پاکستان لندن سے زیادہ محفوظ ہے، طلال چوہدری

‎وزیرِ مملکت برائے داخلہ سینیٹر طلال چوہدری نے کہا ہے کہ پاکستان دنیا کا پانچواں بڑا ملک ہے اور بعض مغربی شہروں، حتیٰ کہ لندن سے بھی زیادہ محفوظ ہے۔
‎سینیٹ کی قائمہ کمیٹی برائے داخلہ کے اجلاس میں گاڑیوں کے کالے شیشوں سے متعلق پالیسی پر تفصیلی بحث ہوئی۔ چیئرمین کمیٹی نے کہا کہ بیرونِ ملک کالے شیشوں کے استعمال کے لیے اضافی فیس لی جاتی ہے، اگر کوئی شخص سکیورٹی ضرورت یا ذاتی شوق کے تحت کالے شیشے استعمال کرنا چاہتا ہے تو اسے فیس ادا کرنی چاہیے۔
‎چیئرمین کمیٹی نے اس بات پر بھی اعتراض اٹھایا کہ پالیسی بننے سے پہلے کارروائی نہ کرنے کی ہدایت کے باوجود شہریوں پر 50 ہزار روپے کے جرمانے عائد کیے گئے۔ انہوں نے سوال کیا کہ جب باقاعدہ پالیسی موجود ہی نہیں تو جرمانے کس بنیاد پر کیے جا رہے ہیں۔
‎اس پر سینیٹر طلال چوہدری نے کہا کہ کمیٹی اس معاملے میں رہنمائی فراہم کرے، کیونکہ اس وقت نہ وفاق اور نہ ہی صوبوں میں کوئی واضح پالیسی موجود ہے۔ ان کا کہنا تھا کہ ایکسائز کے ایک موجودہ قانون کے تحت کارروائی کی جا رہی ہے، جس میں 50 ہزار روپے جرمانے کی شق شامل ہے۔
‎وزیرِ مملکت نے مزید کہا کہ ماضی میں کالے شیشوں کے لیے سرٹیفکیٹس جاری کیے جاتے تھے، مگر ان کا غلط استعمال ہوا۔ اب کالے شیشے فیشن بن چکے ہیں اور اکثر لوگ جلدی بیماریوں کا بہانہ بنا کر ان کا استعمال کرتے ہیں۔
‎اجلاس میں رکن کمیٹی ثمینہ ممتاز نے سکیورٹی صورتحال پر تشویش کا اظہار کرتے ہوئے کہا کہ پولیس عوام کو مکمل تحفظ فراہم کرنے میں ناکام ہے۔ انہوں نے کچے کے علاقے میں پولیس اہلکاروں کے ہاتھوں ایک بچی کے ساتھ زیادتی اور سکیورٹی خدشات کے باعث ایک رکن کے شہید ہونے کا حوالہ بھی دیا۔
‎اس موقع پر سینیٹر طلال چوہدری نے کہا کہ جرائم، بشمول زیادتی، پوری دنیا میں ہوتے ہیں، تاہم لاہور جیسے شہر لندن سے زیادہ محفوظ ہیں۔ اس بیان پر سینیٹر طلحہ محمود نے اختلاف کرتے ہوئے کہا کہ اپر دیر میں لوگوں کو روک کر قتل کیا جا رہا ہے، ایسے میں پاکستان کو لندن یا نیویارک سے زیادہ محفوظ قرار دینا زمینی حقائق کے برعکس ہے۔