رینالہ خورد (نامہ نگار) رینالہ خورد شہر اور اس کے مضافاتی علاقوں میں موسمِ سرما کی پہلی بارش برسنے سے سردی کی شدت میں اضافہ ہو گیا۔ بارش کے بعد ٹھنڈی ہوائیں چلنے لگیں جس سے موسم مزید سرد ہو گیا، تاہم شہریوں نے اس بارش کو اللہ کی رحمت قرار دیا ہے۔
تفصیلات کے مطابق موسمِ سرما کو شروع ہوئے پونے دو ماہ گزر چکے تھے مگر بارش نہ ہونے کے باعث خشک سردی کا راج تھا، جس کے نتیجے میں کھانسی، نزلہ، زکام، بخار اور وائرل انفیکشنز میں نمایاں اضافہ ہو چکا تھا۔ پنجاب کے دیگر علاقوں کی طرح بالآخر گزشتہ شب رینالہ خورد اور گردونواح میں بھی بارش ہوئی جس سے موسم کا مزاج بدل گیا۔
زرعی ماہرین کے مطابق یہ بارش گندم کی فصل کے لیے نہایت مفید ثابت ہوگی اور پیداوار میں بہتری کا سبب بنے گی۔ دوسری جانب ماہرینِ صحت کا کہنا ہے کہ بارش سے فضائی آلودگی میں موجود جراثیم کا خاتمہ ہوگا، جس سے کھانسی، نزلہ، زکام، بخار اور وائرل انفیکشنز میں کمی آنے کا امکان ہے۔ شہریوں نے بارش پر خوشی کا اظہار کرتے ہوئے اسے مجموعی طور پر صحت اور زراعت دونوں کے لیے خوش آئند قرار دیا ہے۔