چیئرمین پاکستان کرکٹ بورڈ محسن نقوی کا کہنا ہے کہ پاکستان کرکٹ بورڈ آئی سی سی سے زیادہ حکومتِ پاکستان کے تابع ہے اور ٹی 20 ورلڈ کپ میں شرکت سے متعلق حتمی فیصلہ حکومت کرے گی۔
لاہور میں میڈیا سے گفتگو کرتے ہوئے محسن نقوی نے کہا کہ ملک بھر میں کرکٹ اسٹیڈیمز کی سہولیات کو بہتر بنایا جا رہا ہے۔ گراؤنڈز کی بہتری کے لیے پنجاب حکومت کے ساتھ مل کر کام کیا جا رہا ہے جبکہ وادیٔ سون میں نئے کرکٹ اسٹیڈیم کی تعمیر بھی جاری ہے۔
انہوں نے واضح کیا کہ پی سی بی کا مؤقف وہی ہوگا جو حکومت کا ہوگا۔ ان کا کہنا تھا کہ ٹی 20 ورلڈ کپ میں شرکت کے حوالے سے فیصلہ وزیراعظم کی آمد پر کیا جائے گا اور وہی حتمی ہوگا۔
چیئرمین پی سی بی نے بنگلہ دیش کے معاملے پر بات کرتے ہوئے کہا کہ بنگلہ دیش کے ساتھ زیادتی ہوئی ہے اور انہیں ہر صورت ورلڈ کپ میں کھیلنے کا موقع ملنا چاہیے۔ ان کا کہنا تھا کہ دوغلا رویہ قابل قبول نہیں اور پاکستان اس معاملے پر بنگلہ دیش کے ساتھ کھڑا ہے۔
محسن نقوی نے مزید کہا کہ کھیل کو سیاست سے الگ رکھا جانا چاہیے اور تمام ٹیموں کے ساتھ یکساں سلوک ہونا ضروری ہے۔
ٹی20 ورلڈ کپ حکومت کے فیصلہ کے تابع, پی سی بی
