اوکاڑہ (نامہ نگار ملک ظفر) ڈپٹی کمشنر اوکاڑہ احمد عثمان جاوید کی زیر صدارت ڈسٹرکٹ ایکسیڈنٹ ریویو کمیٹی کا اجلاس منعقد ہوا، جس میں ایڈیشنل ڈپٹی کمشنر جنرل احمد سلیم چشتی، ایڈیشنل ڈپٹی کمشنر فنانس اینڈ پلاننگ چوہدری عبدالجبار گجر، ڈسٹرکٹ ایمرجنسی آفیسر چوہدری ظفر اقبال، سیکرٹری ڈی آر ٹی اے اقصیٰ ریاض، ڈی ایس پی ٹریفک سمیت متعلقہ محکموں کے افسران نے شرکت کی۔
اجلاس میں ضلع بھر میں پیش آنے والے ٹریفک حادثات کے ڈیٹا کا تفصیلی جائزہ لیا گیا جبکہ متعلقہ افسران نے حادثات کی وجوہات، ذمہ دار عناصر اور ان کی روک تھام کے اقدامات پر بریفنگ دی۔
اجلاس سے خطاب کرتے ہوئے ڈپٹی کمشنر احمد عثمان جاوید نے کہا کہ ٹریفک قوانین کی خلاف ورزی انسانی جانوں کے ضیاع کا سبب بنتی ہے، جبکہ احتیاطی تدابیر اپنا کر ٹریفک حادثات سے بچاؤ ممکن ہے۔ انہوں نے ہدایت کی کہ اوور اسپیڈنگ، بغیر ہیلمٹ موٹر سائیکل چلانے، اوور لوڈنگ، ون ویلنگ اور بغیر لائسنس ڈرائیونگ کے خلاف بلا امتیاز کارروائی کی جائے۔
ڈپٹی کمشنر نے ٹریفک پولیس اور دیگر متعلقہ اداروں کو ہدایت کی کہ حادثات کے مقامات کی نشاندہی کر کے فوری حفاظتی اقدامات کیے جائیں، آگاہی مہمات کو مزید مؤثر بنایا جائے اور ٹریفک قوانین پر سختی سے عملدرآمد یقینی بنایا جائے۔
انہوں نے مزید کہا کہ جان لیوا ٹریفک حادثات کی روک تھام کے لیے عوام کو بھی مثبت رویہ اختیار کرتے ہوئے ٹریفک قوانین کی پابندی کرنا ہوگی، اور اس مقصد کے لیے متحرک آگاہی مہم کے ذریعے عوام میں شعور اجاگر کرنے پر خصوصی توجہ دی جائے۔