ڈیرہ غازی خان (سٹی رپورٹرجواد اکبر)غازی یونیورسٹی ڈی جی خان میں قومی سلامتی، بین الصوبائی ہم آہنگی اور قومی یکجہتی کے فروغ کے حوالے سے ایک اہم سیمینار اور بلوچ طلبہ کے ساتھ مکالماتی نشست کا انعقاد کیا گیا۔ سیمینار میں کمشنر ڈیرہ غازی خان ڈویژن اشفاق احمد چوہدری، آر پی او محمد اظہر اکرم اور وائس چانسلر غازی یونیورسٹی چوہدری اشفاق احمد چٹھہ نے خطاب کیا۔
کمشنر اشفاق احمد چوہدری نے اپنے خطاب میں کہا کہ سماجی ہم آہنگی، قومی اتحاد اور عوامی روابط ہی قومی سلامتی کی مضبوط بنیاد ہیں۔ انہوں نے کہا کہ سیمینار میں بلوچ طلبہ کی بھرپور شرکت قومی یکجہتی، اتحاد اور ملی یگانگت کا واضح اظہار ہے۔ ان کا کہنا تھا کہ پاکستان کے مرکز میں واقع ڈی جی خان صوبائی ہم آہنگی اور قومی یکجہتی کا سنگم ہے، اور پاکستان کی تمام قوموں اور طبقات کے درمیان اتحاد، بھائی چارے اور یکجہتی کا فروغ وقت کی اہم ضرورت ہے۔ کمشنر نے مزید کہا کہ حکومتِ پنجاب نے ہمیشہ بلوچستان کے طلبہ کے لیے تمام سہولتوں کی دستیابی کو یقینی بنایا ہے۔
آر پی او محمد اظہر اکرم نے خطاب کرتے ہوئے کہا کہ بلوچستان محبت اور بھائی چارے کی علامت ہے اور ملک کے امن و استحکام میں بلوچستان کے عوام کا کردار قابلِ قدر ہے۔
وائس چانسلر غازی یونیورسٹی چوہدری اشفاق احمد چٹھہ نے کہا کہ غازی یونیورسٹی قومی یکجہتی کے فروغ میں عملی کردار ادا کر رہی ہے۔ انہوں نے بتایا کہ یونیورسٹی میں بلوچستان کے طلبہ کے لیے مفت تعلیم اور تعلیمی مواقع میں برابری کے عزم پر عمل کیا جا رہا ہے۔
سیمینار کے دوران بلوچ ثقافت کی عکاسی کرتے ہوئے روایتی نغمے اور جھومر بھی پیش کیے گئے، جبکہ تقریب مجموعی طور پر قومی یکجہتی اور بین الصوبائی ہم آہنگی کی ایک خوبصورت مثال بن گئی۔