جنوبی ایشیا میں پانی کی قلت، پاکستان سب سے زیادہ متاثر، عالمی بینک


عالمی بینک نے جنوبی ایشیا میں پانی اور ترقی کے حوالے سے رپورٹ جاری کی ہے جس میں خبردار کیا گیا ہے کہ اس خطے میں زیرِ زمین پانی کی سطح تیزی سے کم ہو رہی ہے۔ رپورٹ میں کہا گیا ہے کہ پاکستان پانی کی قلت کے لحاظ سے دنیا کے سب سے زیادہ متاثرہ ممالک میں شامل ہے، جہاں ناقص آبپاشی نظام اور غیر مؤثر زرعی طریقے پانی کے ضیاع کا سبب بن رہے ہیں۔
رپورٹ میں بتایا گیا ہے کہ پنجاب میں جدید آبپاشی منصوبوں سے پانی کی 57 فیصد بچت ممکن ہوئی، جبکہ جدید زرعی منصوبوں کے نتیجے میں فصلوں کی پیداوار میں 14 سے 31 فیصد تک اضافہ ہوا ہے۔ عالمی بینک کا کہنا ہے کہ اگر فوری اقدامات نہ کیے گئے تو پانی کی کمی سے معیشت اور خوراک کی پیداوار پر سنگین اثرات مرتب ہو سکتے ہیں۔