امریکی محکمہ خارجہ کے ترجمان میتھیو ملر نے پاکستان میں پی ٹی آئی پر پابندی کے حکومتی فیصلے پر تشویش کا اظہار کیا ہے۔ پریس بریفنگ کے دوران انہوں نے کہا کہ پاکستان میں سیاسی جماعت پر پابندی کا معاملہ پیچیدہ سیاسی عمل کا آغاز ہے اور ہم حکومت کے بیانات سے آگاہ ہیں۔میتھیو ملر کا کہنا تھا کہ کسی سیاسی جماعت پر پابندی لگانا یقینی طور پر تشویشناک ہے۔ ہم انسانی حقوق اور آزادی اظہار کے احترام سمیت آئینی اور جمہوری اصولوں کی پرامن پاسداری کی حمایت کرتے ہیں۔ انہوں نے مزید کہا کہ ہم جمہوری عمل اور وسیع تر اصولوں کی حمایت کرتے ہیں، جن میں قانون کی حکمرانی اور قانون کے تحت مساوی انصاف شامل ہے۔ترجمان نے واضح کیا کہ جیسے جیسے یہ اندرونی عمل جاری رہے گا، ہم ان فیصلوں کو بغور دیکھتے رہیں گے۔یاد رہے کہ پاکستانی حکومت نے تحریک انصاف پر پابندی لگانے کا فیصلہ کیا ہے اور سابق صدر عارف علوی، بانی پی ٹی آئی اور سابق ڈپٹی اسپیکر قاسم سوری کے خلاف آرٹیکل 6 کے تحت کیس چلانے کا اعلان کیا ہے۔ وفاقی کابینہ سے منظوری کے بعد یہ ریفرنس سپریم کورٹ کو بھجوایا جائے گا۔