قومی احتساب بیورو (نیب) کراچی نے میئر کراچی مرتضیٰ وہاب کو باضابطہ خط ارسال کرتے ہوئے کراچی میٹروپولیٹن کارپوریشن (کے ایم سی) کے ڈویلپمنٹ پروجیکٹس سے متعلق اہم تفصیلات طلب کر لی ہیں۔ نیب کی جانب سے یہ اقدام کے ایم سی کے ترقیاتی منصوبوں میں مبینہ میگا کرپشن سے متعلق موصول ہونے والی شکایات کی روشنی میں کیا گیا ہے۔
نیب کراچی کے خط کے مطابق سال 2020 سے 2025 کے دوران کے ایم سی کے تحت مکمل کیے گئے اور جاری تمام ترقیاتی منصوبوں کی جامع تفصیلات فراہم کرنے کی ہدایت کی گئی ہے۔ نیب نے واضح کیا ہے کہ ان منصوبوں میں لاگت، فنڈز کے ذرائع، ٹینڈرز کا طریقہ کار، کنٹریکٹرز کی تفصیلات، ادائیگیوں کا ریکارڈ، منصوبوں کی تکمیل کی مدت اور موجودہ پیش رفت سے متعلق مکمل ریکارڈ فراہم کیا جائے۔ذرائع کے مطابق نیب کو کے ایم سی کے متعدد ڈویلپمنٹ پروجیکٹس میں مبینہ بے ضابطگیوں، فنڈز کے غلط استعمال اور قواعد و ضوابط کی خلاف ورزیوں سے متعلق شکایات موصول ہوئی ہیں، جن پر ابتدائی جانچ کے بعد مزید معلومات حاصل کرنے کا فیصلہ کیا گیا ہے۔
خط میں نیب آرڈیننس کی سیکشن 27 کا حوالہ دیتے ہوئے کہا گیا ہے کہ مطلوبہ تمام تفصیلات 15 جنوری سے قبل نیب کراچی بیورو کو جمع کرائی جائیں۔ مقررہ وقت میں ریکارڈ فراہم نہ کرنے کی صورت میں قانونی کارروائی عمل میں لائی جا سکتی ہے۔