی بدترین لوڈشیڈنگ پر تشویش کا اظہار کرتے ہوئے کہا ہے کہ شدید گرمی کے باوجود بجلی کی لوڈشیڈنگ ایک طرف معمول کی زندگی معطل اور دوسری جانب لوگوں کو ذہنی مریض بنادیا ہے،حکومت عوام کی حالت زار پر رحم کرتے ہوئے بجلی کمپنیوں کو لوڈشیڈنگ کے دورانیہ میں کمی کا پابند بنائے۔
انہوں نے آج ایک بیان میں مزید کہا کہ بجلی کی لوڈشیڈنگ سے کراچی سمیت بڑے شہروں میں پینے کے پانی کا بھی شدید بحران پیدا ہوگیا ہے۔بجلی کی پیداوار بڑھانے، لائن لاسز اور کرپشن ختم کرنے کی بجائے بجلی کی لوڈشیڈنگ اور بھاری بلوں کا بوجھ عوام پر ڈالنا کہاں کا انصاف ہے۔
بڑے شہروں میں 4سی5گھنٹے جبکہ دیہی علاقوں میں 15سی18گھنٹے کی لوڈشیڈنگ کی وجہ سے گھروں میں مریضوں، بچوں اور خواتین سمیت بزرگوں کا برا حال ہے جبکہ برف کے کارخانوں کی بندش کی وجہ سے لوگوں کو پینے کیلئے ٹھنڈا پانی بھی میسر نہیں جبکہ مسلسل لوڈشیڈنگ کی وجہ سے یوپی ایس کا نظام بھی ٹھپ ہوچکا ہے۔
صوبائی رہنماء نے زور دیا کہ بجلی بحران کے خاتمے کیلئے سنجیدہ اقدامات کئے جائیں۔