پاکستانی فلم انڈسٹری کے معروف ہدایتکار الطاف حسین انتقال کر گئے

پاکستانی فلم انڈسٹری کے نامور فلم ساز الطاف حسین طویل عرصے کی بیماری کے بعد انتقال کر گئے۔ اہل خانہ نے پیر کو ان کی وفات کی تصدیق کرتے ہوئے بتایا کہ وہ 70 سال کی عمر میں انتقال کر گئے تھے۔ حال ہی میں انہوں نے اپنی نئی پنجابی فلم تیرے پیار نو سلام پر کام شروع کیا تھا۔الطاف حسین نے 1969ء میں اپنے فلمی کیریئر کا آغاز فلم پنچھی تے پردیسی سے کیا، جو باکس آفس پر کوئی خاص کامیابی حاصل نہ کر سکی۔ تاہم، 12 سال بعد 1981ء میں انہوں نے فلم اتھرا پتر کی ہدایتکاری کی، جو باکس آفس پر کامیاب رہی۔ اس فلم میں سلطان راہی، آسیہ، بازغہ، اجمل، ساون، اور مصطفی قریشی نے مرکزی کردار ادا کیے۔ ان کے کیریئر میں کئی دیگر کامیاب فلمیں بھی شامل ہیں، جن میں صاحب جی، قدرت، لاوارث، چوڑیاں، نکاح، مہندی، اور نوری شامل ہیں۔ الطاف حسین کی وفات پر شوبز شخصیات نے گہرے دکھ کا اظہار کیا ہے، اور ان کے انتقال کو فلم انڈسٹری کے لیے بڑا نقصان قرار دیا ہے۔