قومی ادارہ صحت نے نیپاہ وائرس کے ممکنہ خطرے کے پیشِ نظر وائرس کی 100 ٹیسٹنگ کٹس حاصل کر لی ہیں۔ وفاقی اور صوبائی محکمہ صحت نے ملک میں وائرس کی روک تھام کے لیے ہنگامی اقدامات کا آغاز کر دیا ہے۔
سیکرٹری صحت حامد یعقوب کی زیر صدارت اجلاس میں وائرس سے نمٹنے کے لیے جامع حکمت عملی وضع کی گئی، جس میں زمینی اور فضائی داخلی راستوں پر مسافروں کی 100 فیصد اسکریننگ لازمی قرار دی گئی۔ ایئرپورٹس اور دیگر داخلی راستوں پر مسافروں کی گزشتہ 21 دن کی ٹریول ہسٹری چیک کی جا رہی ہے، جبکہ بخار، سانس لینے میں دشواری یا اعصابی علامات والے مسافروں پر خصوصی نظر رکھی جا رہی ہے۔
حکام نے ہدایت دی ہے کہ کسی بھی مشتبہ مریض کو فوری طور پر مخصوص آئسولیشن یونٹس میں منتقل کیا جائے اور اس کے نمونے تصدیق کے لیے قومی ادارہ صحت بھیجے جائیں۔ سندھ حکومت نے صوبے بھر میں الرٹ جاری کر دیا ہے اور وفاقی حکومت نے تمام صوبوں کو نیپاہ وائرس کے لیے مخصوص اسپتال مختص کرنے اور طبی عملے کو خصوصی تربیت دینے کی ہدایت کی ہے۔
قومی ادارہ صحت نے وضاحت کی کہ پاکستان میں اب تک نیپاہ وائرس کا کوئی مصدقہ کیس سامنے نہیں آیا، اور تمام اقدامات احتیاطی تدابیر کے طور پر کیے جا رہے ہیں۔
نیپاہ وائرس کے ممکنہ خطرے کے پیشِ نظرپاکستان میں ہنگامی اقدامات، 100 ٹیسٹنگ کٹس حاصل
