ٹھٹھہ (باغی ٹی وی /ڈسٹرکٹ رپورٹر بلاول سموں) ڈپٹی کمشنر ٹھٹھہ سرمد علی نے سول اسپتال مکلی کا تفصیلی دورہ کیا، جہاں انہوں نے مختلف شعبہ جات کا معائنہ کرتے ہوئے ہسپتال میں فراہم کی جانے والی طبی سہولیات اور مجموعی انتظامی صورتحال کا جائزہ لیا۔ دورے کا مقصد مریضوں کو بہتر اور معیاری طبی سہولیات کی فراہمی کو یقینی بنانا تھا۔
ڈپٹی کمشنر نے ایمرجنسی بلاک، او پی ڈی، نو تعمیر شدہ ڈائگنوسٹک سینٹر، کارڈیالوجی یونٹ، میڈیکل اسٹور، فیمیل وارڈ، حفاظتی ٹیکہ جات مرکز، ملیریا سینٹر سمیت دیگر اہم شعبوں کا معائنہ کیا۔ انہوں نے ہر شعبے میں دستیاب سہولیات، عملے کی حاضری، ادویات کی فراہمی اور مریضوں کے علاج معالجے کے انتظامات کا بغور جائزہ لیا۔
دورے کے دوران ڈپٹی کمشنر سرمد علی نے ہسپتال میں زیرِ علاج مریضوں اور ان کے تیمارداروں سے ملاقات کی اور ان سے علاج، ادویات اور دیگر سہولیات کے بارے میں براہِ راست معلومات حاصل کیں۔ مریضوں اور تیمارداروں نے مجموعی طور پر ہسپتال انتظامیہ کی جانب سے فراہم کی جانے والی سہولیات پر اطمینان کا اظہار کیا۔
ڈپٹی کمشنر نے ہسپتال انتظامیہ کو واضح ہدایات دیتے ہوئے کہا کہ مریضوں کو بہترین طبی سہولیات کی فراہمی کے ساتھ ساتھ ادویات کی مکمل دستیابی کو ہر صورت یقینی بنایا جائے۔ انہوں نے صفائی ستھرائی کے نظام کو مزید بہتر بنانے، ہسپتال کے ماحول کو صاف رکھنے اور ایمرجنسی میں آنے والے مریضوں کو فوری اور مؤثر طبی امداد فراہم کرنے پر خصوصی زور دیا۔
اس موقع پر ڈپٹی کمشنر سرمد علی کا کہنا تھا کہ عوام کو صحت کی معیاری اور بروقت سہولیات فراہم کرنا ضلعی انتظامیہ کی اولین ترجیح ہے اور اس حوالے سے کسی بھی قسم کی کوتاہی برداشت نہیں کی جائے گی۔ انہوں نے متعلقہ افسران کو ہدایت کی کہ وہ اپنی ذمہ داریاں احسن طریقے سے ادا کریں تاکہ عوام کو سرکاری ہسپتالوں میں بہتر علاج میسر آ سکے۔