رزق کا حقیقی رازق صرف اللہ ہے، دنیاوی انحصار بے چینی پیدا کرتا ہے: سید سرفراز احمد شاہ

اوکاڑہ (نامہ نگار، ملک ظفر)معروف اسکالر سید سرفراز احمد شاہ نے کہا ہے کہ رزق کا حقیقی رازق صرف اللہ تعالیٰ ہے اور دنیاوی وسائل پر حد سے زیادہ انحصار انسان میں بے چینی اور حرص کو جنم دیتا ہے۔ انہوں نے واضح کیا کہ روحانیت کا راستہ نیکی اور عبادت کے امتزاج سے طے ہوتا ہے، جبکہ رب سے براہِ راست تعلق ہی حقیقی سکون کی بنیاد ہے۔

ان خیالات کا اظہار انہوں نے اسلام آباد کے ایک مقامی ہوٹل میں منعقدہ سوال و جواب کی نشست سے خطاب کرتے ہوئے کیا، جس میں صاحبزادگان سید شیراز احمد شاہ، سید سہیل احمد شاہ سمیت عقیدت مندوں کی بڑی تعداد نے شرکت کی۔

اپنی گفتگو میں سید سرفراز احمد شاہ نے کہا کہ اللہ تعالیٰ نے ہر جاندار کے رزق کی ضمانت دے رکھی ہے، مگر انسان کی بے چینی کی اصل وجہ رب پر مکمل بھروسے کے بجائے دنیاوی ذرائع پر انحصار ہے۔ انہوں نے حضرت علیؓ کے قول کا حوالہ دیتے ہوئے کہا کہ رزق کی دو قسمیں ہیں، ایک وہ جسے انسان تلاش کرتا ہے اور دوسرا وہ جو انسان کو خود تلاش کرتا ہے۔

انہوں نے زور دیا کہ روحانیت محض ذکر و اذکار کا نام نہیں بلکہ نیکی، عبادت اور عملی زندگی میں اخلاقی قدروں کو اپنانے سے حاصل ہوتی ہے۔ ان کا کہنا تھا کہ شکر گزاری اور اللہ سے براہِ راست تعلق روحانی سکون کی بنیاد ہے، جبکہ روحانیت کا سفر کسی تکلیف کے بجائے ایک طالب علم کی محنت کی مانند ہے، جس میں قربِ الٰہی کے لیے قربانیاں دینا پڑتی ہیں۔

اس موقع پر صاحبزادہ سید شیراز احمد شاہ نے خطاب کرتے ہوئے کہا کہ حضور اکرم ﷺ کی سنتوں پر عمل پیرا ہو کر زندگی کو آسان اور بامقصد بنایا جا سکتا ہے۔ انہوں نے مزید کہا کہ والدین کی خدمت اور ان سے محبت کو عبادت سمجھ کر انجام دینا چاہیے، کیونکہ اس میں دنیا اور آخرت دونوں کی بھلائی پوشیدہ ہے۔